ޕައިސިސް އަޕްގްރޭޑް ކުރުމަށް އެމެރިކާގެ ތަޖުރިބާކާރުން މާރޗު މަހު ރާއްޖެއަށް އަންނާނެ
އެކަށީގެންވާ ނިޒާމެއްގެ ތެރެއިން މި މަސައްކަތް ކުރުމަށް މަސައްކަތްތަކެއް ކުރެވޭނެ
ރަސްމީ ލިޔެކިޔުން ނެތް ބިދޭސީ މަސައްކަތްތެރިންގެ މައްސަލަ އާއި ގުޅޭގޮތުން، ރައްޔިތުންގެ މަޖިލީހުގެ ޚާރިޖީ ގުޅުންތަކުގެ ކޮމިޓީން ކަމާއި ގުޅުންހުރި އިދާރާތަކާއި ބައްދަލުކުރެއްވުން
ރާއްޖޭގެ އިމިގްރޭޝަންގައި ބޭނުންކުރާ ޕަރސަނަލް އައިޑިންޓިފިކޭޝަން ސެކުއަރ އެންޑް އިވެލުއޭޝަން ސިސްޓަމް (ޕައިސިސް) އާއި ގުޅުން ހުރި ތަޖުރިބާކާރުން މާރޗު މަހު އެމެރިކާއިން ރާއްޖެއަށް އަންނާނެ ކަމަށް މޯލްޑިވްސް އިމިގްރޭޝަނުން ބުނެފިއެވެ.
ރަސްމީ ލިޔެކިޔުން ނެތް ބިދޭސީ މަސައްކަތްތެރިންގެ މައްސަލަ އާއި ގުޅޭގޮތުން، ރައްޔިތުންގެ މަޖިލީހުގެ ޚާރިޖީ ގުޅުންތަކުގެ ކޮމިޓީން ބުދަ ދުވަހު ވަނީ މިނިސްޓްރީ އޮފް ފޮރިން އެފެއާޒް، މޯލްޑިވްސް އިމިގްރޭޝަން އަދި މިނިސްޓްރީ އޮފް އިކޮނޮމިކް ޑިވެލޮޕްމަންޓްގެ ބޭފުޅުންނާއި ބައްދަލުކުރައްވާފައެވެ.
މި ބައްދަލުކުރެއްވުމުގައި ވާހަކަދައްކަވަމުން އިމިގްރޭޝަން ކޮންޓްރޯލަރ މުޙައްމަދު އަހުމަދު (ހަނަފީ) ވިދާޅުވީ، ރާއްޖޭގެ އިމިގްރޭޝަންގައި ބޭނުންކުރާ ޕަރސަނަލް އައިޑިންޓިފިކޭޝަން ސެކުއަރ އެންޑް އިވެލުއޭޝަން ސިސްޓަމް (ޕައިސިސް) އާއި ގުޅުންހުރި ތަޖުރިބާކާރުން މާރޗު މަހު އެމެރިކާއިން ރާއްޖެއަށް އަންނާނެ ކަމަށެވެ. އެހިސާބުން އެކަށީގެންވާ ނިޒާމެއްގެ ތެރެއިން މި މަސައްކަތް ކުރުމަށް މަސައްކަތްތަކެއް ކުރެވޭނެކަމަށް އޭނާ ވިދާޅުވިއެވެ.
