ފެނާއި ނަރުދަމާގެ ގާނޫނު ތަންފީޒުކުރުމުގައި އެންވަޔަރަންމަންޓް މިނިސްޓްރީ އާއި ޔުޓިލިޓި ރެގިއުލޭޓަރީ އޮތޯރިޓީއަށް ދިމާވާ ބައެއް އިދާރީ ދަތިތައް ހައްލުކުރުމަށާއި ފެނާއި ނަރުދަމާގެ ޚިދުމަތް ދިނުމުގެ ނިޒާމު އިތުރަށް ހަރުދަނާކުރުމަށްޓަކައި ފެނާއި ނަރުދަމާގެ ގާނޫނަށް ހުށަހަޅާފައިވާ އިސްލާހުގެ ބިލް ހުށަހަޅާ އެބިލުގެ ބަހުސް ފަށައިފިއެވެ.
ސަރުކާރުގެ ފަރާތުން މިބިލް ހުށަހެޅުއްވީ ކުޅުދުއްފުށީ އުތުރު ދާއިރާގެ މެމްބަރު ޔާސިރު އަބްދުއްލަތީފެވެ. ބިލް ހުށަހަޅުއްވަމުން ޔާސިރު ވިދާޅުވީ ފެނާއި ނަރުދަމާއަކީ އަސާސީ ޚިދުމަތެއްގެ ގޮތުގައި ކަނޑައެޅުމަށް އެމްޑީޕީން ކުރަމުންދިޔަ މަސައްކަތުގެ ދަށުން އެކަން މިއަދު ހާސިލުކުރެވިފައިވާކަމަށެވެ. 2020 ވަނަ އަހަރު 19 ވަނަ ރައްޔިތުންގެ މަޖިލީހުން ފެނާއި ނަރުދަމާގެ ގާނޫނަށް އެކުލަވާލާ މިއަސާސީ ޚިދުމަތް ރައްޔިތުންނަށް ފޯރުކޮށްދިނުމަށް ގާނޫނީ އޮނިގަނޑުގެ ތެރެއިން ކަނޑައެޅިގެން ދިޔަކަމަށެވެ.
ޔާސިރު ވިދާޅުވީ އަސާސީ ހައްގުތައް ހޯދައިދިނުމަށް އެމްޑީޕީން ބުރަ މަސައްކަތެއްކުރަމުންދާއިރު މިހާތަނަށް އެމްޑީޕީން ވެރިކަމަށް އައި ދެ ފަހަރުވެސް ފެނާއި ނަރުދަމާގެ ޚިދުމަތް ރައްޔިތުންނަށް ފޯރުކޮށްދިނުމަށް ބުރަ މަސައްކަތްތަކެއް ކުރަމުންދާކަމަށެވެ.
ފެނާއި ނަރުދަމާގެ ކުޑަކުޑަ ތާރީޚަކަށް ބަލާލަން ބޭނުން. މައުމޫންގެ 30 އަހަރު ފެނުގެ 3 ނިޒާމު ނަރުދަމާގެ 12 ނިޒާމު ގާއިމުކޮށްފައިވޭ. ނަޝީދުގެ ވެރިކަމުގައި މިހައްގުތައް ހޯދައިދިނުމަށްޓަކައި ޓެކްސްގެ ނިޒާމަށް ބަދަލު ގެނެސް އާމްދަނީ ލިބޭ މިންވަރު މަތިކުރެވުނު. އެތިން އަހަރު ފެނުގެ 3 ނިޒާމު ނަރުދަމާގެ 15 ނިޒާމެއް ގާއިމުކުރެވުނު. ރައީސް ޔާމީންގެ ވެރިކަމުގައި 29 ފެނުގެ ނިޒާމު އަދި 35 ރަށެއްގައި ނަރުދަމާގެ ނިޒާމު ގާއިމުކުރެވުނު. މިއަދުގެ ސަރުކާރުން މިދަނީ މީހުން ދިރިއުޅޭ ހުރިހާ ރަށެއްގައި ފެނާއި ނަރުދަމާގެ ނިޒާމު ގާއިމުކުރަމުން. އެގޮތުން ފާހަހަކޮށްލަން މިއަދު 60 ރަށެއްްގައި ފެނުގެ ނިޒާމު 76 ރަށެއްގައި މަސައްކަތްވީ ކޮންޓެރެކްޓްކުރެވިފައި. ނަރުދަމާ ނިޒާމުގެ މަސައްކަތް 48 ރަށެއް ކުރިޔަށްދާއިރު 48 ރަށެއްގައި އެމަސައްކަތްކުރުމަށް ވަނީ ހަވާލުކުރެވިފައި.ޔާސިރު އަބްދުއްލަތީފު/ ކުޅުދުއްފުށީ އުތުރު ދާއިރާގެ މެމްބަރު
