ކުދި އަދި މެދުފަންތީ ވިޔަފާރިތައް ގިންތި ކުރުމަށް ގާނޫނަށް ހުށަހެޅި އިސްލާހުގެ ބިލް ދިރާސާކުރުމަށް އިގްތިޞާދީ ކޮމިޓީއަށް ފޮނުވައިފިއެވެ.
ސަރުކާރުގެ ފަރާތުން ކުދި އަދި މެދުފަންތީގެ ގާނޫނަށް އިސްލާހު ގެނައުމުގެ ބިލް ހުށަހަޅުއްވާފައިވަނީ މިލަންދޫ ދާއިރާގެ މެމްބަރ އަލީ ރިޒާއެވެ. މިބިލް ބަލައިގަތުމަށް ނެގުނު ވޯޓުގައި ބައިވެރިވެރިވަޑައިގެންނެވި 40 މެމްބަރުންގެ އިއްތިފާގުން ވަނީ ބިލް މަޖިލީހަށް ބަލައިގަތުމަށް ފާސްވެފައެވެ.
މިބިލު ހުށަހަޅުއްވަމުން ރިޒާ ވިދާޅުވީ ބިލުގެ އެންމެ ބޮޑު ބޭނުމަކީ ކުދި އަދި މެދުފަންތީގެ ވިޔަފާރިވެރިންނަށް ފަސޭހަ ގޮތްތަކެއް ފަހި ކޮށްދިނުން ކަމަށެވެ.
ކުދި އަދި މެދު ފަންތީގެ ވިޔަފާރިތައް ހަރުދަނާކުރުމުގެ ގޮތުން އެފަދަ ވިޔަފާރިތައް ގިންތިކުރުމުގައި ރިއާޔަތް ކުރާ މައުލޫމާތުތަކުގެ ތެރޭގައި މޯލްޑިވްސް ޕެންޝަން އެޑްމިނިސްޓްރޭޝަން އޮފީހުން ބަލަހައްޓާ މައުލޫމާތުތައް ހިމެނުން ކަމަށް ބިލުގައި ބުނެފައިވެއެވެ. އަދި އަލަށް ރަޖިސްޓްރީކުރާ ވިޔަފާރިތައް ރަޖިސްޓްރީކުރެވޭ ތާރިޚުން ފެށިގެން ގިންތިކުރުމުގައި އަމަލުކުރާނެ އުސޫލުތައް ބަޔާންކުރުމަކީވެސް އިސްލާހުގެ ބޭނުމެކެވެ.
ވަޒީފާ އާއި ބެހޭ ގާނޫނުގެ ދަށުން އެންމެ ކުޑަމިނުން ދޭން ޖެހޭ އުޖޫރަ ކަނޑައެޅުމުގައި އެފަދަ ވިޔަފާރިތަކަށް ނިސްބަތްކޮށް ވަކިވަކި އަދަދުތައް ކަނޑައެޅިފައިވާތީ ކުދި އަދި މެދު ފަންތީގެ ވިޔަފާރިތައް ގިންތިކުރުމުގައި ގާނޫނުގައި ބަޔާން ކުރާ އުސޫލުތައް އިތުރަށް ހަރުދަނާކޮށް ފުރިހަމަކޮށް އެންމެ ކުޑަ އުޖޫރަ ދިނުމަށް އަމަަލުކުރަން ފަށާ ތާރީޚާ ހަމައަށް ރާއްޖޭގައި ހަރަކާތްތެރިވާ ހުރިހާ ވިޔަފާރިތަކެއް ގިންތިކުރުމަކީވެސް ބިލު ހުށަހެޅުއްވުމުގެ ބޭނުމެއް ކަމަށް ރިޒާ ވިދާޅުވިއެވެ.
