މާލީ ބައިވެރިވުން އޮތް މިންވަރު ބެލުމަށް ސާވޭއެއް ހަދަނީ
2 މާރިޗު 2022 | ބުދަ 08:16މާލީ ޚިދުމަތްތައް ބޭނުންކުރާ ފަރާތްތައް އަދި ބޭނުން ނުކުރާ ފަރާތްތަކުގެ މާލީ ބައިވެރިވުމާއި ގުޅޭ މައުލޫމާތު މި ސާރވޭއިން އެއްކުރެވޭނެ
މާލީ ބައިވެރިވުން އޮތް މިންވަރު ބެލުމަށް ހިންގާ ސާވޭއައި ބެހޭ މައުލޫމާތު ހިއްސާ ކުރަނީ
ދިވެހިރާއްޖޭގެ މާލީ ދާއިރާ ހަރުދަނާކޮށް ކުރިއެރުވުމަށް މޯލްޑިވްސް މަނިޓަރީ އޮތޯރިޓީއިން އިސްނަގައިގެން ކުރަމުންދާ މަސައްކަތްތަކުގެ ތެރެއިން ދިވެހިރާއްޖޭގެ "ނެޝަނަލް ފައިނޭންޝަލް އިންކްލޫޝަން ސްޓްރެޓެޖީ" އެކުލަވާލުމުގެ މަސައްކަތަށް ސާވޭއެއް ކުރިއަށް ގެންދިއުމަށް މޯލްޑިވްސް މަނިޓަރީ އޮތޯރިޓީން ފަށައިފިއެވެ.
އެމްއެމްއޭއިން ބުނީ މި ސްޓްރެޓެޖީ އެކުލަވާލުމަށް ބޭނުންވާ މުހިންމު މަޢުލޫމާތު އެއްކުރުމަށްޓަކައި ޤައުމީ ފެންވަރުގެ ސާރވޭއެއް ކުރިއަށް ގެންދާނެ ކަމަށެވެ. މި ސާރވޭގެ މައިގަނޑު މަޤްޞަދަކީ ދިވެހިރާއްޖޭގައި މާލީ ބައިވެރިވުން (ފައިނޭންޝަލް އިންކްލޫޝަން) އޮތް މިންވަރު ދެނެގަތުމާއި މާލީ ޚިދުމަތްތައް ހޯދާ ފަރާތްތަކުން މާލީ ކަންކަމާއި ގުޅޭ ގޮތުން ހޭލުންތެރިކަން ހުރި މިންވަރު ބެލުމެވެ. ހަމަ މިއާއެކު، ދިވެހިރާއްޖޭގެ މާލީ ބައިވެރިވުމާއި ގުޅޭ ސިޔާސަތުތައް އެކަށައަޅައި އެއާއި ގުޅޭ މަޤްޞަދުތައް ހާސިލުކުރުމަށް ހުރި ފުރުސަތުތަކާއި ގޮންޖެހުންތައް ހޯދުންވެސް މި ސަރވޭގެ މަޤްޞަދުތަކުގެ ތެރޭގައި ހިމެނެއެވެ. އެގޮތުން، މާލީ ޚިދުމަތްތައް ބޭނުންކުރާ ފަރާތްތައް އަދި ބޭނުން ނުކުރާ ފަރާތްތަކުގެ މާލީ ބައިވެރިވުމާ ގުޅޭ މައުލޫމާތު މިސާރވޭއިން އެއްކުރެވޭނެއެވެ.
މާލެ ސަރަހައްދު ހިމެނޭ ގޮތަށް ރެންޑަމްކޮށް ހޮވާލެވޭ 63 ރަށެއްގައި މިސާރވޭ ކުރިއަށް ގެންދެވޭއިރު، ޖުމްލަ 1500 މީހުން ސާރވޭގައި ބައިވެރިވުމަށް ރެންޑަމްކޮށް ހޮވާލެވޭނެއެވެ. މާރޗު މަހުގެ ފުރަތަމަ ހަފްތާއިން އެޕްރީލް މަހުގެ ނިޔަލަށް ކުރިއަށް ގެންދެވޭ މިސާރވޭގެ މަސައްކަތް އޮތޯރިޓީގެ ފަރާތުން ކުރިއަށްގެންދާނީ އެފްޖޭއެސް ކޮންސަލްޓިން ޕްރައިވެޓް ލިމިޓެޑްއިންނެވެ.
އެމްއެމްއޭއިން ބުނީ މި މަސައްކަތަކީ މުހިއްމު ޤައުމީ މަސައްކަތަކަށް ވާހިނދު، މި ސާރވޭ ހިންގުމަށް ހަމަޖެހިފައިވާ ރަށްތަކުގައި ސާރވޭގެ މަސައްކަތް ފުރިހަމަކަމާއެކު ކުރިއަށް ގެންދިއުމަށް އެންމެހާ ފަރާތްތަކުން އެއްބާރުލުން ދިނުމަށް ވަނީ އެދިފައެވެ.
މި ސާރވޭ އާއި ގުޅޭ ގޮތުން އިތުރު މައުލޫމާތު ހޯދުމަށް އީމެއިލް ކުރުމަށް ވަނީ އެދިފައެވެ.
