ހެކި ނެތުމުގެ ސަބަބުން، ބަންގްލަދޭޝް ރައްޔިތަކަށް ކުރި މާރާމާރީގެ ދައުވާއިން ސަލާމަތްވެއްޖެ
ކްރިމިނަލް ކޯޓުގައި މި މައްސަލަ ބެއްލެވީ ގާޒީ ހުސައިން ފާއިޒް ރަޝާދު
ކްރިމިނަލް ކޯޓް- ކްރިމިނަލް ކޯޓުގައި މި މައްސަލަ ބެއްލެވީ ގާޒީ ހުސައިން ފާއިޒް ރަޝާދު
ހެކި ނެތުމުގެ ސަބަބުން، ބަންގްލަދޭޝް ރައްޔިތަކަށް ކުރި މާރާމާރީގެ ދައުވާއިން ސަލާމަތްވެއްޖެއެވެ.
މި މައްސަލައިގައި ދައުލަތުން ދައުވާ ކޮށްފައިވަނީ ބަންގްލަދޭޝްގެ ރައްޔިތެއްކަމަށްވާ މުޙައްމަދު ރޮބެލް ހުސައިންގެ މައްޗަށެވެ. އޭނާގެ މައްޗަށް އުފުލާފައިވަނީ ނުރައްކާތެރި ހަތިޔާރެއް ނުވަތަ ތޫނު އެއްޗެއް ބޭނުންކޮށްގެން މާރާމާރީ ހިންގުމުގެ ކުށުގެ ދައުވާއެވެ.
މި ދައުވާއަކީ 2019 އޭޕްރީލް 26 ވަނަ ދުވަހުގެ ރޭ ހިނގި ޙާދިސާއަކާއި ގުޅޭ ދައުވާއެކެވެ. އެގޮތުން ދައުލަތުން ކުރި ދައުވާގައި ބުނެފައިވަނީ ބަންގްލަދޭޝް ރައްޔިތެއް ކަމަށްވާ މަހުބޫބް އަލަމް ކެފޭއެއްގެ ތެރޭގައި އިންދައި ގާތްގަނޑަކަށް 7 އިންޗި ހުންނަ ވަޅިއަކުން ރޮބެލް އޭނާއަށް ޙަމަލާ ދީފައިވާ ކަމަށެވެ. އެގޮތުން މަހުބޫބް އަލަމްގެ މޭގެ ކަނާތް ފަރާތާއި، ކަނާއަތާއި ބަނޑަށްވެސް ވަޅިން ޙަމަލާ ދީފައިވާކަމަށް ދައުލަތުން ބުނެއެވެ،
އެ ދައުވާއަށް އޭނާ އިންކާރު ކޮށްފައިވާއިރު، މި މައްސަލައިގައި ބުދަ ދުވަހު ކްރިމިނަލް ކޯޓުން ކުރި ޙުކުމުގައި ބުނެފައިވަނީ، އޭނާ ޙާދިސާ ހިނގި ވަގުތު އެތަނުގައި ހުރުން ފިޔަވައި އިތުރަށް ކުށުގެ އަމަލާ އޭނާ އާއި ގުޅުވާލެވޭ ގޮތެއް ދައުލަތަށް ސާބިތު ކޮށްދެވިފައިނުވާކަމަށެވެ. އެގޮތުން ވަޅިން ނެގުނު ޑީއެންއޭ އާއި މަހުބޫބުގެ ޑީއެންއޭ ދިމާވި ނަމަވެސް، ދައުވާ ލިބޭ ފަރާތުގެ ޑީއެންއޭ ޕްރޮފައިލް އެއިން ފެނުނު ކަމަށް ޑީއެންއޭ ތަހުލީލު ރިޕޯޓުން އެނގެން ނެތްކަމަށް ޙުކުމުގައި ބަޔާންކޮށްފައިވެއެވެ.
އަދި ދައުލަތުން ހިފާފައިވާ ކިތާބީ ހެކިތަކަށް ބަލާއިރުވެސް ރޮބެލް އާއި ގުޅުވާލެވޭ އެއްވެސް ކަމެއް ފެންނަން ނެތްކަން ޙުކުމުގައި ބަޔާންކޮށްފައިވެއެވެ. ހަމައެއާއެކު، ކުށުގެ އަމަލާ ގުޅުންހުރި އެއްވެސް ތަނަކުންވެސް އަދި އެއްޗަކުންވެސް ދައުވާ ލިބޭ ފަރާތާއި ގުޅޭ އެއްވެސް ފޮރެންސިކް ހެއްކެއް ހުށައެޅިފައި ނުވާކަމަށް ވަނީ ބަޔާންކޮށްފައެވެ.
އޭގެ އިތުރުން، އޭނާ ފިލައިގެން ދިޔައިރު ލައިގެން ހުރިކަމަށް ހެކިން ބުނެފައިވާ, ލޭ ހޭކިފައިވާ ހުދުކުލައިގެ ޓީޝާރޓުވެސް ފުލުހުންނަށް ހޯދިފައެއް ނުވެއެވެ.
ކްރިމިނަލް ކޯޓުގައި މި މައްސަލަ ބެއްލެވީ ގާޒީ ހުސައިން ފާއިޒް ރަޝާދެވެ.
