އިންޑިއާގެ އަސްކަރީ ތަމްރީން ތަކަށްދާ ދިވެހި އަންހެން ސިފައިން ބުރުގާ ނެގުމަށް މަޖުބޫރު ކުރާ ކަމަށް ކުރީގެ ރައީސް އަބްދުﷲ ޔާމީން ތުހުމަތު ކުރައްވައިފިއެވެ.
ހުކުރު ދުވަހު ގއ.ވިލިނގިއްޔަށް ވަޑައިގެން ރައްޔިތުންނާ ވާހަކަފުޅު ދައްކަވަމުން ރައީސް ޔާމީން ވިދާޅުވީ ރާއްޖެއާއި އިންޑިއާ އާ ދެމެދު އަސްކަރީ ގޮތުން ގުޅުންތައް ބަދަހި ކުރަމުންދާއިރު، މިހާރު ރާއްޖެއިން އިންޑިއާގެ އަސްކަރީ ތަމްރީންތަކަށްދާ ދިވެހި އަންހެން ސިފައިންނަށް ބުރުގާ އަޅައިގެން ތަމްރީންތައް ފުރިހަމަ ނުކުރެވޭ ކަމަށާއި، ބުރުގާ އަޅައިގެން ތަމްރީން ފުރިހަމަ ކުރުމަށް ހުއްދަ ނުދޭ ކަމަށެވެ. އަދި އެކަމާއި ގުޅިގެން ދިވެހި ސަރުކާރުން އޮތީ ހިމޭނުން ކަމަށް އެމަނިކުފާނު ވިދާޅުވިއެވެ.
މީގެ އިތުރުން ރައީސް ޔާމީން ވިދާޅުވީ އިންޑިއާގެ އެތެރޭގައި މިހާރު ބުރުގާ އާ ދެކޮޅަށް ކުރަމުންދާ މަސައްކަތްތައް ވަރަށް ސާފުކޮށް ފެންނަ ކަމަށާއި، އެކަމާއި ދެކޮޅަށް މުސްލިމުން އިންޑިއާ ގައި މުޒާހަރާތައް ކުރަމުންދާ ކަމަށެވެ. ނަމަވެސް އެކަންކަން މިސަރުކާރުން ކުށްވެރި ނުކުރުމަކީ ދެރަކަމެއްގެ ގޮތުގައި ރައީސް ޔާމީން ސިފަ ކުރެއްވިއެވެ.
އިންޑިއާއަށް އަސްކަރީ ތަމްރީން ހެދުމަށް ދާ އަންހެން ބޭފުޅުން، އަންހެން ސިފައިން ތަމްރީން ކުރަމުންދާއިރު ބުރުގާ އަޅާކަށް އެކަން ކުރާކަށް ހުއްދައެއް ނޯވޭ. ދިވެހި ސަރުކާރުން އެކަމަށް ނޫނެކޭ ނުބުނޭ. މިހާރު ރަސްމީކޮށް އެކަން ކުރާކަން އަޅުގަނޑުމެންނަށް އެނގިގެން މިދިޔައީ.ކުރީގެ ރައީސް އަބްދުﷲ ޔާމީން
ރާއްޖެއަށް ބާއްވަމުން ގެންދާ ކޮޗިން ފެރީ ގެ ދަތުރު ތަކަށް އިޝާރަތް ކުރައްވައި ރައީސް ޔާމީން ވިދާޅުވީ ދެގައުމުގެ ދެމެދު ދަތުރުތައް ކުރަމުންދާއިރު، 5 ރުފިޔާ އަށް ލިބުނު އޮރެންޖް 1 ރުފިޔާއަށް ލިބޭނެ ކަމަށް ބުނި ނަމަވެސް އެ އަގުގައި އޮރެންޖެއް ލިބުނު ރައްޔިތެއް ނެތް ކަމަށެވެ. އެހެންކަމުން މިއަދު އެފެރީތަކުން ރާއްޖޭގެ އުތުރަށް އުފުލަމުންދަނީ ކޮންއެއްޗެއްކަން ރައްޔިތުން ކަށަވަރު ކުރަންޖެހޭ ކަމަށް ރައީސް ޔާމީން ވިދާޅުވިއެވެ.
ރާއްޖޭގެ ސިފައިންނާއި ބެހޭ ގޮތުން ރައީސް ޔާމީން ވިދާޅުވީ ރާއްޖެ ހިމާޔަތް ކުރާނީ ދިވެހި ސިފައިން ކަމަށާއި، އިންޑިއާ ސިފައިން ގެންނަން ނުޖެހޭ ކަމަށެވެ. މިއަދު ރާއްޖޭގެ އެކި ހިސާބުތަކުގައި އިންޑިއާގެ ފައުޖުތައް އެބަތިބި ކަމަށް ރައީސް ޔާމީން ވިދާޅުވިއެވެ. އެކަމާއި ދެކޮޅަށް ދިވެހި ސިފައިން ނުކުމެ، ހައްގު ބަސް ބުނުމަށް އެމަނިކުފާނު ގޮވާލެއްވިއެވެ. މީގެ އިތުރުން ރާއްޖޭގެ ކަނޑުގެ އެކި ސަރވޭތައް ހެދުމަށް އިންޑިއާ އާ އެކު އެއްބަސްވެފައިވާއިރު، އެފަދަ ހުރިހާ އެއްބަސްވުންތަކެއްގެ ހަގީގަތް ހާމަކޮށްދިނުމަށް ވެސް ރައީސް ޔާމީން ވަނީ ގޮވާލައްވާފައެވެ.
ރައީސް ޔާމީން ވިދާޅުވީ ޑިފެންސް މިނިސްޓަރު މާރިޔާ އަހުމަދު ދީދީ އަކީ ސިޔާސީ ބޭފުޅެއް ނަމަވެސް ދިވެހި ސިފައިން ސިޔާސީ ނުކުރެވޭނެ ކަމަށެވެ. އެފަދަ ކަންކަން ކުރުމަށް ޖާގަ ނުދެއްވާނެ ކަމަށް ރައީސް ޔާމީން ވިދާޅުވިއެވެ. ރައީސް ޔާމީން ވިދާޅުވީ އިސްލާމް ދީނާއި، ދިވެހި ގައުމު ހިމާޔަތް ކުރާނީ ކޮށްލާ ޓްވީޓަކުން ނޫން ކަމަށާއި، ހައްގު ބަސް ބުނެގެން ކަމަށެވެ. ޕީޕީއެމް-ޕީއެންސީ ކުރަމުންދަނީ އެމަސައްކަތް ކަމަށް އެމަނިކުފާނު ވިދާޅުވިއެވެ. މިއަދު ޕީޕީއެން/ޕީއެންސީ ގެ ލީޑަރުން ފިޔަވައި ދެން ތިބި ހުރިހާ ލީޑަރުން ތިބީ ދިވެހި ރައްޔިތުންނަށް ގައްދާރުވެގެން ކަމަށް ރައީސް ޔާމީން ވިދާޅުވިއެވެ.
