ކޮވިޑް-19ގައި އިތުރު 2 މީހަކު ނިޔާވެއްޖެ
23 ފެބުރުއަރީ 2022 | ބުދަ 17:54ބުދަ ދުވަހު ނިޔާވީ 97 އަހަރުގެ އަންހެނަކާއި 81 އަހަރުގެ ފިރިހެނެއް
ކޮވިޑްގައި ނިޔާވި މީހެއްގެ ޖަނާޒާގެ ކަންކަން ކުރިއަށްގެންދަނީ
ކޮވިޑް-19ށް ފަރުވާ ހޯދަމުން ދިޔަ ދެ މީހަކު ބުދަ ދުވަހު ނިޔާވެފައިވާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.
އެޗްޕީއޭއިން ބުނީ ކޮވިޑް-19ށް ފަރުވާ ހޯދަމުން ދިޔަ 97 އަހަރުގެ އަންހެނެއް ނިޔާވެފައިވާ ކަމަށާއި، އޭނާ ފަރުވާ ހޯދަމުން ގެންދިޔައީ އައްޑޫ ކޮވިޑް މެނޭޖްމެންޓް ފެސިލިޓީގައި ކަމަށެވެ. އެމީހާ ނިޔާވެފައިވަނީ ބުދަ ދުވަހުގެ ހަވީރު 5:15ގައެވެ.
މިއީ މިބަލީގައި ނިޔާވި 293 ވަނަ މީހާއެވެ.
މީގެ އިތުރުން އެޗްޕީއޭއިން ބުނީ ގދ. ކޮވިޑް މެނޭޖްމެންޓް ފެސިލިޓީގައި ފަރުވާ ހޯދަމުން ދިޔަ މީހަކު ވެސް ބުދަ ދުވަހު ނިޔާވެފައިވާ ކަމަށެވެ. އެއީ 81 އަހަރުގެ ފިރިހެނެއް ކަމަށް އެޗްޕީއޭއިން ބުނެއެވެ.
މިއީ މިބަލީގައި ރާއްޖެއިން ނިޔާވި 294 ވަނަ މީހާއެވެ.
ރާއްޖޭގެ ކޮވިޑް-19ގެ ހާލަތަށް ބަލާއިރު، މި ފެބްރުއަރީ މަހުގެ މެދުތެރެއިން ފެށިގެން ކޭސްތައް ރިޕޯޓު ކުރެވޭ މިންވަރު ވަނީ ވަރަށް ބޮޑަށް ދަށްވެފައެވެ. އަދި މިހާރު މާލެ ސިޓީގެ ޕޮޒިޓިވްޓީ ރޭޓް ވެސް ހުރީ 5 އިންސައްތާގައެވެ.
