ރަޝިޔާ ކުޅުންތެރިންގެ ހައްގުގައި ވާހަކަ ނުދައްކާތީ ޒިންޗެންކޯގެ ފާޑުކިއުން އަމާޒުވެއްޖެ

ރަޝިޔާއިން ޔޫކްރެއިންއަށް ދެމުންދާ ހަމަލާތަކާއި ގުޅިގެން ފީފާ އަދި ޔުއެފާއިން ބައިނަލްއަގްވާމީ މުބާރާތްތަކުން ރަޝިޔާ ސަސްޕެންޑުކޮށްފައި ވާއިރު، ކުޅުންތެރިން އެމީހުންގެ ހައްގުގައި ވާހަކަދައްކާފައި ނުވާތީ ޔޫކްރެއިންއަށް ނިސްބަތްވާ މެންޗެސްޓަރ ސިޓީގެ އޮލެކްސަންޑަރ ޒިންޗެންކޯގެ ފާޑުކިއުން އަމާޒުވެއްޖެއެވެ.

ފީފާ އަދި ޔުއެފާއިން ރަޝިޔާއަށް ދަތިކުރުމުގެ ފިޔަވަޅު އަޅާފައިވާއިރު، އެގައުމުގެ އިސް އެއްވެސް ކުޅުންތެރިއަކު މިކަމާއި މެދު އެއްވެސް ބަހެއް މިހާތަނަށް ބުނެފައެއް ނުވެއެވެ. އަދި މި ހަނގުރާމަ ހުއްޓުމަށް އެގައުމުގެ ރައީސް ޕުޓިން އާއި ދެކޮޅަށް ފާޅުގައި ވާހަކަ ދައްކާފައެއްވެސް ނުވެއެވެ.

މިކަމާއި ގުޅިގެން ޒިންޗެންކޯ ދިން އިންޓަރވިއުއެއްގައި އޭނާ ބުނީ ރަޝިޔާގެ ކުޅުންތެރިން މިކަމާއި މެދު ނުރުހުން ފާޅުނުކުރާތީ ހައިރާންވާ ކަމަށެވެ. އަދި މި ކުލުންތެރިންނަކީ އިންސްޓަގްރާމާއި ފޭސްބުކް ފަދަ ސޯޝަލް މީޑިއާގެ ޕްލެޓްފޯމްތަކުގައި ގިނަ ފޮލޯވަރުން ތިބި ބަޔަކަށް ވާއިރު، މި ހަނގުރާމަ ހުއްޓުވުމަށްޓަކައި އެމީހުންނަށްވެސް ކޮންމެވެސް ކަމެއް ކުރެވިދާނެ ކަމަށެވެ. ނަމަވެސް ކުޅުންތެރިންގެ ހައްގުގައި ވާހަކަ ދެއްކުމުގެ ބަދަލުގައި އެމީހުން ހަނު ހުރުމަކީ ބަލައިގަނެވޭނެ ކަމެއް ނޫންކަމަށް ޒިންޗެންކޯ ބުނެފައިވެއެވެ.

ފުޓްބޯޅައިގެ މައި އިދާރާތަކުން އަޅާފައިވާ ފިޔަވަޅުތަކާއެކު ރަޝިޔާގެ އަންހެން އަދި ފިރިހެން ޓީމަށްވެސް ބައިނަލްއަގްވާމީ މެޗުތައް ނުކުޅެވޭނެއެވެ. އެހެންކަމުން މިމަހުގެ ފަހުކޮޅުގައި އޮންނަ ވޯލްޑްކަޕް ކޮލިފައިން މެޗުތަކުގައިވެސް ރަޝިޔާގެ ފިރިހެން ޓީމަށް ނުކުޅެވޭނެއެވެ. އަދި މި މެޗުތަކުގައި ރަޝިޔާ އާއި ދެކޮޅަށް ކުޅެން ތާވަލުކުރެވިފައިވާ ގައުމުތަކުންވެސް އަންނަނީ ރަޝިޔާ އާއެކު މެޗުތައް ކުޅުމަށް ދެކޮޅު ހަދަމުންނެވެ. މީގެ އިތުރުން ޕްރިމިއާ ލީގުންވެސް ވަނީ މިމަހުގެ ފަސް ވަނަ ދުވަހުން ހަތްވަނަ ދުވަހަށް އޮންނަ ލީގު މެޗުތަކުގައި ޔޫކްރެއިންއަށް ތާއީދުކުރާކަން ދެއްކުމަށް ނިންމާފައެވެ.