ފްރާންސް ލީގުގައި ޕީއެސްޖީއާއި ދެކޮޅަށް ނިކުމެ ފަހު ވަގުތުގައި ނީސްއިން ލަނޑުޖަހާ ޕީއެސްޖީ ބަލިކޮށްފިއެވެ.

ނީސްގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މި މެޗުން ނީސް މޮޅުވީ 1-0 ގެ ނަތީޖާއަކުންނެވެ. މެޗުގެ 88 ވަނަ މިނެޓުގައި ކެލްވިން ސްޓެންގް ނެގި ހުރަހެއް ގޯލުގެ މަތީ ދާގަނޑަށް ފޮނުވާލައިގެން ނީސް މޮޅުކޮށްދިނީ އެންޑީ ޑެލޯޓްއެވެ. މިއީ ލީގުގައި ޕިއެސްޖީއާއި ދެކޮޅަށް ނީސް އެންމެ ފަހުން ކުޅުނު 18 މެޗުގެ ތެރެއިން އެޓީމު މޮޅުވި ދެވަނަ ފަހަރެވެ.

މި މެޗުގައި ޕީއެސްޖީއަށްވެސް ގޯލު ޖަހާނެ ރަނގަޅު ފުރުސަތުތަކެއް ލިބުނެވެ. އެގޮތުން ކައުންޓާ އެޓޭކެއްގައި އާޖެންޓީނާގެ ފޯވާޑް އެންހެލް ޑިމާރިއާއަށް ލިބުނު ފުރުސަތު ފާހަގަކުރެވެއެވެ. ޑިމާރިއާ ފޮނުވާލި ބޯޅަ ދިޔައީ ގޯލުގެ އަރިމަތިން ބޭރަށެވެ. މި މެޗުގައި ޕީއެސްޖީގެ ޒުވާން ތަރި ކީލިއަން އެމްބާޕޭ ސަސްޕެންޝަންގައި ހުރުމުގެ ސަބަބުން ނުކުޅެވުމުގެ ފަޅުކަން ޕީއެސްޖީ ޓީމުން ފެނުނެވެ. އަދި ނޭމާ އާއި މެސީ ހިފެހެއްޓުމުގައި ނީސްއިން ވަނީ ވަރަށް ރަނގަޅު ދައުރެއް އަދާކޮށްފައެވެ.

މި މޮޅާއެކު ނީސްއިން ވަނީ ލީގު ތާވަލުގެ ދެވަނައަށް ޖެހިލާފައެވެ. ތާވަލުގެ އެންމެ ކުރީގައި ޕީއެސްޖީ އޮތީ 13 ޕޮއިންޓުގެ ފަރަގަކާއެކުއެވެ. ދެވަނައިގައި އޮތް ނީސްއަށް 27 މެޗުން ލިބުނީ 49 ޕޮއިންޓެވެ. ތިންވަނައިގައި އޮތް މާސޭއަށް 26 މެޗުން ވަނީ 47 ޕޮއިންޓް ލިބިފައެވެ. އެޓީމުގެ 27 ވަނަ މެޗުން މޮޅުވެގެން ތާވަލުގެ ދެވަނައަށް އެރުމުގެ ފުރުސަތު އެބައޮތެވެ.

ލީގުގައި ހޮނިހިރު ދުވަހު ކުޅުނު އެހެން މެޗުތަކަށް ބަލާއިރު، ލޮރިއެންޓް އަތުން ލިޔޯން މޮޅުވީ 4-1 ގެ ނަތީޖާއަކުންނެވެ. އަދި ލެންސްގެ މައްޗަށް ބްރެސްޓް ކުރިހޯދީ 1-0 އިންނެވެ.