އިސްލާމިކް މިނިސްޓްރީ އާއި އިކޮނޮމިކް މިނިސްޓްރީ ގުޅިގެން "ޒަކާތު ނަަފާ"ގެ ނަމުގައި ޕްރޮގްރާމެއް ހިންގަނީ
މި ޕްރޮގްރާމަކީ ކަނޑައެޅޭ ވަކި އުސޫލެއްގެ ދަށުން ވަކި އަދަދެއްގެ ބަޔަކަށް ރާއްޖޭގެ ޒަކާތު ފަންޑުން އެހީތެރިވުމަށް ތައާރަފްކުރެވޭ ޕްރޮގްރާމެއް
އިސްލާމިކް މިނިސްޓްރީ އާއި އިކޮނޮމިކް މިނިސްޓްރީން އެއްބަސްވުމުގައި ސޮއިކުރުމުގެ ރަސްމިއްޔާތުގެ ތެރެއިން
އިސްލާމިކް މިނިސްޓްރީ އާއި އިކޮނޮމިކް މިނިސްޓްރީން 'ޒަކާތު ނަފާ'ގެ ނަމުގައި މާލީ އެހީތެރިކަން ފޯރުކޮށްދިނުމުގެ މަޤްޞަދުގައި ޕްރޮގްރާމެއް ހިންގުމަށް އެއްބަސްވުމަކަށް އައިސްފިއެވެ.
އެގޮތުން އިސްލާމިކް މިނިސްޓްރީން އެކުލަވާލާފައިވާ ފަޤީރުންގެ ދަފްތަރުގައި ހިމެނޭ މީހުންނަށް އަމާޒުކޮށް ހިންގާ މި ޕްރޮގްރާމަކީ ކަނޑައެޅޭ ވަކި އުސޫލެއްގެ ދަށުން ވަކި އަދަދެއްގެ ބަޔަކަށް ރާއްޖޭގެ ޒަކާތު ފަންޑުން އެހީތެރިވުމަށް ތައާރަފްކުރެވޭ ޕްރޮގްރާމެކެވެ. ޕްރޮގްރާމް ކުރިއަށްދާނީ އެފަރާތްތަކަށް އާމްދަނީ ހޯދޭނެ މަގެއްފަހިކޮށްދީ ފުދުންތެރި މުޖުތަަމައުއެއް ބިނާކުރުމުގެ މަޤްޞަދުގައެވެ.
ޕްރޮގްރާމްގައި ފަގީރުންގެ ގޮތުގައި ރަޖިސްޓްރީ ކޮށްފައިވާ މީހުންނަށް، އަމިއްލައަށް މަސައްކަތްކޮށްގެން ފުދުންތެރި ދިރިއުޅުމެއް ފަށައިގަތުމަށް ބޭނުންވާ މާލީއެހީތެރިކަން ފޯރުކޮށްދޭނެއެވެ. އަދި އަމިއްލައަށް މަސައްކަތްކޮށްގެން ޝަރަފްވެރި އަބުރުވެރި ދިރިއުޅުމެއް އުޅުމަށް ބާރުއެޅުމާއި، އިޤްތިޞާދީ ކުރިއެރުވުމުގައި ފަރުދުންގެ ބައިވެރިވުން އިތުރުކުރުވަން އެ ޕްރޮގްރާމްގައި މަސައްކަތްކުރާނެއެވެ.
ފަސް އަހަރުގެ މުއްދަތަށް ކުރިއަށްގެންދާ އެ ޕްރޮގްރާމްގައި ގައުމީ ތަރައްގީއަށާއި މުޖުތަމައުގެ ފުދުންތެރިކަން އިތުރުކުރެވޭނެ ދާއިރާތަކަށް އެހީތެރިކަން ފޯރުކޮށްދޭނެއެވެ. އެގޮތުން ޕްރޮގްރާމްގައި ގެދޮރުން އާމްދަނީ, ޕޯލްޓްރީ ފާމިންގ, ހައިޑްރޯފޯނިކްސް ދަނޑުވެރިކަން, ފަރުމަސްވެރިކަން, ފެހުން, ތަމްރީން، "އޮން ދަ ޖޮބް" ޓްރައިނިން އަދި އެޕްރެންޓިސްޝިޕް ފުރުސަތުތައް ހޯދައިދިނުން ހިމެނެއެވެ.
