މިދިޔަ އަހަރުގެ ބަޖެޓުން ބޮޑުބައެއް ބޭނުންކޮށްފައި ނުވާކަމަށް ދެކެވޭ ވާހަކައަކީ ހަގީގަތާ ޚިލާފު ވާހަކައެއް – ކްރިމިނަލް ކޯޓް
ކްރިމިނަލް ކޯޓުން މިހެން ބިނެފައިވަނީ، ދުވަހު ނޫސް "އަދަދު"ގައި ޝާއިއުކުރި ލިޔުމަކާ ގުޅިގެން
ކްރިމިނަލް ކޯޓް
2021 ވަނަ އަހަރު ކްރިމިނަލް ކޯޓަށް ލިބުނު ބަޖެޓުން ބޮޑު ބައެއް ބޭނުންކޮށްފައިނުވާކަމަށް ބައެއް ޚަބަރު ފަތުރާ ވަސީލަތްތަކުން ބުނާ ބުނުމަކީ ސައްހަ މައުލޫމާތެއް ނޫން ކަމަށް އެކޯޓުން ބުނެފިއެވެ.
ކްރިމިނަލް ކޯޓުން މިހެން ބުނެފައިވަނީ, އޮންލައިން ނޫސް "އަދަދު"ގައި, ކްރިމިނަލް ކޯޓުގައި މަދުވާ ވަސީލަތްތައް ގަތުމަށް ނިމިދިޔަ 2021 ވަނަ އަހަރު ދައުލަތުން ބޮޑު ބަޖެޓެއް ދިން ނަމަވެސް، އަހަރު ނިމިގެން ދިޔައިރު ވެސް އެ ފައިސާއިން އެއްވެސް ވަސީލަތެއް ހޯދިފައިނުވާކަން ހާމަވެއްޖެ ކަމަށް ލިޔެފައިވާ ޚަބަރާ ގުޅިގެންނެވެ.
ކްރިމިނަލް ކޯޓުން ބުނެފައިވަނީ އެ ކޯޓަށް 2021 ވަނަ އަހަރު އައިޓީއާ ގުޅޭގޮތުން ހޯދާ ހާރޑްވެއަރ ކޯޑަށް ލިބުނު ޖުމްލަ ބަޖެޓަކީ 350,000.00 (ތިންލައްކަ ފަންސާސްހާސް) ރުފިޔާ ކަމަށެވެ. އަދި އައިޓީއާ ގުޅޭގޮތުން ހޯދާ ހާރޑްވެއަރ ކޯޑަށް އެހެނިހެން ކޯޑުތަކުން އިތުރުކުރެވުނު ފައިސާއާއެކު ޖުމްލަ 399,901.49 (ތިންލައްކަ ނުވަދިހަ ނުވަހާސް ނުވަސަތޭކަ އެއް ރުފިޔާ ސާޅީސް ނުވަ ލާރި) ޚަރަދު ކުރެވިފައިވާ ކަމަށެވެ.
މި ފައިސާއިން ކުރެވިފައިވާ ޚަރަދުތަކުގެ ތެރޭގައި ޑޯރ އެކްސެސް ކޮންޓްރޯލް ސިސްޓަމްތަކަކާއި، ސްކޭނަރުތަކަކާއި، ލޭޒަރ ޕްރިންޓަރުތަކަކާއި، ހާޑް ޑިސްކްތަކަކާއި، ކޮމްޕިއުޓަރ ސިސްޓަމްތަކަކާއި، ސަރވަރއެއް ހޯދުމުގެ މަސައްކަތް ހިމެނޭ ކަމަށް އެ ކޯޓުން ބުނެއެވެ.
