ހަރުކަށި ފިކުރު ފެތުރުން ހުއްޓުވުމަށް ޚާއްސަ ޕްރޮގްރާމެއް ފަރުމާ ކުރަމުން އަންނަކަމަށް މޯލްޑިވްސް ކަރެކްޝަނަލް ސަރވިސް (އެމްސީއެސް) އިން ބުނެފިއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން ކޮމިޝަނަރ އޮފް ޕްރިޒަންސް އަހްމަދު މުޙައްމަދުފުޅު ވިދާޅުވީ ޖަލުތަކުގައި ހައްދުފަހަނައަޅާ ދިއުމާއި ހަރުކަށި ފިކުރު ފެތުރުމުގެ މަސައްކަތް ކުރަމުން އަންނަކަން ފާހަގަކުރެވިފައިވާ ކަމަށެވެ. އެހެންކަމުން އެފަދަ އަމަލުތައް ހުއްޓުވުމަށްޓަކައި ނުވަތަ އެބާވަތުގެ އަމަލުތައް ކުރާފަރާތްތައް އިތުރަށް ‘ޑީރެޑިކަލައިޒް’ ކުރުމަށްޓަކައި ޚާއްސަ ޕްރޮގްރާމެއް މިހާރު ފަރުމާކުރަމުން އަންނަ ކަމަށެވެ.
މީގެ އިތުރުން، ޖިންސީ ގޯނާ ކުރުމުގެ މައްސަލަތަކުގައި ގިނަ އަދަދެއްގެ މީހުން ޖަލުތަކުގައި އެބަތިބިކަން ފާހަގަކުރައްވާ އަހްމަދު ވިދާޅުވީ އެފަރާތްތައް ރިހެބިލިޓޭޓް ކުރުމަށްވެސް ޚާއްސަ ޕްރޮގްރާމުތަކެއް ރާވަމުން އަންނަ ކަމަށެވެ.
ހަމަ އެހެންމެ އާންމު ގޮތެއްގައިވެސް ޖަލުތަކުގައި ރިހެބިލިޓޭޝަން ޕްރޮގްރާމުތައް ހިންގާކަމަށާއި، ނަމަވެސް އެއީ ވަރަށް ޖެނެރަލް ޕްރޮގްރާމުތަކެއް ކަމަށް އަހްމަދު ވިދާޅުވިއެވެ. ފިޔަވަހިތަކަކަށް ބަހާލައިގެން ކުރިއަށް ގެންދާ މި ޕްރޮގްރާމުތަކުގެ ފުރަތަމަ ފިޔަވަހީގައި ދެނީ ވަރަށް އަސާސީ މައުލޫމާތުތަކެއް ކަމަށް އޭނާ ވިދާޅުވިއެވެ. އެގޮތުން ފުރަތަމަ ފިޔަވަހީގައި ހިމެނެނީ ލިޔަންކިޔަން އެނގުމާއި ނަމާދު ކުރުމުގެ އިތުރުން ގުރުއާން ކިޔަވުން ފަދަ ކަންކަން އެނގޭތޯ ބެލުން ކަމަށް ވިދާޅުވިއެވެ. އަދި މިކަންކަން ނޭންގޭ ފަރާތްތަކަށް މި ފިޔަވަހީގެ ތެރޭގައި އުނގަންނައިދޭނެކަމަށް ވިދާޅުވިއެވެ.
ދެވަނަ ފިޔަވަހީގައި މައިގަނޑު ގޮތެއްގައި ދަސްކޮށްދެނީ ލައިފްސްޓައިލްގެ ހުނަރުތަކެވެ. އަދި ތިންވަނަ ފިޔަވަހީގައި ވޮކޭޝަނަލް ބައެއް ދާއިރާތަކުގެ މަސައްކަތްތައް ކުރުވާކަމަށް އަހްމަދު ވިދާޅުވިއެވެ.
