މިދައުރު ނިމޭއިރު މިސަރަހައްދުގައި ރާއްޖެފިޔަވައި ފެނާއި ނަރުދަމާގެ ނިޒާމު ހުރިހާ ގެޔަކަށް ގުޅާލެވިފައިވާ ގައުމެއް ނޯންނާނެ: ސަލީމު

މިރިޔާސީ ދައުރު ނިމޭއިރު ދެކުނު އޭޝިޔާ ސަރަހައްދުގައި ހުރިހާ ގެޔަކަށް ޒަމާނީ ފެންވަރުގެ ތަހުޒީބީ މުޖުތަމައެއްގައި ބޭނުންކުރާ ފަދަ ފެނާއި ނަރުދަމާ ނިޒާމު ގޭގެއަށް ގުޅާދެވިފައިވާ ގައުމެއް ރާއްޖެ ފިޔަވައި ނޯންނާނެކަމަށް ހޯރަފުށީ ދާއިރާގެ މެމްބަރ އަހުމަދު ސަލީމް ވިދާޅުވެއްޖެއެވެ.

ހޯމަ ދުވަހު ކުރިޔަށްދިޔަ ރައްޔިތުންގެ މަޖިލީހުގެ ޖަލްސާގައި ފެނާއި ނަރުދަމާގެ ގާނޫނަށް ހުށަހަޅާފައިވާ އިސްލާހުގެ ބިލަށް ވާހަކަދައްކަވަމުން ވިދާޅުވީ ދިވެހިރާއްޖެއަަކީ މިސަރަހައްދުގައި ފެނާއި ނަރުދަމާއަށް ޚާއްސަކޮށް ގާނޫނެއް އެކުލަވައިލި ފުރަތަމަ ގައުމުކަމަށެވެ. ރާއްޖޭގައި ފެނާއި ނަރުދަމާގެ ގާނޫނެއް އެކުލަވާލާ އެގާނޫނަށް އަމަލުކުރަން ފަށާފައިވަނީ 19 ވަނަ ރައްޔިތުންގެ މަޖިލީހުގައި 2020 ވަނަ އަހަރުއެވެ.

ސަލީމް ވިދާޅުވީ އެގާނޫނުގެ ދަށުން ރައްޔިތުންނަށް ލުއިތަކެއް ލިބިގެން ހިނގައްޖެކަމަށެވެ.

މީގެއިތުރުން ސަލީމް ވިދާޅުވީ ފެނާއި ނަރުދަމާގެ ސަރުކާރުގެ ސިޔާސަތު ވަރަށް ސާފުކަމަށެވެ. އެއީ ފެނާއި ނަރުދަމާގެ ޚިދުމަތް އެންމެ ޒަމާނީ ފެންވަރަކަށް ދިނުމާ އަދި ކޮންމެ ގެޔަކަށް ކަނެކްޝަން ގުޅައިދިނުންކަމަށެވެ. އެކަމަށް ވައުދުވި ސަރުކާރެއް މީގެކުރިން ފެނިފައި ނުވާކަމަށް ސަލީމް ވިދާޅުވިއެވެ.

ފެނާއި ނަރުދަމާގެ ގާނޫނަށް އިސްލާހު ގެނައުމަށް ސަރުކާރުގެ ފަރާތުން ކުޅުދުއްފުށީ އުތުރު ދާއިރާގެ މެމްބަރު ޔާސިރު އަބްދުއްލަތީފު ހުށަހެޅުއްވި ބިލުގައިވެސް ވިސްނަންޖެހޭ ކަންތައްތަކެއް ހުރިކަމަށް ސަލީމް ވިދާޅުވިއެވެ. ސަލީމު ވިދާޅުވީ ތަފްސީލުކޮށް މި އިސްލާހުގައި ހުރި ކަންކަމަށް ބަލާނަމަ ކަންބޮޑުވުންތަކެއް ހުރިކަމަށެވެ. އެގޮތުން ގާނޫނުގެ 8 ވަނަ މާއްދާގެ މ އާއި ޔ އަށް ހުށަހަޅާފައިވާ އިސްލާހުން ހާސިލުވާ ނަތީޖާއެއް ނުފެންނަކަމަށް ވިދާޅުވިއެވެ.

މީގެއިތުރުން މިހާރު ގާނޫނުގައި އޮންނަ ކޮންމެ އަހަރަކު ފެށޭއިރު ޚިދުމަތްދޭ ފަރާތުން ކުރިޔަށް އޮތް އަހަރު ޚިދުމަތްދޭނެ ގޮތުގެ ޕްލޭނެއް ޔުޓިލިޓީ ރެގިއުލޭޓަރީ އަށް ހުށަހަޅަން ޖެހޭގޮތަށް އޮންނައޮތުން ، މިހާރުގެ އިސްލާހުގައި ފަސް އަހަރުން އެކަންކުރަންޖެހޭ ގޮތަށް އޮތުމަކީ ކަންބޮޑުވުމެއްކަމަށް ވިދާޅުވިއެވެ.

މިއީ ފެނާއި ނަރުދަމާގެ ގާނޫނު ތަންފީޒުކުރުމުގައި އެންވަޔަރަންމަންޓް މިނިސްޓްރީ އާއި ޔުޓިލިޓި ރެގިއުލޭޓަރީ އޮތޯރިޓީއަށް ދިމާވާ ބައެއް އިދާރީ ދަތިތައް ހައްލުކުރުމަށާއި ފެނާއި ނަރުދަމާގެ ޚިދުމަތް ދިނުމުގެ ނިޒާމު އިތުރަށް ހަރުދަނާކުރުމަށްޓަކައި ހުށަހަޅާފައިވާ ބިލެކެވެ.