ޔޫކްރެއިންގައި ބާކީ ތިބި 9 ދިވެހީން ހަންގޭރީއަށް ގެންގޮސްފި
3 މާރިޗު 2022 | ބުރާސްފަތި 01:53ޔޫކްރެއިންގައި ތިބި ހުރިހާ ދިވެހީންވެސް މިހާރު ވަނީ ހަންގޭރީއަށް ގެންދެވިފައި
ޔޫކްރެއިންގެ ރައްޔިތުން ސްލޮވަކް ބޯޑަރު ހުރަސް ކުރަނީ
ޔޫކްރެއިންގައި ބާކީ ތިބި 9 ދިވެހިންވެސް ބޯޑަރު ހުރަސްކޮށް މިހާރު ހަންގޭރީއަށް ގެންގޮސްފައިވާކަމަށް ރާއްޖޭގެ ފޮރިން މިނިސްޓަރު އަދި އަދ ގެ އާންމު މަޖިލީހުގެ ރައީސް އަބްދުﷲ ޝާހިދު ވިދާޅުވެއްޖެއެވެ.
ޝާހިދު ވިދާޅުވީ ޔޫކްރެއިންގެ ޚަރްކީވް ގައި ތިބި 5 ދިވެހިންނާއި އެމީހުންގެ އާއިލާއަށް ނިސްބަތްވާ ތިން މީހެއްގެ އިތުރުން ނީޕްރޯގައި ހުރި ދަރިވަރަކާއެކު ޔޫކްރެއިންގައި ތިބި 9 ދިވެހީން މިހާރު ހަންގޭރީއަށް ގެންގޮސްފައިވާ ކަމަށެވެ. މިއާއެކު ޔޫކްރެއިންގައި ތިބި ހުރިހާ ދިވެހީން ވަނީ ސަލާމަތްތެރިކަމާއެކު ހަންގޭރީއަށް ބަދަލުކުރެވިފައެވެ.
އެން،މެ ފަހުން މި ގެންދެވުނު 9 ދިވެހީން ހަންގޭރީއަށް ދިޔުމަށްޓަކައި އެންމެ ފުރަތަމަ ދަތުރުކުރީ ޔޫކްރެއިންގެ ހުޅަނގުގައިވާ ސިޓީއެއް ކަމުގައިވާ ވީވްއަށެވެ. އޭގެ ފަހުން ބޯޑަރު ހުރަސްކުރީ ވީވްއަށް ދިއުމަށްފަހު އެތަނުންނެވެ.
ޝާހިދު ވަނީ މި ފަރާތްތަކުން ދެއްކި ހިތްވަރަށް ތައުރީފުކޮށް ސާބަސްދެއްވާފައެވެ. އަދި އެފަރާތްތައް ވަރަށް އަވަށް އެނބުރި ރާއްޖެއަށް ގެނެވޭނެކަމަށްވެސް ޝާހިދު ވިދާޅުވިއެވެ.
މީގެއިތުރުން ބެލަރޫސްގައި ކިޔަވަމުންދާ ދަރިވަރުންގެ ތެރެއިން އަނބުރާ ރާއްޖެ އަންނަން ބޭނުންވާ ދަރިވަރުންނަށް މާލެ އައުމަށް މާލީ އެހީތެރިކަން ފޯރުކޮށްދިނުމަށް ނިންމައި، ފޮރިން މިނިސްޓްރީން ވަނީ އެކަން އަންގާފައެވެ. ބެލަރޫސްގައި ކްލާސްތައް މެދުނުކެނޑި ހުރިހާ ޔުނިވަރސިޓީއެއްގައި ކުރިއަށްދާ ކަމަށްވެސް މިނިސްޓްރީން ބުނެއެވެ.
ރަޝިޔާގައި ކިޔަވަމުންދާ ދަރިވަރުންގެ ތެރެއިން އަނބުރާ ރާއްޖެ އަންނަން ބޭނުންވާ ދަރިވަރުންނަށް މާލެ އައުމަށް މާލީ އެހީތެރިކަން ފޯރުކޮށްދިނުމަށް ނިންމައި، ދަރިވަރުންނަށްވެސް އެކަން އަންގާފައިވާކަމަށް މިނިސްޓްރީން މައުލޫމާތު ދެއެވެ. އަދި ރަޝިޔާގައިވެސް ކްލާސްތައް މެދުނުކެނޑި ހުރިހާ ޔުނިވަރސިޓީއެއްގައި ކިޔެވުން ކުރިއަށްދާ ކަމަށް ބުނެފައިވެއެވެ.
