ހިތަދޫ މެޖިސްޓްރޭޓުގެ މައްސަލައެއް ޖޭއެސްސީން ބަލަނީ

ސ.ހިތަދޫ މެޖިސްޓްރޭޓް ކޯޓުގެ މެޖިސްޓްރޭޓް ރަފީޢުއްދީން އަހްމަދުގެ މައްސަލައެއް ބެލުމަށް ޖުޑީޝަލް ސަރވިސް ކޮމިޝަން (ޖޭއެސްސީ) އިން ނިންމައިފިއެވެ.

ބުރާސްފަތި ދުވަހު ޖޭއެސްސީން ބުނީ، މިއީ މެޖިސްޓްރޭޓް ރަފީޢުއްދީން އަޙްމަދު މީހެއްގެ ބަންދާމެދު ގޮތެއް ނިންމުމުގައާއި، އެ ނިންމުމާއި ގުޅޭ ގޮތުން ނޫސްބަޔާނެއް ނެރުމުގައި ފަނޑިޔާރުންގެ ސުލޫކީ މިންގަނޑާއި ޚިލާފަށް ޢަމަލުކޮށްފައިވާކަމަށް ބެލެވޭ މައްސަލައެއް ކަމަށެވެ.

އެކަމާއި ގުޅިގެން މެޖިސްޓްރޭޓް ރަފީޢުއްދީން އަޙްމަދުގެ ސުލޫކީ މައްސަލައެއް ތަޙުޤީޤުކުރުމަށް ކޮމިޝަންގެ "މައްސަލަ ބެލުމާމެދު ގޮތެއް ނިންމާ ކޮމިޓީ" އިން މިހާރު ވަނީ ނިންމާފައެވެ. އަދި 2022 މާރޗް 02 ވަނަ ދުވަހު ބޭއްވި ކޮމިޝަނުގެ މި އަހަރުގެ 14 ވަނަ ޖަލްސާގައި އެ މައްސަލަ ތަޙްޤީޤުކުރުމަށް ތަޙްޤީޤު ކޮމިޓީއެއްވެސް އެކުލަވާލާފައިވާކަމަށް ޖޭއެސްސީން މައުލޫމާތު ދެއެވެ.

ފަނޑިޔާރުންނާއި ގުޅޭ މައްސަލަތައް ބާރު ސްޕީޑުގައި ޖޭއެސްސީން ތަހުގީގު ކުރަމުންދާއިރު، މިދިޔަ އަހަރު ފަނޑިޔާރުންގެ ސުލޫކީ މައްސަލައިގެ ގޮތުގައި 400 އަށްވުރެ ގިނަ މައްސަލަ ހުށައެޅިފައިވާކަމަށް އެ ކޮމިޝަނުން މައުލޫމާތު ދެއެވެ.

ޖޭއެސްސީން ބުނީ، 2021 ވަނަ އަހަރު ފަނޑިޔާރުންގެ ސުލޫކީ މައްސަލައިގެ ގޮތުގައި ޖުޑީޝަލް ސާރވިސް ކޮމިޝަނަށް ހުށަހެޅިފައިވަނީ 404 މައްސަލަ ކަމަށެވެ. އޭގެ ތެރެއިން މައްސަލަ ބެލުމާމެދު ގޮތެއް ނިންމާ ކޮމިޓީން 395 މައްސަލަ ނިންމާފައިވެއެވެ.

އަދި 2022 ވަނަ އަހަރު ފެށިގެން ދިޔައިރު ކޮމިޓީގައި ގޮތެއް ނުނިމި އޮތީ 42 މައްސަލަ ކަމަށް ޖޭއެސްސީން މައުލޫމާތު ދެއެވެ. ފަނޑިޔާރުންނާއި ގުޅިގެން ހުށައެޅިފައިވާ މައްސަލަތަކަށް ބަލާއިރު، 2021 ވަނަ އަހަރު ފަނޑިޔާރުކަމުން ވަކިކުރުމަށް ރައްޔިތުންގެ މަޖިލީހަށް ހުށަހަޅާފައިވަނީ 01 ފަނޑިޔާރެއްގެ މައްސަލަ އެވެ. 

މަގާމުން ވަކި ކުރުން ފިޔަވައި އިތުރު ސުލޫކީ ފިޔަވަޅު 14 ފަނޑިޔާރުންގެ މައްޗަށް އަޅާފައިވެއެވެ. އަދި ސުލޫކީ މައްސަލަ ސާބިތުނުވާކަމަށް 18 މައްސަލައެއް ނިންމާފައިވެއެވެ.