ރާއްޖެއިން އަސްކަރީ ގޮތުން ނިންމާ ނިންމުންތަކަށް އިންޑިއާއިން ނުފޫޒު ފޯރުވާތަނެއް ނުފެނޭ

ސަރުކާރު ޒިންމާދާރު ކުރުވުމުގެ ނަމުގައި އިދިކޮޅުން ކުރަމުންދާ މަސައްކަތްތަކުގެ ދަށުން އަވައްޓެރި އިންޑިޔާއާމެދު ރާއްޖެއިން ބާއްވާ ގުޅުމުގެ މައްޗަށް ބިނާކޮށް، ހަގީގަތާ ޚިލާފު އެތައް ވާހަކަތަކެއް ދަނީ ދައްކަމުންނެވެ. އެހެން ނަމަވެސް، މި ވާހަކަތަކުގައި އިދިކޮޅުން ދައްކަމުންދާ މަންޒަރާއި، ކަން އޮތް ގޮތް ވަރަށްވެސް ތަފާތުކަން އަބަދުމެ މި ދަނީ ފެންނަމުންނެވެ.

އިދިކޮޅުން ތުހުމަތުކުރާގޮތުގައި ރާއްޖޭގެ އަސްކަރިއްޔާގެ އަމިއްލަ ބާރެއް ނެތެވެ. މުޅި އަސްކަރިއްޔާ އޮތީ އިންޑިއާގެ މިލިޓަރީ ބާރުތަކުގެ ވަކިތަކުގެ ތެރޭގައިކަމަށް އަޑުހަރުކޮށް ފާޅުގައި ވިދާޅުވަމުންދަނީ އިދިކޮޅު ސިޔާސީ ޕާޓީގެ ހަރުކުލައިގެ ބޭފުޅުންނެވެ. އެބޭފުޅުން ވިދާޅުވާގޮތުގައި ރާއްޖެއަކީ އަސްކަރީ ގޮތުން މިނިވަން ގައުމެކޭ ބުނެވޭކަށް ނެތެވެ. އިންޑިއާގެ އާނބަސް ލިބިގެން މެނުވީ ރާއްޖެއަށް އަސްކަރީ ގޮތުން އެއްވެސް ފިޔަވަޅެއްވެސް، ނިންމުމެއްވެސް އެޅޭކަށް ނޯންނާނެކަމަށް ދަނީ ބުނަމުންނެވެ. ނަމަވެސް މަންޒަރުތައް ފެންނަނީ އެހެނެއް ނޫނެވެ.

ޔޫކްރެއިނަށް ރަޝިޔާއިން ދެމުންދާ ހަމަލާތައް ހުއްޓާލައި ޔޫކްރެއިނަށް އަރާތިބި ރަޝިޔާގެ އަސްކަރީ ފައުޖުތައް އެގައުމުން ފޭބުމަށް އދ.ގެ އާންމު މަޖިލީހުން ފާސްކުރި ގަރާރާ އެއްކޮޅަށް ރާއްޖެއިން ވޯޓު ދިނުމަކީ އޭގެ އެއް މިސާލެވެ. 193 ގައުމުގެ ތެރެއިން މި ގަރާރު ފާސްކުރުމަށް ވޯޓު ދީފައިވަނީ 141 ގައުމަކުންނެވެ. ޗައިނާއާއި އިންޑިޔާ ހިމެނޭ ގޮތުން, 35 ގައުމަކުން ވަކި ކޮޅަކަށް ވޯޓު ދީފައެއްނުވެއެވެ. އެހެންނަމަވެސް، ރާއްޖެއިން ވަނީ އެ ގަރާރާ އެއްކޮޅަށް ވޯޓު ދީފައެވެ.

އަސްކަރީ ގޮތުން ރާއްޖެއިން ތާއީދުކުރާ ކަންކަމާއި، ރާއްޖެއިން ގެންގުޅޭ ސިޔާސަތުތައް ވަކި ގައުމެއްގެ ނުފޫޒުގެދަށުގައި ނެތްކަން އެކަމުންވެސް ދޭހަވެއެވެ. އަސްކަރީ ގޮތުންނާއި، އަސްކަރީ ސިޔާސަތުތައް ތަންފީޒު ކުރުމުގެ ރޮނގުން ބަލާއިރުވެސް ބައެއްގެ އަޅުވެތިކަމުގެ ދަށުގައި ނުވަތަ ބައެއްގެ ނުފޫޒުގެ ދަށުގައި ރާއްޖެ އޮތްނަމަ، މި ދެންނެވި ގަރާރާ ގުޅިގެންވެސް ފެންނާނީ ތަފާތު މަންޒަރެއް ނޫންތޯއެވެ؟ ރާއްޖެއިން ނިންމާ ކޮންމެ ނިންމުމެއް ބިނާވަނީ އިންޑިއާ އަސްކަރިއްޔާގެ ރުހުމުގެ މައްޗަށް ކަމަށްވާނަމަ، އެކަން މިފަހަރުވެސް ފެންނާނެ ނޫންތޯއެވެ؟