ޔާސިރު ވިދާޅުވީ މިއިސްލާހުތަކުގެ ސަބަބުން ފެނާއި ނަރުދަމާގެ ޚިދުމަތްތައް ދިނުމުގައި އިތުރަށް ޚަރުދަނާވެގެންދާނެ ކަމަށެވެ. މިބިލްގައި ބޮޑަށް ހިމެނެނީ ޚިދުމަތް ދިނުމުގައި ގެންގުޅޭނެ މިންގަނޑުތައް ކަނޑައެޅުމަށް ގެންނަ އިސްލާހުތަކާއި އިޔާދަކުރަނިވި ހަކަތަ ބޭނުންކުރުމަށް ގެންނަންޖެހޭ އިސްލާހުތައްކަމަށް ޔާސިރު ވިދާޅުވިއެވެ. އަދި ޕްލޭންތައް ކަނޑައެޅުމާއި މިބިލްގައި ކަނޑައަަޅާފައިވާ ކަންކަމަށް ތަބާނުވާ ފަރާތްތަކަށް ދޭނެ އަދަބުތައް ކަނޑައެޅިފައިވާކަމަށް ޔާސިރު ވިދާޅުވިއެވެ.
ބިލަށް ގެނެސްފައިވާ އިސްލާހުތަކަށް ބަލާލާއިރު ފެނާއި ނަރުދަމާގެ ނިޒާމު ގާއިމުކުރުމަށް ބޭނުންކުރެވޭ ސާމާނު ޓެސްޓްކޮށް ސެޓިފައިކުރާނެ ގަވާއިދުތައް އެކުލަވާލަންޖެހެއެވެ.
ފެނާއި ނަރުދަމާގެ ޚިދުމަތް ދިނުމަށް ލައިސަންސް ދީފައިވާ ކޮންމެ ފަރާތަކުންވެސް ފެނާއި ނަރުދަމާގެ ގައުމީ ސިޔާސަތާ އެއްގޮތުގެ މަތިން ފެނާއި ނަރުދަމާގެ ޚިދުމަތް ދިނުމަށް ކަނޑައަޅާ 5 އަހަރު ދުވަހުގެ މުއްދަތަކަށް ޕްލޭނެއް އެކުލަވާލައި މިނިސްޓްރީ އަށާއި އޮތޯރިޓީއަށް ހުށަހަޅަންޖެހެއެވެ. އަދި ކޮންމެ 5 އަހަރަކުން މިޕްލޭން މުރާޖާކުރަމުން ގެންދަންޖެހެއެވެ.
އިޔާދަކުރަނިވި ހަކަތައާއި ބެހޭގޮތުން އިސްލާހުގައި ބުނެފައިވަނީ ފެން އުފެއްދުމަށް ބޭނުންކުރާ ހަކަތައަކީ އޮތޯރިޓީން ކަނޑައަޅާ މިންގަނޑުތަކާއި އެއްގޮތަށް ގްރިޑް ސެޓެބިލިޓީއަށް ބުރުއަރާނެ އެންމެ މަތީ މިންވަރަކަށް އިޔާދަކުރަނިވި ވަސީލަތްތައް ބޭނުންކޮށްގެން އުފައްދާ ހަކަތަކަމުގައި ހަދަންވާނެއެވެ.
އަދި ބިމުން ފެންނަގައި ފެން ބޭރުކުރުމުގެ މަސައްކަތްކުރާ ފަރާތްތަކުން މިގާނޫނާއި މިގާނޫނުގެ ދަށުން ހަދާ ގަވާއިދާ ޚިލާފަށް އެއްވެސް އަމަލެއްކޮށްފިނަމަ އެކަން ކުރި ފަރާތެއް އެއް މިލިއަން ރުފިޔާއަށްވުރެ ބޮޑުނޫން އަދަދަކުން ޖޫރިމަނާކުރަންވާނެކަމަށް އިސްލާހުގައި ބުނެފައިވެއެވެ.
