ލޯބިވެރިންގެ އަތުން 10 މިލިއަނަށްވުރެ ގިނަ ޑޮލަރު ހޯދި ސައިމަން

މުޅި ދުނިޔޭގައި ވެސް މަކަރާއި ހީލަތުން ފައިސާއާއި މުދާ ފޭރޭ މައްސަލަ ބޮޑެވެ. އެކި އުކުޅުތައް ބޭނުން ކޮށްގެން ވައްކަން ކުރާއިރު، ސޯޝަލް މީޑީއާގެ އެކި ފްލެޓްފޯމްތަކުން ދިމާވާ މީހުން ޝިކާރަކޮށް، އެމީހުންގެ އަތުން ފޭރިފައިވާ މައްސަލަ ވެސް މަދެއް ނުވާނެއެވެ. މާރާމާރީ ހިންގައިގެންނާއި ގެތަކާއި އަދި ވެސް އެހެނިހެން އެކި ވިޔަފާރިތަކުން ވަގަށް ބޮޑެތި އަދަދުތަކުން ފައިސާ ނަގައެވެ. ނަމަވެސް ލޯބި ދީގެން، ލޯތްބާއެކު ފައިސާ ފޭރޭ ވާހަކަ އަޑު އަހަނީ މަދު ފަހަރެއްގައެވެ. ހުރިހާ މަންޒަރެއް ލޯ ކުރިމަތިން ހިނގަމުންދާއިރު، އެއީ މަކަރުވެރި މީހެއްކަމެއް ކުޑަކޮށް ވެސް އިހުސާސް ނުވަނީއެވެ. އެގޮތަށް ލޯބިވެރިންނާއެކު ދިރިއުޅެމުން ފައިސާ ފޭރުނު ކަމަށް މިހާރު މުޅި ދުނިޔޭގެ ސަމާލުކަން ލިބިފައިވާ އެކަކަކީ އިސްރާއީލްގެ ރައްޔިތެއް ކަމަށްވާ ސައިމަން ލެވީވްއެވެ.

ސައިމަން މި ޚިޔާނާތް ހިންގާފައިވަނީ ވަރަށް "ސްމާރޓް"ކޮށޭ ވެސް ބުނެވިދާނެއެވެ. ސައިމަންގެ ހުރިހާ ސޯޝަލް މީޑިއާ އެކައުންޓަކުން އޭނާއަކީ ވަރަށް މުއްސަނދި މީހެއް ކަމަށް ދައްކުވައިދީފައިވެއެވެ. ބިލިއަނަރެއްގެ ދަރިއެއް ކަމަށް ބުނެ އިންސްޓަގްރާމްގައި އާއިލާގެ ފޮޓޯ އާއްމުކޮށްފައިވެއެވެ. ކޮންމެ ދުވަހެއްގެ ދިރިއުޅުން އޭނާގެ ސްޓޯރީން ފެންނަން ހުރެއެވެ. ސައިމަންގެ މުއްސަނދި މި ދިރިއުޅުމަށް ގިނަ ބައެއްގެ ލޯތައް އަމާޒުވަމުންދާއިރު، ޓިންޑަރއިން ވެސް ގިނަ ބަޔަކު އޭނާ ހޯދަން މަސައްކަތް ކޮށްފައިވެއެވެ. ސަބަބެއް ވެސް ނެތިއެއް ނޫނެއެވެ.

ސައިމަން ޑޭޓް ކުރާ ކޮންމެ އަންހެނެއް ގާތަށް ވެސް ޕްރައިވެޓް ޖެޓްގައި އެ އަންހެނެއް ހުރި ހިސާބަށް ގޮސް އެމީހަކާ ބައްދަލު ކުރެއެވެ. އޭނާގެ ލަގްޒަރީ ދިރިއުޅުން އެ އަންހެނަކަށް ދައްކުވައިދެއެވެ. ގާތްގަނޑަކަށް ދެ ހަފުތާއެއްހާ ދުވަހު ވަރަށް ލޯބިން އުޅުމަށްފަހު ވިޔަފާރި ދަތުރެއްގައި ސައިމަން ފުރާނެއެވެ. އެހިސާބުން ކޮންމެވެސް ހާދިސާއެއް ނުވަތަ ކޮންމެވެސް ނުރައްކަލެއް ސައިމަންއަށް ކުރިމަތިވެއެވެ. މި ކަންތައްގަނޑުގައި އެހީއަށް އަންހެންމީހާ ގާތުގައި ބުނެއެވެ. ފަހުން ދޭގޮތަށް ކަމަށްބުނެ، އެ އަންހެން މީހާގެ އަތުން ބޮޑެތި އަދަދުތަކުން ޑޮލަރު ހޯދައެވެ. ޑޮލަރު ލިބޭ ހިސާބުން ސައިމަން ގެއްލެއެވެ. މިހާތަނަށް ބެލިބެލުމުން ސައިމަން ވަނީ ޓިންޑަރއިން ދިމާވި ގިނަ އަދަދެއްގެ އަންހެނުންގެ އަތުން, އޮޅުވާލައިގެން 10 މިލިއަނަށް ވުރެ ގިނަ އަދަދެއްގެ ޑޮލަރު ހޯދާފައެވެ.

