ޕީސީބީގެ ރައީސްކަމަށް އާސިމް އައްޔަނުކުރުމަށް މަޖިލީހުން ރުހުން ދީފި

ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުގެ ރައީސަކަށް ގ.މެޒަރިން، އާސިމް މުހައްމަދު އައްޔަނުކުރުމަށް ރައްޔިތުންގެ މަޖިލީހުން ރުހުން ދީފިއެވެ.

އާސިމަށް ރުހުން ލިބުނީ ވޯޓުގައި ބައިވެރިވެވަޑައިގެންނެވި 55 މެމްބަރުންގެ އިއްތިފާގުންނެވެ.

ރުހުން ހޯއްދެވުމަށް ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުއްވި މައްސަލަ ދިރާސާ ކުރީ ސްޓޭޓް އޯންޑް އެންޓަރޕްރައިޒަސް ކޮމިޓީންނެވެ. ކޮމިޓީގައި ތިއްބެވި 11 މެމްބަރުންގެ ތެރެއިން 10 މެމްބަރުންވަނީ އާސިމަށް ރުހުންދޭން ފެންނަ ކަމަށް ވޯޓުދެއްވާފައެވެ.

ޕްރައިވެޓައިޒޭޝަން ބޯޑުގެ ރައީސްކަމަށް އާސިމް އައްޔަންކުރައްވާފައިވަނީ މިދިޔަ ޑިސެމްބަރު މަހުގެ 15 ވަނަ ދުވަހުއެވެ. ކުރިން އާސިމް ހުންނެވީ އެ ބޯޑުގެ ނާއިބު ރައީސް ކަމުގެ މަގާމުގައެވެ.

ޕްރައިވެޓައިޒޭޝަން ބޯޑުގައި އާސިމްގެ އިތުރުން ދެން ތިއްބެވި މެންބަރުންނަކީ އައިޝަތު ޝާޒްލީ އާއި، އަލީ ޝަފީއު އާއި، އަހްމަދު ޝަރީފް ޔޫސުފް އާއި، ރުޝާހާ އަހަމްދު ޝަރީފްގެ އިތުރުން އަލީ ސުޖާއުއެވެ.

ކޮމިޓީއަށް މި މައްސަަލަ ފޮނުއްވިކަން އިއުލާން ކުރައްވަމުން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވީ، ދައުލަތުގެ ކުންފުނިތައް ޕްރައިވެޓައިޒް ކޮށްގެން 771 މިލިއަން ރުފިޔާ ހޯދުމަށް ދައުލަތުގެ މިއަހަރު ބަޖެޓުގައި ހިމަނާފައިވާ ކަމަށެވެ.