ދެން އޮތީ ޚާރިޖީ ސިޔާސަތުތަކުގެ ވާހަކައެވެ. ރާއްޖެއިން ގެންގުޅެނީ ހުރިހާ ގައުމަކާވެސް ގުޅުން ބަދަހިކޮށް، ރާއްޖެއަށް އެންމެ ލާބައާއި މަންފާ ލިބޭނެ ޚާރިޖީ ސިޔާސަތެއްކަން މިއަދު ދަނީ ފެންނަމުންނެވެ. އޭގެ ނަތީޖާވެސް ރަނގަޅެވެ. ރަޝިޔާއިން ޔޫކްރެއިނަށް އަމާޒުކޮށް ހަމަލާތައް ދެމުންދާއިރު އެ ދެ ގައުމުގައި ތާށިވެފައި ތިބި ދިވެހި ދަރިވަރުން ފަސޭހަކަމާއެކު ރައްކާތެރި ހިސާބުތަކަށް ގެންގޮސް، މަދު ވަގުތުކޮޅެއްގެ ތެރޭގައި އެ ކުދިންނަށް ބޭނުންވާ ކަންކަން ފުއްދައިދިނުމުގައި ސަރުކާރުން އެޅި ފިޔަވަޅުތަކަކީ ހަރުދަނާ ޚާރިޖީ ގުޅުންތަކެއް ބިނާވެފައި އޮތުމުގެ ނަތީޖާއެވެ.

ރައީސް އަބްދުﷲ ޔާމީނުގެ ސަރުކާރުން އޭރު ގެންގުޅުނު "ޗައިނާ ފަރސްޓް" ޕޮލިސީގެ ސަބަބުން ޚާރިޖީ ގުޅުންތަކަށް އޭރު ބުރޫއެރިކަން މިއީ މިއަދު ފެންނަން އޮތް ހަގީގަތެކެވެ. އެހެން ނަމަވެސް، މި ސަރުކާރުން މަސައްކަތް ކުރަމުންދަނީ ހަމަހަމަކަމާއެކު، ރާއްޖެއަށް އެންމެ ލާބައާއި މަންފާ ކުރާނެ ގޮތަކަށް ޚާރިޖީ ގުޅުންތައް ބައްޓަން ކުރުމަށެވެ. އެކަމުގެ ނަތީޖާއެއްގެ ގޮތުން މިއަދު އެކި ގައުމުތަކުން ދަނީ ރާއްޖެއާ ގުޅިގެން އެކި މަޝްރޫއުތަކުގައި އެހީތެރިކަން ފޯރުކޮށްދެމުންނެވެ.

ކަން މިހެން ހުރުމާއެކު، ރާއްޖެ ވަކި ގައުމެއްގެ އަޅުވެތިކަމުގެ ދަށުގައި އޮންނަކަމަށް ދައްކަވަމުން ގެންދަވާ ވާހަކައިގެ ދެކޮޅުނުޖެހޭކަން ރައްޔިތުންނަށްވެސް ދަނީ ފެންނަމުންނެވެ. ތިޔައީ ވަކި ސިޔާސީ މަގުސަދެއް ހާސިލުކުރުމަށް، ސަރުކާރާ ރައްޔިތުންނާ ދެމެދު ފިތުނަ އުފެއްދުމަށް ކުރަމުންދާ މަސައްކަތެއްކަން ދިވެހިންނަށް އެނގެއެވެ. ހަގީގަތުގައި ރާއްޖެއިން އަސްކަރީ ގޮތުން ނިންމާ ނިންމުންތަކަށް އިންޑިއާއިން ނުފޫޒު ފޯރުވާތަނެއް ނުފެނެއެވެ. އެ ހަގީގަތް އޮޅުވާލައްވަން ތިޔަ ކުރައްވަނީ ޒިންމާދާރުކަން ކުޑަ މަސައްކަތެކެވެ.