ރަޝިޔާއިން ބުނީ މަރުވީ ރަޝިޔާގެ 498 ސިފައިންކަމަށް
3 މާރިޗު 2022 | ބުރާސްފަތި 01:51ރަޝިޔާ ޑިފެންސް މިނިސްޓްރީން ބުނީ ހަމަލާތަކުގައި 1597 ސިފައިން މިހާތަނަށް އައިއިރު ޒަޚަމްވެފައިވާކަމަށް
އދގެ އާންމު މަޖިލީހުގައި ގަރާރު ފާސްކުރަނީ
ރަޝިޔާއިން ޔޫކްރެއިން އަށް އަރާ ދެމުންދާ ހަމަލާތަކާއި ގުޅިގެން މިހާތަނަށް ޔޫކްރެއިންގައި ރަޝިޔާ ސިފައިންގެ 498 މީހުން މަރުވެފައިވާކަމަށް ރަޝިޔާގެ ޑިފެންސް މިނިސްޓްރީން ބުނެފިއެވެ.
ރަޝިޔާ ޑިފެންސް މިނިސްޓްރީން ބުނީ ހަމަލާތަކުގައި 1597 ސިފައިން މިހާތަނަށް އައިއިރު ޒަޚަމްވެފައިވާކަމަށެވެ. މިއީ ހަނގުރާމަ ފެށުނު ފަހުން ހަނގުރާމައިގައި މަރުވި މީހުންނާއި ޒަޚަމްވި މީހުންގެ އަދަދު ރަޝިޔާއިން ހާމަކުރި ފުރަތަމަ ފަހަރެވެ.
މީގެއިތުރުން ރަޝިޔާގެ ޑިފެންސް މިނިސްޓްރީން ބުނީ ޔޫކްރެއިން ސިފައިންގެ 2870 މީހުން މަރާލާފައިވާކަމަށެވެ. އަދި 3700 ސިފައިން ޒަޚަމްވެފައިވާކަމަށެވެ. ނަމަވެސް މި އަދަދުތަކަކީ ޔަޤީންކުރެވޭނެ އަދަދުތަކެއް ނޫނެވެ. އަދި ރަޝިޔާއިން ހާމަކުރި އަދަދުތަކާއި ގުޅިގެން މިހާތަނަށް ޔޫކްރެއިން އިން އެއްޗެއް ބުނެފައެއްނުވެއެވެ.
އަނެއްކޮޅުން ޔޫކްރެއިންގެ އެމަރޖެންސީ ސަރވިސް އިން ބުނެފައިވަނީ މިހާތަނަށް އައިއިރު ޔޫކްރެއިންގެ އާންމުންގެ 2000 މީހުން ހަމަލާތަކުގައި މަރުވެފައިވާކަމަށެވެ. މިއަދަދުތަކަކީވެސް ހަނގުރާމަ ކުރަމުންދާތީ ޔަޤީންކުރެވޭ އަދަދުތަކެއް ނޫނެވެ.
އަނެއްކޮޅުން އދ އިން ބުނެފައިވަނީ ހަނގުރާމަ ފެށިފަހުން ޔޫކްރެއިންގެ 870،000 މީހުން ރެފިޔުޖީންގެ ގޮތުގައި އެކި ޤައުމުތަކަށް ގޮސްފައިވާކަމަށެވެ. އެންމެ ގިނަ މީހުން ގޮސްފައިވަނީ ޕޮލެންޑަށެވެ. ޕޮލެންޑަށް ދިޔަ މީހުންގެ އަދަދު 450،000 އަށް ވުރެ ގިނަ ވާނެކަމަށް އދ އިން ބުނެއެވެ.
ޔޫކްރެއިން އާއި އެމެރިކާ އަދި ހުޅަނގުން އަންނަނީ ރަޝިޔާއިން އާންމުންނަށް އަމާޒުކޮށް ހަމަލާދެމުންދާކަމަށް ބުނަމުންނެވެ. ނަމަވެސް ރަޝިޔާއިން އަންނަނީ އެވާހަކަ ދޮގުކުރަމުންނެވެ.
