ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ރަސްމީ ދަތުރުފުޅެއްގައި، މޯލްޓާއަށް ފުރާވަޑައިގެންފިއެވެ.
މިދަތުރުފުޅަކީ އަބްދުލްއަޒީޒް ސައުދު އަލް ބަބްތައިން ކަލްޗަރަލް ފައުންޑޭޝަންގެ ފަރާތުން އިންތިޒާމްކޮށްގެން ބާއްވާ 2 ވަނަ ވޯލްޑް ފޯރަމް ފޯ ކަލްޗަރ އެންޑް ޕީސް ގައި ބައިވެރިވެ ވަޑައިގެންނެވުމަށް ކުރައްވާ ދަތުރުފުޅެއްކަމަށް މަޖިލީހުގެ އިދާރާއިން ބުނެއެވެ. މި ފޯރަމް ބޭއްވުމަށް ހަމަޖެހިފައިވަނީ މިމަހުގެ 3 ން 4ށެވެ.
މަޖިލީހުގެ އިދާރާއިން މައުލޫމާތުދީފައިވާ ގޮތުގައި މި ފޯރަމްގައި "ދަ ރޯލް އޮފް ޕަރލިމެންޓްސް އެންޑް ސިވިލް ސޮސައިޓީ އޮގަނައިޒޭޝަންސް" މި މައުލޫ އަށް ރައީސް ނަޝީދު ވާހަކަފުޅުދެއްކެވުމަށް ހަމަޖެހިފައިވާ ކަމަށެވެ.
މީގެއިތުރުން މި ދަތުރުފުޅުގައި ރައީސް ނަޝީދު މޯލްޓާގެ ބައެއް އޮފިޝަލުންނާ ބައްދަލުކުރައްވައި މަޝްވަރާކުރެއްވުމަށްވެސް ވަނީ ހަމަޖެހިފައެވެ.
މި ފޯރަމަކީ "ޖަސްޓް ޕީސް" ގެ މަގްސަދު ހާސިލްކުރުމަށާއި، ރައްޔިތުންގެ މެދުގައި އޮންނަ ގުޅުން ދެމެހެއްޓުމަށްޓަކައި ލީޑަރޝިޕް ގާބިލްކަން ކުރިއެރުވުމަށް ޓަކައި އިންސްޓިޓިއުޝަނަލް މެކޭނިޒަމްތަކާއި، ތައުލީމީ ޕްރޮގްރާމްތަކާއި، އާލާތްތަކާއި، އެކްޝަން ޕްލޭންތައް އެކުލަވާލައި، އެ ޕްލޭންތަކަށް އަމަލީ ސިފަގެނައުމާބެހޭ މަޝްވަރާތައް ބޭއްވުމުގެ މަގްސަދުގައި ބާއްވާ ފޯރަމެކެވެ.
