މަރޗް 1ން ފެށިގެން ބޯހިމެނުމުގައި ބޭނުންކުރާ ލޯގޯ ސަރުކާރުގެ އިދާރާތަކު ލިޔުންތަކުގައި ބޭނުންކުރަނީ
މިފަހަރުގެ ބޯހިމެނުން 2022 ވަނަ އަހަރުގެ ސެޕްޓެމްބަރ މަހުގެ 17ން 30ށް ބޭއްވުމަށް ވަނީ ހަމަޖެހިފައި
ރައީސުލްޖުމްހޫރިއްޔާގެ އޮފީސް
މި އަހަރަކީ، ރާއްޖޭގައި ބޯހިމެނުން ބާއްވާ އަހަރުކަމަށް ވުމާއެކު، ބޯހިިމެނުމުގައި ބޭނުން ކުރުމަށް ތައްޔާރުކޮށްފައިވާ ލޯގޯ، މި އަހަރުގެ މާރިޗު މަހުގެ 1 ވަނަ ދުވަހުން ފެށިގެން މި އަހަރުގެ ސެޕްޓެންބަރު މަހުގެ ނިޔަލަށް، ސަރުކާރުގެ އިދާރާތަކުން ފޮނުވާ ލިޔެކިޔުންތަކުގައި ބޭނުންކުރުމަށް ރައީސުލްޖުމްހޫރިއްޔާ ނިންމަވައިފިއެވެ.
ރައީސް އޮފީހުން ބުނީ މި ލޯގޯ ޖެހުމަށް އެކަމާބެހޭ މަޢުލޫމާތު، މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން ސަރުކާރުގެ އޮފީސްތަކަށް ދޭނެކަމަށެވެ، އެ މަޢުލޫމާތު ލިބުމުން، ލޯގޯ ޖަހަމުން ދިޔުމަށް ވަނީ އެދިފައެވެ.
މިހާރު ބޭނުންކުރަމުން އަންނަނީ ފަތުރުވެރިކަމަށް 50 އަހަރުފުރޭ ރަން ޔޫބީލް އަހަރު ފާހަގަކުރުމުގެ ގޮތުން ހަދާފައިވާ "2022: ފަތުރުވެރިކަމުގެ ރަން އަހަރު" ގެ ލޯގޯ އެވެ. މިލޯގޯ މިއަހަރުގެ ޖެނުއަރީ މަހުގެ 1 ވަނަ ދުވަހުން ފެށިގެން އަންނަނީ ބޭނުންކުރަމުންނެވެ.
މިފަހަރުގެ ބޯހިމެނުން 2022 ވަނަ އަހަރުގެ ސެޕްޓެމްބަރ މަހުގެ 17ން 30ށް ބޭއްވުމަށް ވަނީ ހަމަޖެހިފައެވެ. މިފަހަރުގެ ބޯހިމެނުމުގެ ޝިއާރު ކަމުގައިވާ " އަހަރެންގެ ބޯހިމެނުން"އެވެ. މިފަހަރުގެ ބޯހިމެނުމުގައި އެހެން އަހަރުތަކާއި ޚިލާފަށް އިގްތިސާދީ މަސައްކަތްތަކާއި ގުޅޭގޮތުން މައުލޫމާތު އެއްކުރުމަށް ވަނީ ހަމަޖެހިފައެވެ.
ރާއްޖޭގައި ކޮންމެ 10 އަހަރަކުން އެއް އަހަރު ބޯހިމަނައެވެ. އެންމެފަހުން ބޯހިމަނާފައިވަނީ 2014 ވަނަ އަހަރުއެވެ. އެފަހަރުގެ ބޯހިމެނުމުގެ ނަތީޖާ ދައްކާގޮތުން ރާއްޖޭގައި 402،071 މީހުން ދިރިއުޅެއެވެ.
