ޖޭއެސްސީ އެކުލެވިގެންވާ ގޮތް ބަދަލުކުރުމަށް ތާރިގު ހުށަހެޅުއްވި އިސްލާހުގެ ބިލް ތަޅުމުން ބޭރު
ބިލް މަޖިލީހަށް ބަލައިގަންނަން ފެންނަކަަމަށް ވޯޓު ދެއްވީ 11 މެމްބަރުން
މަހިބަދޫ ދާއިރާގެ ޕީޕީއެމް މެމްބަރު އަހުމަދު ތޯރިގް
ޖޭއެސްސީގެ މެމްބަރުންގެ 5 އަހަރުގެ މުއްދަތު 3 އަހަރަށް ބަދަލު ކުރެއްވުމަށް ގާނޫނުއަސާސީއަށް މަހިބަދޫ ދާއިރާގެ ޕީޕީއެމް މެމްބަރު އަހުމަދު ތޯރިގް (ޓޮމް) ހުށަހެޅުއްވި އިސްލާހުގެ ބިލް މަޖިލީހަށް ބަލައިގަންނަން ނުފެންނަކަމަށް ފާސްކޮށް ތަޅުމުން ބޭރުކޮށްލައިފިއެވެ.
މިބިލް މަޖިލީހަށް ބަލައިގަންނަން ފެނޭތޯ ނެގުނު ވޯޓުގައި ބިލް މަޖިލީހަށް ބަލައިގަންނަން ފެންނަކަަމަށް ވޯޓު ދެއްވީ 11 މެމްބަރުންނެވެ. ބިލް މަޖިލީހަށް ބަލައިގަންނަން ނުފެންނަކަމަށް 46 މެމްބަރުން ވޯޓު ދެއްވިއިރު ވަކި ގޮތަކަށް ވޯޓު ނުދެއްވާ 1 މެމްބަރަކު އިންނެވިއެވެ.
ޖޭއެސްސީ އެކުލަވާލާފައިވާ ގޮތް ބަދަލުކުރުމަށް ހުށައެޅުއްވި މި ބިލުގައި ވަނީ މިހާރު ޖޭއެސްސީ އެކުލަވާލާފައިވާ ގޮތުން ގާނޫނު އަސާސީގެ ހަވަނަ ބާބުން އިންސާފު ގާއިމުކުރުމުގެ ބާރަށް ލިބިދޭ މިނިވަންކަމާއި މުސްތަގިއްލު ކަމަށް ހުރަސް އެޅެމުންދާކަމަށް ބަޔާން ކުރައްވާފައެވެ. މި ބިލު ކުރިންވެސް މަޖިލީހަށް ހުށައެޅުއްވިއެވެ. އެފަހަރުވެސް މިބިލް ވަނީ ތަޅުމުން ބޭރުކޮށްލާފައެވެ.
މި ބިލުގައި ބަޔާންކޮށްފައިވަނީ ޖޭއެސްސީ އެކުލަވާލުމުގައި ގާނޫނު ހެދުމުގެ ބާރާއި، ވެރިކަން ހިންގުމުގެ ބާރުގެ ފަރާތުން ތަމްސީލުކުރާ ފަރާތްތަކަކީ ސިޔާސީ ފަރާތްތަކަށް ވުމުގެ ސަބަބުން، އެފަރާތްތަކުން ބައިވެރިވެގެން އެ ކޮމިޝަނުން ބަލާ މައްސަލަތަކުގަޔާއި އަދި ނިންމާ ނިންމުންތަކުގައި ސިޔާސީ ނުރަނގަޅު ނުފޫޒާއި ބާރު އެކުލެވިގެންދާ ކަމަށެވެ.
ތޯރިޤު ހުށައެޅުއްވި ބިލުގައި ވަނީ ޖޭއެސްސީއަށް މެމްބަރުން އިންތިޚާބު ކޮށްގެން ހޮވުމަށް ފެންނަކަމަށް ބަޔާން ކުރައްވާފައެވެ. އެގޮތުން އިސްލާހުގައި ވަނީ ރައްޔިތުންގެ މަޖިލީހުގެ ރައީސްއާއި މަޖިލީހުގެ މެމްބަރާއި ސީއެސްސީގެ ރައީސްގެ އިތުރުން ބަންޑާރަ ނައިބު އެ ކޮމިޝަނުން އުނިކުރުމަށެވެ. އޭގެ ބަދަލުގައި ހުށައަޅުއްވާފައިވަނީ އުއްތަމަ ފަނޑިޔާރާއި ފަނޑިޔާރުންގެ ތެރެއިން ޝަރަފުވެރިކަމާއެކު މުސްކުޅިކޮށްފައިވާ ފަނޑިޔާރުންގެ ތެރެއިން އިންތިހާބު ކުރާ ފަނޑިޔާރަކާއި ގާނޫނީ ވަކީލުންގެ ތެރެއިން އިންތިހާބު ކުރެވޭ އަންހެން ވަކީލެއްގެ އިތުރުން ރާއްޖޭގެ ޔުނިވަރސިޓީތަކުގައި އިސްލާމީ ޝަރީއަތުގެ އިލްމު ކިޔަވާދޭ ދާރިސުންގެ ތެރެއިން އިންތިހާބު ކުރާ ދާރިސެއް ކޮމިޝަނުގައި ތިއްބަވާ ގޮތަށް ހިމެނުމަށެވެ.
ބިލުގެ ބަހުސް މަރުހަލާގައި އެމްޑީޕީ މެމްބަރުން ވަނީ ގާނޫނު އަސާސީއަށް ގެންނަ މިފަދަ އިސްލާހުތަކާމެދު ފުންކޮށް ވިސްނާ ދިރާސާތައް ކުރެވެންޖެހޭކަމަށް ވިދާޅުވެފައެވެ. އަދި ޖޭއެސްސީ އެކުލެވިގެންވާ ގޮތް ބަދަލުކުރުމަކީ މިސަރުކާރުގެ ވައުދަކަށްވާއިރު އެކަން ކުރާނެކަމަށް ވަނީ ވިދާޅުވެފައެވެ.
ބަހުސް މަރުހަލާގައި އިދިކޮޅު މެމްބަރުން ވިދާޅުވަމުން ގެންދެވީ ޖޭއެސްސީއަށް މިބަދަލުތައް ވީއެންމެ އަވަހަށް ގެންނަން ޖެހޭކަމަށެވެ.