ހަނަފީ ވިދާޅުވީ، ކުރިން ބޯޑަރު ބެލެހެއްޓުމާއި ބިދޭސީންނާއި ގުޅުންހުރި މަސައްކަތްތައް ކުރަމުންދިޔައީ ވަރަށް ކުރީގެ ސިސްޓަމެއްގެ މައްޗަށް ކަމަށެވެ. އެގޮތުން ބިދޭސީންގެ މައުލޫމާތުތައް މެނުއަލްކޮށް ކުރުމުގެ ބަދަލުގައި މިހާރު އެކުލަވާލާ ސިސްޓަމުގެ ސަބަބުން ފަސޭހައިން ކަންކަން މެނޭޖް ކުރެވޭކަމަށް ވިދާޅުވިއެވެ. އެގޮތުން ޕައިސިސް ސިސްޓަމް އިތުރަށް ފުރިހަމަވުމުން، ބިދޭސީންގެ ވޯކްވިސާ އާއި ޤަވާއިދާއި ޚިލާފަށް އުޅޭ ބިދޭސީންނާއި ގުޅޭ މައުލޫމާތުތައް ވަގުތުން ބަލާލެވޭނެކަމަށް ވިދާޅުވިއެވެ.
ޕައިސިސް ސިސްޓަމަކީ ގައުމުތަކަށް އެތެރެވެ ބޭރުވާ މީހުންގެ މައުލޫމާތު ހޯދުމަށް ބޭނުންކުރާ ސިސްޓަމެކެވެ. އެ ސިސްޓަމް މެދުވެރިކޮށް އެތެރެވާ މީހާގެ ޕާސްޕޯޓަކީ ސައްހަ ޕާސްޕޯޓެއް ކަމާއި، ރެޑް ނޯޓިސް ނެރެފައިވާ މީހެއްތޯ އާއި ކުށުގެ ރެކޯޑަށް ބަލައި، އެ މީހަކީ ނުރައްކާ ތެރި މީހެއްކަން ދެނެގަނެވޭނެއެވެ.
އެމެރިކާގެ ބޫޒް އެލެން ހެމިލްޓަނުން ފަރުމާކޮށްފައިވާ ޕައިސިސް ސިސްޓަމް މެދުވެރިކޮށް ގައުމުތަކަށް ހަމަލާދޭން މަސައްކަތް ކޮށްފައިވާ ބައެއް މީހުންގެ މައުލޫމާތު ދެނެގަނެފައިވާ ކަމަށް އެމެރިކާގެ ސްޓޭޓް ޑިޕާޓްމެންޓުން ބުނެއެވެ.
އެމެރިކާ ސަރުކާރުން ހަދިޔާ ކޮށްފައިވާ ޕައިސިސް ސިސްޓަމް ރާއްޖޭގައި ބޭނުން ކުރަމުންދާތާ އަހަރުތަކެއް ވެއްޖެއެވެ. ނަމަވެސް މި ސަރުކާރު އައި އިރު އެ ސިސްޓަމް އޮތީ ވަރަށް ބޮޑަށް އައުޓް ޑޭޓެޑް ވެފައިކަމަށް ޓެކްނޮލޮޖީ މިނިސްޓްރީން ވަނީ ބުނެފައެވެ. އެގޮތުން ސޮފްޓްވެއާގެ އިތުރުން ހާޑްވެއާއަށް ވެސް ގިނަ މައްސަލަތަކެއް ކުރިމަތިވެފައިވާކަން މިނިސްޓްރީން ފާހަގަކުރެއެވެ.
އެކަމަށް ހައްލެއް ގެނައުމުގެ ގޮތުން އެމެރިކާ އިން ފަސް ބޭފުޅުންގެ ޓީމެއް ވަޑައިގެން އެ ސިސްޓަމަށް ބޭނުންވާ ސްފޮޓްވެއާ އާއި ހާޑްވެއާ މީގެ ކުރިން ވަނީ ފޯރުކޮށްދީފައެވެ.
ރާއްޖެގައި މިހާރު ބޭނުން ކުރަމުންދާ ޕައިސިސް ސިސްޓަމަކީ ކުރީގެ ރައީސް މުހައްމަދު ވަހީދުގެ ސަރުކާރުގައި އެމެރިކާ އިން ހަދިޔާކުރި ސިސްޓަމެކެވެ. އޭގެ ފަހުން އެ ސިސްޓަމް އަޕްގްރޭޑް ކޮށްފައި މިވަނީ ފަސް އަހަރު ފަހުންނެވެ.
