ދުނިޔޭގެ ވިޔަފާރީގެ ޖަމިއްޔާ ވޯލްޑް ޓްރޭޑް އޯގަނައިޒޭޝަން (ޑަބްލިއުޓީއޯ) ގެ ޕްރޮޓޮކޯލްއެއްގައި ބައިވެރިވުމަށް ރައްޔިތުންގެ މަޖިލީހުން ރުހުން ދީފިއެވެ.
މިމައްސަލަ ދިރާސާ ކުރި ޚާރިޖީ ގުޅުންތަކުގެ ކޮމިޓީން ނިންމާފައިވަނީ ވާރލްޑް ޓްރޭޑް އޮގަނައިޒޭޝަން (ޑަބްލިއު.ޓީ.އޯ)ގެ ޓްރޭޑް ރިލޭޓެޑް އެސްޕެކްޓްސް އޮފް އިންޓެލެކްޗުއަލް ޕްރޮޕަޓީ ރައިޓްސް (ޓްރިޕްސް)ގެ އެއްބަސްވުމަށް ބަދަލު ގެނައުމަށްޓަކައި އެކުލަވާލާފައިވާ "ޕްރޮޓޮކޯލް އެމެންޑިންގ ދަ ޓްރިޕްސް އެގްރިމެންޓް" ދިވެހި ރާއްޖެއިން ބަލައިގަނެ ތަސްދީގުކުރުމާމެދު ރައްޔިތުންގެ މަޖިލީހުގެ ރުހުން ދިނުމަށް ފެންނަކަމަށެވެ.
މިރިޕޯޓު ފާސްކުރުމަށް ނެގުނު ވޯޓުގައި ބައިވެރިވެވަޑައިގެންނެވި 54 މެމްބަރުންގެ އިއްތިފާގުން ވަނީ ރިޕޯޓް ފާސްވެފައެވެ.
ޤާނޫނު އަސާސީގެ 93 ވަނަ މާއްދާގައި ވަނީ ވެރިކަން ހިންގާ ފަރާތުން ބައިވެރިވާ ބައިނަލްއަޤުވާމީ މުއާހަދާތަކަށް އަމަލުކުރަންވާނީ ރައްޔިތުންގެ މަޖިލީހަށް ހުށަހަޅައި މަޖިލީހުން އެކަން ފާސް ކުރުމަށް ފަހުގައި ކަމަށެވެ.
ކޮމިޓީ ރިޕޯޓްގައި ފާހަގަކޮށްފައިވަނީ ޓްރިޕްސް އެއްބަސްވުމަކީ މެމްބަރު ގައުމުތަކުގެ ފިކުރީ މުދާ ރައްކާތެރިކޮށް ދިނުމާއި ގުޅޭ ބައިނަލްއަގްވާމީ މުހިންމު އެއްބަސްވުމެއްކަމަށެވެ. އަދި އެ އެއްބަސްވުމަކީ މެމްބަރު ގައުމުތަކުގައި އުފައްދާ އުފެއްދުންތަކާއި އީޖާދުތަކުގެ އަދި ގައުމުތަކުގެ އުފެއްދުންތެރިކަމަށް އަދި އިންވެސްޓްމަންޓްތަކަށް މިއެއްބަސްވުމުގެ ސަބަބުން ބާރު އެޅުމާއި މިފަދަ އުފެއްދުންތަކުގެ އިންޓެލިކްޗުއަލް ޕްރޮޕަޓީ ރައިޓްސް ކަންކަމުގައި ދިމާވާ މައްސަލަތަކުގައި ހައްލު ހޯދައިދިނުމާއި ގުޅޭ ބައިނަލްއަގްވާމީ އެއްބަސްވުމެކެވެ.
