ޗައިނާއިން ޔޫކްރެއިނަށް އިންސާނީ އެހީ ފޯރުކޮށްދޭން ނިންމައިފި

ރަޝިއާ އާއި ޔޫކްރެއިނާ ދެމެދު ހިނގަމުންދާ ހަނގުރާމާގައި ޔޫކްރެއިނަށް އިންސާނީ އެހީތެރިކަން ފޯރުކޮށްދޭން ޗައިނާއިން ނިންމައިފިއެވެ.

ޗައިނާގެ ފޮރިން މިނިސްޓަރު ވަންގް ޔީ ވަނީ އެގައުމުގެ ރެޑް ކްރޮސް މެދުވެރިކޮށް ޔޫކްރެއިނަށް އިންސާނީ އެހީތެރިކަން ފޯރުކޮށްދޭން ނިންމާފައިވާކަން އިއުލާނުކުރައްވާފައެވެ. އަދި ވީހާވެސް އަވަހަށް މި އެހީ ފޯރުކޮށްދޭން މަސައްކަތްކުރައްވާނެކަމަށް ވިދާޅުވަމުން މިނިސްޓަރު ވަނީ މީގެ ސަބަބުން ރަޝިއާ އާއި ޗައިނާ އާއި ދެމެދު އޮތް ގުޅުމަށް ބުރޫ ނަރާނެކަމަށްވެސް ވިދާޅުވެފައެވެ.

ޗައިނާއިން ޔޫކްރެއިނަށް އިންސާނީ އެހީ ފޯރުކޮށްދޭން ނިންމި ނަމަވެސް އެގައުމުން ރަޝިއާގެ އަމަލުތައް ކުށްވެރިއެއް ނުކުރެއެވެ. ޗައިނާއިން އަންނަނީ ރަޝިއާގެ ސަލާމަތައް ނުރައްކާވާ މައްސަލަ ސީރިއަސް މައްސަލައެއްގެ ގޮތުގައި ބަލައިގަތުމަށް ހުޅަނގުގެ ގައުމުތަކުގައި ބުނަމުންނެވެ.

ފޮރިން މިނިސްޓަރު ވަންގް ވަނީ ރަޝިއާ އަދި ޔޫކްރެއިންގެ މި މައްސަލައަކީ ގިނަ އަހަރުތަކެއްގެ ތެރޭ ބޮޑުވަމުން އައި މައްސަލައެއް ކަމަށާއި މިކަމަކީ އެންމެ ރެއަކުން މިހެންވި މައްސަލައެއް ނޫން ކަމަށް ވިދާޅުވެފައެވެ. އެގޮތުން އޭނާ ވަނީ މި މައްސަލައާ ގުޅިގެން ވާހަކަދައްކަވަމުން ޗައިނާގެ ހަރުބަހެއް ކަމަށްވާ، "ތިން ފޫޓުގެ އައިސް ގަނޑެއް އެއް ދުވަހަކުން ނުއުފެއްދޭނެ" ބޭނުންކުރައްވާފައެވެ.

މިފަދަ މައްސަލައެއް ހައްލު ކުރަން ބޭނުންވަނީ ހަމަޖެހިގެން ރަނގަޅު "ރޭޝަނަލް" ފިޔަވަޅުތައް އަޅަން ކަމަށް ވިދާޅުވެ އަނދަމުންދާ އަލިފާންގަނޑަކަށް އިތުރަށް ތެޔޮ އެޅުން ބުއްދިވެރި ނޫންކަމަށްވެސް ވަންގް ވަނީ ވިދާޅުވެފައެވެ.

ވަންގް ވިދާޅުވީ ސުލްހައިގެ މަޝްވަރާތައް ކުރުމަށް ބާރުއެޅުމަށް މިހާރުވެސް ޗައިނާ މަސައްކަތްކޮށްފައިވާ ކަމަށާއި، ޗައިނާއިން ދެ ގައުމާއެކު ގުޅުން ބާއްވަމުން ގެންދާކަމަށެވެ. އަދި ސުލްހަ ގާއިމުކުރުމަށް މެދުވެރިއެއްގެ ރޯލު އަދާކުރުމަށް ޗައިނާއިން ތައްޔާރުކަމަށާއި މިކަން ކުރުމަށް ބައިނަލްއަގުމާއީ މުޖުތަމައުއާ އެކު މަސައްކަތްކުރަންވެސް ތައްޔާރު ކަމަށް ވަންގް ވިދާޅުވިއެވެ.