މަޝްރޫތަކަށް ބަދަލު ގެންނަން ބޭނުންވާނަމަ ހިއްސާކުރައްވާ، ރައްޔިތުން އެދޭ ގޮތަށް ކުރިއަށްދާނީ: ރައީސް
ރަށުގައި ތަރައްޤީގެ މަޝްރޫއުތައް ކުރިއަށްދާނީ ރައްޔިތުން ބޭނުންވާ ގޮތަށް
އޮޅުވެލިފުށި ރައްޔިތުންނާއި ރައީސް ބައްދަލު ކުރެއްވުން
ޅ. އޮޅުވެލިފުށީގައި ވަރަށް ގިނަ މަޝްރޫއުތައް ކުރިއަށްދާ ކަމަށާއި އެ މަޝްރޫއުތަކަށް ބަދަލު ގެންނަން ބޭނުންވާނަމަ އެކަން ސަރުކާރާއި ހިއްސާ ކުރެއްވުމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު އެދިވަޑައިގަންނަވައިފިއެވެ.
އޮޅުވެލިފުށީގެ ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުން ރައީސް ވިދާޅުވީ ރަށުގައި ތަރައްޤީގެ މަޝްރޫއުތައް ކުރިއަށްދާނީ ރައްޔިތުން ބޭނުންވާ ގޮތަށް ކަމަށެވެ. އަދި މަޝްރޫތަކާއި މެދު ހިތްހަމަނުޖެހޭ ނަމަވެސް ނުވަތަ މަޝްރޫއުތަކަށް ބަދަލު ގެންނަން ބޭނުންވާނަމަ ކައުންސިލާއި އެކަން ހިއްސާކުރުމުން ސަރުކާރުން ކަމާއި ގުޅޭ މުއައްސަސާތަކާއެކު މަޝްވަރާ ކުރައްވާނެ ކަމަށް ރައީސް ވިދާޅުވިއެވެ.
ރައީސް ވިދާޅުވީ މިވަގުތު ރަށުގައި ފެނާއި ނަރުދަމާ ނިޒާމުގެ މަސައްކަތް ރަށުގައި ކުރިއަށްދާއިރު ކުޑަ ލަސްކަމެއް ދިމާވި ކަމަށެވެ. އެގޮތުން ހޮޅި ވަޅުލުމަށް ހަވާލުކުރި ކުންފުނިން މަސައްކަތް ކުރިއަށް ނުގެންދާތީ ލަސްތަކެއް އަންނަ ކަމަށާއި ވަރަށް އަވަހަށް ރަށުގެ ފެނާއި ނަރުދަމާގެ މަސައްކަތް ރަށުގައި ނިމިގެންދާނެ ކަމަށް އެމަނިކުފާނު ވިދާޅުވިއެވެ.
ބަނދަރުގެ ދަތިކަމުގެ ވާހަކަ ކައުންސިލުން ހިއްސާކޮށްފައިވާ ކަމަށާއި ޓެކްނިކަލް ސަރވޭއެއް ކުރިއަށް ގެންދިޔުމަށްފަހު އެކަމަށް ވެސް ހައްލު ގެނެސްދެއްވާނެ ކަމަށް ރައީސް ވިދާޅުވިއެވެ.
މި ބައްދަލުވުމުގައި ރައްޔިތުން ވަނީ ރަށަށް ކައިރީގައި މޫދަށް އެރޭނެ ސަރަހައްދެން ނެތުމާއި އޭޓީއެމްގެ ޚިދުމަތް ލިބެން ނެތުމުން އެކަމުގެ ކަންބޮޑުވުންތައް ހިއްސާ ކޮށްފައެވެ. ރައްޔިތުންގެ މިވާހަކަތަކަށް ޖަވާބު ދެއްވަމުން ރައީސް ވިދާޅުވީ ބަނދަރުގެ މަސައްކަތް ކުރިއަށްދާއިރު އޮޅުވެލިފުށި ކައިރީގައި ޕިކްނިކް އައިލެންޑެއް މަޝްވަރާތައް ކުރިއަށް ގެންދަވާނެ ކަމަށެވެ. އަދި މި ބައްދަލުކުރެއްވުމުގައި އިކޮނަމިކް މިނިސްޓަރ ފައްޔާޒު އިސްމާއިލް ވަނީ މިއަހަރުގެ ތެރޭގައި ރަށުގައި އޭޓީޢެމްގެ ޚިދުމަތް ފެށިގެންދާނެ ކަމަށް ވިދާޅުވެފައެވެ.
ރައީސް ވަނީ ރަށުގެ ރައްުޔިތުން އެމަނިކުފާނަށް ހޫނު މަރުހަބާއެއް ދެންނެވުމުން އެކަމަށް ޝުކުރު އަދާކުރައްވާފައެވެ.
