އިތުބާރު ނެތްކަމުގެ ވޯޓު ނާކާމިޔާބުވުމުން، އިމްރާން ޚާންގެ ރައްދު އިދިކޮޅަށް
7 މާރިޗު 2022 | ހޯމަ 17:31އިދިކޮޅަށް ކާމިޔާބު ނުވާނެކަން، އިތުބާރު ނެތްކަމުގެ ވޯޓުގެ ނަތީޖާއިން ފެނިގެންދާނެ
ޕާކިސްތާނުގެ ބޮޑުވަޒީރު އިމްރާން ޚާން
ޕާކިސްތާނުގެ ބޮޑުވަޒީރު އިމްރާން ޚާންގެ އިތުބާރު ނެތްކަމަށް އެގައުމުގެ މަތިގެއިން ނެގި ވޯޓު ނާކާމިޔާބު ވުމުން, އިދިކޮޅު ފަރާތްތަކަށް އިމްރާން ޚާން ވަރުގަދަ ރައްދެއް ދެއްވައިފިއެވެ.
ޕާކިސްތާނުގެ މައިލްސީގައި ބޭއްވި އެއްވުމެއްގައި ވާހަކަ ދައްކަވަމުން އިމްރާން ވިދާޅުވީ، އިދިކޮޅު ފަރާތްތަކުން އުޅެނީ ގައުމުގެ މަސްލަހަތު ނަގާލައި ސިޔާސީ "ގޭމެއް" ކުޅުއްވަން ކަމަށެވެ. އަދި އެކަން އިދިކޮޅަށް ކާމިޔާބު ނުވާނެކަން އިތުބާރު ނެތްކަމުގެ ވޯޓުން ސާބިތުވެއްޖެކަމަށެވެ.
އިމްރާން ވިދާޅުވީ، ޕާކިސްތާނު ސަރުކާރުގައި ރެނދުއަޅާފައިވާކަން އިދިކޮޅުން ދައްކަން އުޅުނެއް ކަމަކު ސަރުކާރު އޮތީ ބަދަހިކޮށް ކަމަށެވެ.
އިމްރާން ވިދާޅުވީ، ޕާކިސްތާނުގެ ސަރުކާރުން ކުރަމުން އަންނަ މަސައްކަތަކީ, ކޮރަޕްޝަންގެ މައްސަލަތަކާގުޅޭ, އަދި ސަރުކާރުގެ މަތީ ފަޑީގައި ތިބެގެން މީގެ ކުރިން ވައްކަންކޮށް ސަރުކާރަށް ޚިޔާނާތްތެރިވެފައިވާ ފަރާތްތައް ހިފައި ހައްޔަރުކުރުން ކަމަށެވެ. އެގޮތުން ނަވާޒް ޝަރީފް ފަދަ ބޭފުޅުން ހިފައި ހައްޔަރުކޮށް ދައުވާކޮށްފައި ވާނެކަމަށް އިމްރާން ވިދާޅުވިއެވެ.
އިމްރާން ވިދާޅުވީ، އިދިކޮޅު ފަރާތްތަކުން ސަރުކާރު ބަދުނާމުކުރުމަށް ކަންކަން ކުރަމުން ގެންދަނީ, އޭގެތެރޭގައި ގައުމަށް ޚިޔާނަތްތެރިވެފައިވާ ބޭފުޅުން ތިއްބެވީމައި ކަމަށެވެ. ކުރިއަށް އޮތްތަނުގައި އެ ބޭފުޅުންވެސް ހައްޔަރުކޮށް ދައުވާކުރައްވާނެ ކަމަށް އިމްރާން ވިދާޅުވިއެވެ.
