ޖަރުމަނުގައި ރާއްޖެ އިޝްތިހާރު ކުރުމަށް އެއްމަހުގެ ކެމްޕޭނެއް

ޖަރުމަނުގެ މާކެޓުގައި ރާއްޖޭގެ ފަތުރުވެރިކަން އިޝްތިހާރުކުރުމަށް އެމްއެމްޕީއާރުސީން ޚާއްސަ ކެމްޕޭނެއް ފަށައިފިއެވެ.

ޖަރުމަނުގެ ނަން މަޝްހޫރު ޓުއަރ އޮޕަރޭޓަރ އެފްޓީއައި އާއި ގުޅިގެން މި ކެމްޕޭނު ކުރިއަށް ގެންދިއުމަށް ހަމަޖެހިފައިވަނީ އެއްމަހުގެ މުއްދަތަކަށެވެ. މި މުއްދަތުގެ ތެރޭގައި ރާއްޖޭގެ ތަފާތު ރީތި މަންޒިލްތައް ދައްކުވައިދޭ ފޮޓޯއާއި ވީޑިއޯ އެފްޓީއައިގެ ވެބްސައިޓް އަދި ނިއުސްލެޓާގެ ޒަރިއްޔާއިން ކަސްޓަމަރުންނާއި ހިއްސާކުރެވިގެންދާނެއެވެ.

މި ކެމްޕޭނުގެ މައިގަނޑު މަގްސަދަކީ ރާއްޖެއަކީ ރައްކާތެރި މާހައުލެއްގެ ގޮތުގައި ޖަރުމަނުގެ ފަތުރުވެރިންނަށް އިޝްތިހާރު ކުރުމެވެ. އެފްޓީއައި އާއި ގުޅިގެން ކުރިއަށްދާ މި ކެމްޕޭނުގެ ތެރެއިން ޖަރުމަނު މާކެޓްގައި ރާއްޖޭގެ ރީތި ނަން ދަމަހައްޓާ, ރާއްޖޭގެ ފަތުރުވެރިކަމުގެ އުފެއްދުންތަކާއި ހާއްސަ ތަޖުރިބާތައް އިޝްތިހާރުކުރާނެއެވެ.

ޖަރުމަނު މާކެޓުގައި ހަރަކާތްތެރިވާ އެންމެ މަގުބޫލު އެއް ޓުއައ އޮޕަރޭޓަރު ކަމުގައިވާ އެފްޓީއައިއަކީ މިދާއިރާގައި 35 އަހަރު ދުވަހުގެ ތަޖުރިބާހުރި ކުންފުންޏެކެވެ. އަދި އެކުންފުނިން އަންނަނީ 120 އަށްވުރެ ގިނަ މަންޒިލަށް ޗުއްޓީ ދަތުރުތައް ވިއްކަމުންނެވެ.

ޖަރުމަނަކީ މިިދޔަ އަހަރު ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރި 10 މާކެޓްގެ ތެރެއިން އެއް މާކެޓެވެ. މިދިޔަ އަހަރު ޖަރުމަނުން ރާއްޖެއަށް 94،784 ފަތުރުވެރިން ޒިޔާރަތްކޮށްފައިވެއެވެ. މިއީ އެ މުއްދަތުގެ ޖުމްލަ ރާއްޖެ އައި ފަތުރުވެރިންގެ 7.3 އިންސައްތައެވެ.

ދުނިޔޭގެ ފެންވަރުގައި ރާއްޖެ އިޝްތިހާރުކުރުމުގެ ޒިންމާ އުފުލާ ކުންފުނީގެ ހައިސިއްޔަތުން އެމްއެމްޕީއާރްސީން ވޭތުވެދިޔަ އަހަރު ކޮށްފައިވާ މަސައްކަތްތަކަށް ބަލާއިރު، އިންޑަސްޓްރީގެ ޕާޓްނަރުންނާއެކު 22 މާކެޓެއްގައި 260 ހަރަކާތް ވަނީ ހިންގާފައެވެ.