މޯލްޑިވްސް ކަރެކްޝަނަލް ސަރވިސް (އެމްސީއެސް) ގެ ބެލުމުގެ ދަށުގައިވާ ޤައިދީންނާއި ބަންދުގައި ތިބޭ މީހުން ސްޕެޝަލިސްޓުން މެދުވެރިކޮށް ބޭސްފަރުވާ ފޯރުކޮށްދިނުމުގެ އިންތިޒާމް ހަމަޖެއްސުމާއި ބެހޭ ގޮތުން އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އާއެކެ ފަހުމުނާމާއެއްގައި ސޮއިކޮށްފިއެވެ.

ބުދަ ދުވަހު އޮތް ޚާއްސަ ރަސްމިއްޔާތެއްގައި މި ފަހުމުނާމާގައި އެމްސީއެސްގެ ފަރާތުން  ސޮއިކުރެއްވީ ކޮމިޝަނަރ އޮފް ޕްރިޒަންސް އަޙްމަދު މުޙައްމަދުފުޅުއެވެ. އަދި އައިޖީއެމްއެޗްގެ ފަރާތުން ސޮއިކުރެއްވީ ޗީފް އޮޕަރޭޓިންގ އޮފިސަރ އިބްރާހިމް ސަލީމްއެވެ. ކަރެކްޝަންސްއިން މައުލޫމާތު ދޭ ގޮތުގައި މި ފަހުމުނާމާގެ މުއްދަތަކީ 01 އަހަރެވެ.

ޤައިދީންނާއި ބަންދު މީހުންނަށް ސިއްޙީ ފަރުވާ ފޯރުކޮށްދިނުމުގެ ގޮތުން، އެ ފަރާތްތައް އެއްތަނުން އަނެއްތަނަށް އުފުލުމަކީ ތަކުލީފު އަދި ޚަރަދު ބޮޑު ކަމެއްކަން ފާހަގަކޮށް ކަރެކްޝަންސްއިން ބުނީ، މި ފަހުމުނާމާގައި ސޮއިކުރުމުގެ މަޤްޞަދަކީ ޤައިދީންނާއި ބަންދުގައި ތިބޭ މީހުންގެ ތެރެއިން ޢާންމު ނޫން ބަލިތަކަށާއި އުނދަގޫތަކަށް، އެ ކަމާއި ގުޅުން ހުރި ސްޕެލިސްޓުން މެދުވެރިކޮށް ޖަލުގައި ބައިތިއްބައިގެން ފަސޭހަކަމާއެކު ސިއްޙީ ފަރުވާ ފޯރުކޮށްދިނުން ކަމަށެވެ.

މި ފަހުމުނާމާގެ ދަށުން، ކުރުމުއްދަތަކަށް އައިޖީއެމްއެޗްގެ ފަރާތުން ޖަލުތަކަށް ސުޕަރ ސްޕެޝަލިސްޓުންނާއި، ސްޕެޝަލިސްޓުންނާއި، ނަރުހުންގެ އިތުރުން އެހެނިހެން ޓެކްނިކަލް މުވައްޒަފުން ފޮނުވައި، މަދުވެގެން ފަހަރަކު 20 މީހުންނަށް ސިއްޙީ ޚިދުމަތް ފޯރުކޮށްދެވޭނެކަންވެސް ކަރެކްޝަންސްއިން ފާހަގަކުރެއެވެ. ވުމާއެކު، މިފަދަ އިންތިޒާމްއެއް ހަމަޖެހިގެން ދިއުމަކީ ޤައިދީންނާއި ބަންދުގައި ތިބޭ މީހުންނަށް ބޭސް ފަރުވާ ފޯރުކޮށްދިނުމަށް ލިބޭ ވަރަށް ބޮޑު ލުއިފަސޭހައެއްކަމަށް އެ އިދާރާއިން ބުނެއެވެ،

ކޮވިޑް-19 ގެ މި ޙާލަތުގައި އެމްސީއެސްގެ އަމާޒަކީ ޤައިދީންނާއި ބަންދުގައި ތިބޭ މީހުންނަށް ވީހާވެސް ރައްކާތެރިކަމާއެކު ބޭސް ފަރުވާ ފޯރުކޮށްދިނުންކަމަށް އެމްސީއެސްއިން ވަނީ ބުނެފައެވެ.

ޤައިދީންނާއި ބަންދުގައި ތިބޭ މީހުންނަށް އެކަށީގެންވާ ބޭސްފަރުވާ ނުލިބޭކަމަށް ބުނެ ގިނަ ޝަކުވާތަކެއް އަބަދުވެސް ފެންމަތިވެއެވެ. އެފަދަ މައްސަލަތަކުގައި ބައެއް ފަހަރު ކޯޓުތަކުން މީހުން ބަންދުން ދޫކޮށްލާފައިވެސް ވެއެވެ. އެގޮތުން ބޭސްފަރުވާގެ ކަންކަމުގައި ގޮންޖެހުންތަކެއް ހުރުމުން، ކެނެބިސް ޓްރެފިކް ކުރުމުގެ ދައުވާ އުފުލާފައިވާ މީހެއްވެސް ދާދި ފަހުން ވަނީ ބަންދުން ދޫކޮށްލާފައެވެ. ހަމައެއާއެކު، މައްސަލައެއްގައި ބަލި ޙާލަތާއި ގުޅޭގޮތުން އެކަށީގެންވާ ފަރުވާ ނުލިބޭނަމަ، އަދި އެކަންކަމުގައި އިހުމާލުވާނަމަ، ކިތަންމެ ބޮޑު މައްސަލައެއް ނަމަވެސް ފަސްޖެހިވަޑައިގަތުމެއް ނެތި ދޫކޮށްލައްވާނެ ކަމަށް ދާދި ފަހުން އޮތް އަޑުއެހުމެއްގައިވެސް މައްސަލަ ބައްލަވާ ގާޒީއަކު ވިދާޅުވެފައިވެއެވެ.