ރާއްޖޭގައި ޑިޖިޓަލް އައިޑެންޓިޓީ ނިޒާމެއް ޤާއިމުކުރުމަށް ވަޒީރުންގެ މަޖިލީހުގެ މަޝްވަރާއާއެކު ރައީސުލްޖުމްހޫރިއްޔާ މިހަފުތާގެ ތެރޭގައި ވަނީ ނިންމަވާފައެވެ. މިކަމަކީ މިގައުމަށް މިހާރު އެންމެ ބޭނުންތެރި ފައިދާހުރި ކަންކަމުގެ ތެރެއިން ކަމެެކެވެ. ޓެކްނޮލޮޖީގެ މުޅިން އައު އުސްމިންތަަކަކަށް ރާއްޖެ ވާސިލުވާނެ ކަމެކެވެ.

ޑިޖިޓަލް އައިޑެންޓިޓީ ޕްރޮޖެކްޓުގެ ތެރެއިން ހާސިލްވާނެ ކަންކަމުގެ ތެރޭގައި ޑިޖިޓަލް އައިޑެންޓިޓީ ޕްލެޓްފޯމެއް ގާއިމުކުރުމާއި ސްމާޓް ފޯނުތަކުގައި ބޭނުންކުރެވޭ ޑިޖިޓަލް އައިޑެންޓިޓީ އެޕްލިކޭޝަނެއް ތައާރަފުވުމާއި ބަޔޯމެޓްރިކް އައިޑެންޓިޓީގެ ނިޒާމެއް ގާއިމުވުމާއި ކޮންޓެކްޓްލެސް ސްމާޓް އައިޑެންޓިޓީ ކާޑެއް ތައާރަފުކުރުން ހިމެނެއެވެ.

އެންމެކުރީ ޒަމާނުއްސުރެ ނުވަތަ މީގެ އެތައްސަތޭކަ އަހަރެއް ކުރީއްސުރެ ވާރު ނެގުމުގެ ބޭނުމަށް ރާއްޖޭގެ ރަށްރަށުގެ މީހުންގެ އަދަދާއި ގޯތިގެދޮރުގެ ހިސާބުކިތާބު ލާމަރުކަޒީ ނިޒާމުން ބަލަހައްޓާފައިވެއެވެ. މީގެ 111 އަހަރު ކުރިން 1911 ވަނަ އަހަރު ރާއްޖޭގެ ފުރަތަމަ ބޯހިމެނުމުގެ ތަފާސްހިސާބުތަކަށް ބަލާއިރު އޭރު ރާއްޖޭގެ އާބާދީއަކީ 72،237 (ހަތްދިހަދެހާސް، ދުއިސައްތަ ތިރީސްހަތެއް) މީހުންނެވެ.

ދެވަނަ ބޮޑު ހަނގުރާމައިގެ ދުވަސްވަރު 1939-1945ގައި ރާއްޖޭގައި ކާބޯތަކެތި ހަމަޖެއްސުމަށް ކޮންމެ ގެއަކަށް ކާޑެއް ދެވުނެވެ. އަދި އާބާދީގެ ނިސްބަތުން ކާބޯތަކެތީގެ ކަންކަން އިންތިޒާމު ކުރެވުނެވެ. ކަމާބެހޭ ސްޓޯރެއް ރާއްޖޭގެ ކޮންމެ ރަށެއްގައި ގާއިމު ކުރެވުނެވެ. ތައާރަފުކުރެވުނު ކާޑުގެ ސަބަބުން ކާބޯތަކެތި (ހަނޑޫ، ހަކުރު، ފުށް) ކާޑުގެ ބާވަތްތަކަށް ވިއެވެ. އަދި އިސްޓޯރު ކާޑުގެއަކަށްވިއެވެ. މިގޮތަށް ނަން ކިޔަން ފެށުނެވެ.

ވެރިރަށް މާލެއާއި ރާއްޖޭގެ ހުރިހާ ރަށެއްގައި ވިހާމަރުވާ އާއި އަދި މިނޫންވެސް އިދާރީ މުހިންމު ހިސާބުކިތާބު ދުވަހުން ދުވަހަށް ލިޔެ ބަލަހައްޓަން މުޅި ރާއްޖޭގައި ފެށުނީ 1 ޖަނަވަރީ 1959 ގައެވެ. އެއީ ރަށްރަށުގައި އިދާރާތައް ގާއިމުކުރެވި ރަށްރަށުގެ އިދާރީ ހިންގުން ހަރުދަނާވި ދުވަސްވަރެވެ.

ދިވެހިރާއްޖެ 26 ޖުލައި 1965 ގައި މިނިވަންވުމަށްފަހު ރާއްޖޭގެ އަމިއްލަ ޕާސްޕޯޓް ތައާރަފުވިއެވެ. ދިވެހި ރައްޔިތުންގެ އައިޑެންޓިޓީ ކާޑެއްގެ މުހިންމުކަން 1980 ގެ ތެރޭގައި ވަޒަންކުރެވި ސަރުކާރުން ކަމާބެހޭ އިދާރާއެއް 1 މޭ 1984 ގައި ގާއިމު ކުރެއްވިއެވެ. އެއީ އައިޑެންޓިޓީ ކާޑު ޔުނިޓް (މިހާރު ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން) އެވެ. އެޔުނިޓު ގާއިމުވުމާއެކު ދިވެހި ރައްޔިތުންނަށް އައިޑެންޓިޓީ ކާޑު ހަދަން ފެށުނެވެ. ފުރަތަމަ އާދައިގެ ކާޑެކެވެ. 1993 ގެ ފަހުން މިހާރުގެ ގޮތަަށް އައިޑެންޓިޓީ ކާޑު ޒަމާނީ ކުރެވުނެވެ.