ވޯރިއާރސް އެރީނާ އާއި ހަންޏާމީދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީ ގުޅިގެން، އދ.ހަންޏާމީދޫ ކަނބަލުންނަށް އަމާޒުކޮށްގެން ހޭލުންތެރިކުރުމުގެ ޕްރޮގްރާމެއް ކުރިއަށް ގެންގޮސްފިއެވެ.
މިމަހު 25 އިން 26 އަށް ކުރިޔަށްދިޔަ މި ޕްރޮގްރާމްގައި ހަންޏާމީދޫ ކަނބަލުންނަށް ސެލްފް ޑިފެންސް އަދި ހެލްތް އެންޑް ފިޓްނަސް އާއި ގުޅޭގޮތުން ހޭލުންތެރިކުރުމުގެ ސެޝަންތަކެއް ކުރިއަށް ގެންގޮސްފައިވާކަމަށް ވޯރިއާރސް އެރީނާގެ ފަރާތުން މަޢުލޫމާތުދީފައިވެއެވެ. މިސެޝަންތައް ނަންގަވައިދެއްވާފައިވަނީ ސައުތު އެސޯސިއޭޝަން ޖުޖިޓްޝޫ އެސޯސިއޭޝަންގެ ސެކްރެޓަރީ ޖެނެރަލް ސަހާ ހަސަން އެވެ.
ހަންޏާމީދޫއިން ޖުމްލަ 28 ފަރާތަކުން މި ޕްރޮގްރާމްގައި ބައިވެރިވެ، ހަނދާނީ ލިޔުން ވަނީ ޙާސިލްކޮށްފައެވެ.
ވޯރިއާރސް އެރީނާގެ ފަރާތުން ހަންޏާމީދޫގައި ކުރިއަށް ގެންދިޔަ މިހޭލުންތެރިކުރުމުގެ ޕްރޮގްރާމަކީ ކަނބަލުންގެ އިތުރުން ބޮޑެތިވަމުން އަންނަ ކުދިންނަށާއި ފިރިހެނުންނަށްވެސް ވަރަށް ބޭނުންތެރި ޕްރޮގްރާމެއް ކަމަށާއި، މިސެޝަންތަކުގެ ސަބަބުން ވަރަށް މުޙިއްމު ކަންތައްތައް ދަސްވެގެން ހިނގައްޖެކަމަށް ހަންޏާމީދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ރައީސާ ޚަދީޖާ މޫސާ ވިދާޅުވިއެވެ.
ވޯރިއާރސް އެރީނާއަކީ މާޝަލް އާރޓްސް، ފިޒިކަލް ފިޓްނަސް އަދި ޖިމްނާސްޓިކް ފަދަ ޙަރަކާތްތައް ހިންގާ އެސޯސިއޭޝަނެކެވެ.
