ޕާކިސްތާނުގެ މިސްކިތެއްގައި ދިން ހަމަލާތަކެއްގައި 50ށްވުރެ ގިނަ މީހުން މަރުވެއްޖެ
4 މާރިޗު 2022 | ހުކުރު 17:25މި ހަމަލާގައި 56 މީހުން މަރުވެފައިވޭ
ޕާކިސްތާނުގެ މިސްކިތެއްގައި ދިން ހަމަލާތަކެއްގައި 56 މީހުން މަރުވެއްޖެ
ޕާކިސްތާނުގެ މިސްކިތެއްގައި ދިން ހަމަލާތަކެއްގައި 50 އަށް ވުރެ ގިނަ މީހުން މަރުވެއްޖެއެވެ.
މީޑިއާ ރިޕޯޓުތައް ބުނާގޮތުން ހަމަލާ ދީފައި ވަނީ ޕާކިސްތާނުގެ ޕެޝާވަރުގައި ހުންނަ ޝީއީ މިސްކިތަކަށެވެ. މި ހަމަލާގައި 56 މީހުން މަރުވެފައިވެއެވެ.
މިމިސްކިތަށް ހަމަލާ ދީފައި ވަނީ ހުކުރު ނަމާދު ވަގުތުގައެވެ. މިސްކިތުގެ ބައެއް ގޮއްވާލުމަށްފަހު ބަޑި ޖަހަމުން ދެ މީހަކު ވަނީ މިސްކިތަށް ވަދެފައެވެ. މި ހަމަލާތަކުގައި 194 މީހުންނަށް އެކިވަރުގެ ޒަހަމްތައް ލިބިފައިވާކަމަށް ރިޕޯޓުތައް ބުނެއެވެ.
ޕާކިސްތާނުގެ ފުލުހުން މައުލޫމާތުދޭ ގޮތުގައި މިސްކިތަށް ވަނުމުގެ ކުރިން އެމީހުން ވަނީ އެސަރަހައްދުގައި ހަރަކާތްތެރިވަމުން ދިޔަ ފުލުހުންނަށް ހަމަލާދީފައެވެ. މިހަމަލާތަކުގައި ފުލުހުހަކު މަރުވެފައިވާ އިރު އިތުރު ފުލުހަކަށް ވަނީ ވަރަށް ސީރިއަސް އަނިޔާތައް ލިބިފައެވެ.
މި ހަމަލާ ޕާކިސްތާނުގެ ބޮޑުވަޒީރު އިމްރާން ހާން ވަނީ ހަރުކަށި އިބާރާތުން ކުށްވެރިކުރައްވާފައެވެ.
ހުކުރު ދުވަހުގެ މިހަމަލާއަކީ މިފާއިތުވި ހަތް އަހަރުގެ ތެރޭގައި ޕާކިސްތާނުގައި ހިނގި މިފަދަ އެންމެ ނުރައްކާތެރި ހަމަލާއެވެ. ހަމަލާގައި އަނިޔާވި އެންމެންނަށް މިހާރު ދަނީ ހޮސްޕިޓަލްގައި ފަރުވާދެމުންނެވެ.