ދުވަސްތައް މިހެން ފާއިތުވަމުން ގޮސް މި ޚިޔާނާތް ފަޅާއަރުވާލާފައިވަނީ ސައިމަންގެ ޝިކަރާއަކަށްވި ސެސެލީ ފިއެލްހޯއީ، ޕެނީލާ ސިއެހޮމް އަދި އައިލީން ޝާލެޓެވެ. އެމީހުން ނެޓްފްލިކްސްގައި އާއްމުކޮށްފައިވާ ޑޮކިއުމެންޓްރީއަށް އިންޓަވިޔު ދީފައިވާއިރު ބުނެފައިވަނީ, ސައިމަންއަކީ މުއްސަނދި މީހެއް ނޫން ކަމަށާއި، މުއްސަނދި ދިރިއުޅުން އުޅެފައިވަނީ އަންހެނުންގެ އަތުން ފައިސާ ހޯދައިގެން ކުޑަ ދުވަސް ކޮޅަކަށް ކަމަށެވެ. އަދި އެގޮތަށް ކަންތައް ކޮށްފައިވަނީ އަންހެނުން އޭނާގެ މަޅީގައި ޖެއްސުމުގެ ގޮތުން ކަަމަށެވެ.

ސައިމަންގެ މި ޚިޔާނާތުގެ މައްޗަށް ބިނާކޮށް، ނެޓްފްލިކްސްގައި ''ޓިންޑަރ ސްވިންޑްލަރ'' ޑޮކިއުމެންޓްރީ އާންމު ކުރުމާއެކު ގިނަ ބައެއްގެ ސަމާލުކަން ވަނީ ލިބިފައެވެ. ޑޮކިއުމެންޓްރީން ފެންނަ ގޮތުގައި ސައިމަން ލަނޑުދީފައިވާ އަންހެނުންގެ ހުރިހާ އެކައުންޓުން ވަނީ މައިނަސްވެފައެވެ. އަދިއެކަމާގުޅިގެން އެމީހުން ޑިޕްރެޝަނަށް ގޮސް، ހަދާނެ ގޮތް ހުސްވާ މަންޒަރު ދައްކުވައިދީފައިވެއެވެ.

ގިނަ ހެކިތަކާއެކު ޑޮކިއުމެންޓްރީ އާންމުކުރި ނަމަވެސް ސައިމަން ވަނީ އެކަން ދޮގުކޮށްފައެވެ. އެއީ ހަދާފައިވާ ފިލްމެއް ކަމަށް އޭނާ ބުނެފައިވެއެވެ. ނަމަވެސް 2019 ވަނަ އަހަރު, ވައްކަމާއި ކޮޕީ ރައިޓް މައްސަލާގައި ސައިމަން ވަނީ 15 މަހަށް ޖަލަށްލާފައެވެ. އަދި ޖަލުގައި އޭނާ ރަނގަޅު އަޚުލާގެއް ދެއްކުމުން, 5 މަސް ދުވަހުގެ ތެރޭގައި އޭނާ ވަނީ މިނިވަން ކޮށްފައެވެ. މިނިވަންވުމާއެކު އަނެއްކާ ވެސް އޭނާ ޓިންޑަރއަށް ޖޮއިންވިއެވެ. ނަމަވެސް ނެޓްފްލިކްސްގައި އާއްމުކޮށްފައިވާ ޑޮކިއުމެންޓްރީއާއެކު ޓިންޑަރއިން ވަނީ އޭނާގެ އައިޑީ ބްލޮކް ކޮށްފައެވެ.

މިނިވަންވެ، ޓިންޑަރއަށް ޖޮއިންވުމަކީ, އިތުރު އަންހެނުންތަކެއް އޭނާގެ ޝިކާރައަކަށްވެ ބިކަވާނެކަމެއްގެ ގޮތުގައި އޭނާއާ ދެކޮޅަށް އަޑު އުފުލާ މީހުން ބުނެފައިވެއެވެ. ނަމަވެސް އަނެއްބައި މީހުން އޭނާއާ އެއްކޮޅަށް ވެސް ދަނީ ވާހަކަ ދައްކަމުންނެވެ. އެކިއެކި ނަންނަމުގައި ފޭކް ޕާސްޕޯޓުތަކާއެކު, ސިފަ ބަދަލުކޮށް އެކި ގައުމުތަކަށް ދަތުރުކުރުމަކީ ކޮންމެކޮންމެ މީހަކަށް ކުރެވޭނެ ކަމެއް ނޫން ކަމަށް ބުނެ، އެއީ ސްމާރޓް މީހެއްގެ ގޮތުގައި ވެސް ސިފަކޮށްފައިވެއެވެ. އަދި މިއީ އިބުރަތެއްކަމަށް ބަލައި, ކުރިއަށް އޮތްތަނުގައި އިތުރަށް އެހެންމީހުން ސަމާލުވެ، ސްމާރޓްވުމަށް ވެސް ބައެއް މީހުން އިރުޝާދުދީފައިވެއެވެ.