އުރީދޫ ދިވެހި ޕްރިމިއަރ ލީގުގައި ގްރީން ސްޓްރީޓް ބަލިކޮށް ސުޕަރ ޔުނައިޓެޑް ސްޕޯޓްސް (ސަސް) އިން އެޓީމުގެ ފުރަތަމަ މޮޅު ހޯދައިފިއެވެ.
ހުކުރު ދުވަހުގެރޭ ގަލޮޅު ދަނޑުގައި ކުޅުނު މި މެޗު ސަސްއިން ކާމިޔާބުކުރީ 1-0 ގެ ނަތީޖާއަކުންނެވެ. ދެޓީމުގެ ފަރާތުންވެސް ރަނގަޅު ކުޅުމެއް ފެނުނު މި މެޗުގައި ސަސްއިން ލީޑު ނަގާފައިވަނީ ފުރަތަމަ ހާފުގެ 20 ވަނަ މިނެޓުގައެވެ. މި ގޯލު ސަސްއަށް ކާމިޔާބުކޮށްދިނީ އިބްރާހިމް އަތީގު ހަސަންއެވެ.
ފުރަތަމަ ހާފުގައި ސަސްގެ ފަރާތުން ރަނގަޅު ކުޅުމެއް ފެނުނުއިރު، އެޓީމަށް ވަނީ ގޯލުޖަހަން ރަނަގަޅު ފުރުސަތުތަކެއް ލިބިފައެވެ. އެގޮތުން ސަސްގެ އަހުނަފް ރަޝީދު އުފައްދަން މަސައްކަތް ކުރި ހަމަލާ ބޭކާރުވެފައި ވާއިރު، ފުރަތަމަ ހާފް ނިމުމުގެ ކުރިން ސަސްގެ ޔަސްފާދު ހަބީބަށް ގޯލް ޖެހުމަށް ރަގަނޅު ފުރުސަތެއް ލިބިގެންދިޔައެވެ.
މެޗުގެ ދެވަނަ ހާފުގައި ކުޅުން ރަނގަޅުކޮށް ގްރީން ސްޓްރީޓުން ކުރިއަށް ޖެހިގެން ކުޅުނު އިރު އެޓީމުންވެސް ވަނީ ގޯލު ޖެހުމަށް ފުރުސަތުތަކެއް ތަނަވަސްކޮށްފައެވެ. ނަމަވެސް ބަދަލު ކުޅުންތެރިއެއްގެ ގޮތުގައި ކުޅެން ނިކުތް އަންސަރު އިބްރާހިމަށް ލިބުނު ފުރުސަތުގެ ބޭނުން އޭނާއަށް ހިފިފައި ނުހިފުނުއިރު، މިޑްފިލްޑަރު ޖޯޑީ ގޯލާއި ދިމާލަށް ފޮނުވާލަން މަސައްކަތް ކުރި ބޯޅަ ދިފާއުކުރީ ސަސްގެ ކީޕަރު މުހައްމަދު ޝިފާއުއެވެ.
މި މެޗުގެ ދެވަނަ ހާފުގައި ގިނަ ފައުލުތަކެއް ފެނިފައި ވާއިރު، ގްރީން ސްޓްރީޓްސްގެ ކެޕްޓަން ރިލްވާން ވަހީދަށް ވަނީ ދެ ރީންދޫ ކާޑާއެކު ރަތް ކާޑެއްވެސް ދައްކާފައެވެ. ދެ ރީންދޫ ކާޑު ހަމަވެގެން އޭނާއަށް ރަތް ކާޑު ދައްކާފައިވަނީ ދެވަނަ ހާފުގ އިތުރުވަގުތުގައެވެ.
މި މެޗުގެ މޮޅު ކުޅުންތެރިއަކަށް ހޮވިފައިވަނީ ސަސްގެ ކެޕްޓަން އަބްދުﷲ ހަނީފެވެ.
ލީގުގައި މީގެ ކުރިން ކުޅުނު ތިން މެޗުންވެސް ސަސް ވަނި ބަލިވެފައެވެ. އަދި މި މެޗުން ލިބުނު މޮޅާއެކު ސަސް ވަނި ތާވަލުގެ ހަވަނައަށް ޖެހިލާފައެވެ. ނަމަވެސް މި މެޗުން ބަލިވުމުން ގްރީން ސްޓްރީޓަށް ވަނީ މޮޅުވެގެން ތާވަލުގެ ތިންވަނައަށް އަރަން ލިބުނު ފުރުސަތު ގެއްލިފައެވެ.
