ބީބީސީއާއި ހުޅަނގުގެ އިތުރު ނިއުސް ވެބްސައިޓްތަކަކަށް، ރަޝިޔާގެ ތެރޭގައި ނުވަދެވޭގޮތް ހަދައިފި
އެ ވެބްސައިޓްތައް ބްލޮކްކުރީ ރަޝިޔާއާ ގުޅޭގޮތުން ސިސްޓެމެޓިކް ގޮތެއްގައި ފަތުރަމުންދާ ދޮގު ޚަބަރުތަކުގެ ސަބަބުން ކަމަށް ރަޝިޔާއިން ބުނޭ
ބީބީސީ
ބީބީސީއާއި ހުޅަނގުގެ އިތުރު ނިއުސް ވެބްސައިޓްތަކަކަށް ރަޝިޔާގެ ތެރޭގައި ނުވަދެވޭގޮތް ރަޝިޔާއިން ހަދައިފިއެވެ.
ރަޝިޔާއިން ޔޫކްރެއިނަށް ދެމުންދާ ހަމަލާތަކާ ގުޅޭގޮތުން ދޮގު ޚަބަރު ފަތުރާކަމަށް ބުނެ ނުވަދެވޭ ގޮތް ހެދި ވެބްސައިޓްތަކުގެ ތެރޭގައި; ބީބީސީ، ވޮއިސް އޮފް އެމެރިކާ، ރޭޑިޔޯ ފްރީ ޔޫރަޕް/ރޭޑިޔޯ ލިބަރޓީ ހިމެނެއެވެ. ރަޝިޔާގެ ކޮމިޔުނިކޭޝަން ވޮޗްޑޯގުން ވަނީ އެ ވެބްސައިޓްތައް ބްލޮކްކޮށްފައިވާކަމަށް ބުނެފައެވެ.
އެކަމުގެ ސަބަބަކީ ރަޝިޔާއާ ގުޅޭގޮތުން ސިސްޓެމެޓިކް ގޮތެއްގައި ފަތުރަމުންދާ ދޮގު ޚަބަރުތައް ކަމަށް ވޮޗްޑޯގުން ބުނެފައިވެއެވެ. އަދި މިއާއެކު ރަޝިޔާގެ ސަރަހައްދުގެ ތެރޭގައި މިވެބްސައިޓްތަކަށް ނުވަދެވޭ ގޮތަށް ހަދާފައިވާކަމަށް ވަނީ ބުނެފައެވެ.
ރަޝިޔާގެ ވޮޗްޑޯގުން އިތުރަށް ބުނެފައިވަނީ މިމީޑިޔާތަކުން ރަޝިޔާއިން ޔޫކްރެއިންގައި ހިންގަމުންދާ ޚާއްސަ އޮޕަރޭޝަނާ ގުޅޭގޮތުން ޔޫކްރެއިންގެ އާންމުންނަށާއި އާންމު ތަންތަނަށް ހަމަލާދެމުންދާ ކަމަށް ބުނަމުންދާ ކަމަށެވެ.
މިފިޔަވަޅާ ގުޅިގެން ބީބީސީން ބުނެފައިވަނީ ފަހަތަށް ނުޖެހޭނެކަމަށެވެ. އަދި ރަޝިޔާއަަށާއި މުޅި ދުނިޔެއަށް މައުލޫމާތު ފޯރުކޮށްދިނުމަށް މަސައްކަތް ކުރަމުންދާނެކަމަށް ބީބީސިން ވަނީ ބުނެފައެވެ.
ޔޫރަޕިއަން ޔޫނިއަނުން މިހަފުތާގެ ތެރޭގައި ވަނީ, ރަޝިޔާގެ ސަރުކާރުން ކޮންޓްރޯލުކުރަމުން އަންނަ މީޑިޔާތައް ކަމަށްވާ އާރް.ޓީ.އާއި ސްޓަޕްނިކް ބޭންކޮށްފައެވެ. ފޭސްބުކް، ޔޫޓިޔުބް، ޓިކްޓޮކުން ވެސް ވަނީ އާރް.ޓީ.އާއި ސްޕަޓްނިކް ބްލޮކްކޮށްފައެވެ.
ރަޝިޔާއިން ވަނީ ފޭސްބުކްވެސް ބްލޮކްކޮށްފައެވެ.
