ޔޫކްރެއިން ވީއެންމެ އަވަހަށް ޔޫރަޕިއަން ޔޫނިއަން (އީޔޫ)ގެ މެމްބަރު ގައުމަކަށް ހެދުމަށް އެދި ޔޫކްރެއިންގެ ރައީސް ވޮލޮޑިމިރް ޒެލެންސްކީ އެދިވަޑައިގެންނެވި އެދިވަޑައިގަތުމާއި އެއްގޮތަށް ވާހަކަތައް ފެށުމަށް އީޔޫގެ 8 ގައުމެއްގެ ލީޑަރުން ގޮވާލައްވައިފިއެވެ.

އީޔޫގެ މެމްބަރު ގައުމަކަށް ޔޫކްރެއިން ހެދުމަށް އެދިވަޑައިގެން ޒެލެންސްކީ އާންމުކުރެއްވި ވީޑިއޯ މެސެޖެއްގައި ވިދާޅުވީ އައު ގޮތްތަކެއް ހޯއްދަވައިގެން ނަމަވެސް އީޔޫގެ މެންބަރު ގައުމެއްގެ ގޮތުގައި ޔޫކްރެއިން ކަނޑައަޅައި ދެއްވުމަށެވެ.

ޒެލެންސްކީގެ މިއެދިވަޑައިގަތުމާއި ގުޅިގެން ޔޫރަޕްގެ މެދުތެރޭ އަދި އިރުމަތީ 8 ގައުމެއްގެ ލީޑަރުން ވަނީ ޔޫކްރެއިން އީޔޫގެ މެމްބަރު ގައުމަކަށް މިހާރުން މިހާރަށް ހެދުމަށާއި މެމްބަރޝިޕާއި ގުޅޭ ވާހަކަތައް ވީއެންމެ އަވަަހަށް ފެށުމަށް އެދިވަޑައިގަންނަވާފައެވެ.

އެގޮތަށް އެދުނު ގައުމުތަކަކީ ބަލްގޭރިއާ، ޗެކްރިޕަބްލިކް، އެސްޓޯނިއާ، ލަތްވިއާ، ލިތުއޭނިއާ، ޕޮލެންޑް، ސްލޮވެކް ރިޕަބްލިކް އަދި ސްލޮވޭނިއާއެވެ. މިގައުމުތަކުގެ ލީޑަރުން ވަނީ އެކަމަށް އެދި އީޔޫއަށް ސިޓީއެއް ފޮނުވާފައެވެ.

މިހާތަނަށް އީޔޫން ބުނެފައިވަނީ އެކަމާއިމެދު ގޮތެއް ނުނިންމާކަމަށެވެ. އެފަދަ ނިންމުމެއް ނިންމަން ގިނަ ދުވަސްތަކެއް ނަގާނެކަމަށާއި މިވަގުތު އެންމެ އިސްކަމެއް ދެނީ ރަޝިޔާ ބަލިކުރެވޭނެ ގޮތްތަކަކަށް ކަމަށެވެ.