ކޮވިޑް-19އާ ގުޅިގެން ބައެއް މަޝްރޫއުތައް ލަސްކޮށް، އިސްފަސްވެ, އަދި ޕްލޭނަށް ބައެއް ބަދަލުތައް ގެންނަން ޖެހުނު ނަމަވެސް ރައްޔިތުންނަށް ވީ ވައުދުފުޅުތައް ހަނދުމަފުޅު ހުރިކަމަށާއި، އެކަންކަން ކޮށްދެއްވާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެއެވެ.
ޅ. ނައިފަރަށް ވަޑައިގެން, އެރަށުގައި ސަރުކާރުން ތަރައްގީކުރި ހައުސިންގ ޔުނިޓްތައް ކައުންސިލާ ހަވާލުކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން ރައީސް ސޯލިހު ވިދާޅުވީ, ކޮވިޑުގެ ދަތިކަމާ ގުޅިގެން، އެމްޑީޕީއިން ވީ ބައެއް ވައުދުތައް ފުއްދުން ފަސްޖެހިގެންދިޔަ ކަމަށެވެ. އެހެންނަމަވެސް، ކުރައްވަމުން ގެންދަވާ މަސައްކަތަކީ، ރިޔާސީ އިންތިޚާބުގައި ވެވަޑައިގެންނެވި ވައުދުތަކާއި، ރައްޔިތުންގެ މަޖިލީހުގެ އިންތިޚާބުގައި ވެވަޑައިގެންނެވި ވައުދުތައް ފުއްދެވުމުގެ މަސައްކަތް ކަމަށެވެ.
އެހެންނަމަވެސް، ކޮވިޑާ ގުޅިގެން ބައެއް މަޝްރޫއުތައް ލަސްވުމާއި, އިސްފަސްވުމާއި އަދި ޕްލޭނަށް ބައެއް ބަދަލުތައް ގެންނަންޖެހި ވަޑައިގެންނެވީ ކަމަށެވެ. ރައީސް ވިދާޅުވީ ނައިފަރުގެ ބިން ހިއްކުމަކީ، ވެވަޑައިގެންނެވި ވައުދުފުޅެއް ކަމަށެވެ.
އަޅުގަނޑު ހަނދާން އެބަހުރި. ރިޔާސީ އިންތިޚާބުގައި އަޅުގަނޑު މިރަށަށް ކުރި ދަތުރުގަ، އަޅުގަނޑު ވާނެ، މިރަށުގެ ބިން ހިއްކުމުގެ ވާހަކަ، ރައްޔިތުންނާ ހިއްސާކޮށްފަ. އިރާދަކުރެއްވިއްޔާ، އަޅުގަނޑުމެންގެ މަޝްރޫއުތަކުގެ ތެރޭގަ، މިހާރު ހުރި މަސައްކަތާ، އޭގެފަހުން ދެން ފެށޭ ކަންތައްތަކުގެ ތެރޭގަ، މި ރަށުގެ ބިން ހިއްކުމުގެ މަޝްރޫއު އިރާދަކުރެއްވިއްޔާ އަޅުގަނޑުމެން ހިމަނައިދޭނަން.ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު
ރައީސް ވިދާޅުވީ, އެމްޑީޕީގެ ސިޔާސަތަކީ ލާމަރުކަޒީ ނިޒާމުން ރާއްޖެ ތަރައްގީކުރުމާއި, ބާރުތައް ކައުންސިލްތަކަށް ދޫކޮށްލައި މާލީގޮތުން ތަނަވަސްކަން އިތުރުކޮށްދިނުމާއި, އަދި ރައްޔިތުންނާ ވީހާވެސް ގާތުން އަސާސީ ޚިދުމަތްތައް ފޯރުކޮށްދިނުން ކަމަށެވެ. އެ މަސައްކަތް ކުރިއަށް ގެންދަވާ ކަމަށް ރައީސް ވިދާޅުވިއެވެ.
މީގެ އިތުރުން ދަތުރުފަތުރުގެ ނިޒާމަކުން ރަށްތައް ގުޅުވާލައި، އަތޮޅުތައް ގުޅުވައިލުމަކީ ވައުދުފުޅެއް ކަމަށާއި، އޭގެ މަސައްކަތް، ހއ އަތޮޅާއި، ހދ އަތޮޅު އަދި ށ އަތޮޅުގައި މިހާރު ޓެސްޓް ބުރުތައް ފެށިފައިވާކަމަށެވެ. އެއަށްފަހު، ކުރިއަށް އޮތް ދެ މަސްދުވަހުގެ ތެރޭގައި، އެ ތިން އަތޮޅުގައި އެކަން ފެށޭނެކަމަށް ރައީސް ވިދާޅުވިއެވެ.
ރައީސް ވިދާޅުވީ އަތޮޅުގައި ހުރި ގުދުރަތީ ވަސީލަތްތަކުގެ ނަފާއާއި ފައިދާ، އަތޮޅުގެ ރައްޔިތުންނަށް އެންމެ އެކަށީގެންވާ ގޮތުގައި ލިބެންޖެހޭ ކަމަށެވެ. އެއީ އެމަނިކުފާނު ގަބޫލުކުރައްވާ ގޮތް ކަމަށާއި، ލާމަރުކަޒީ ނިޒާމުގެ ތެރެއިން މިހާރުވެސް ރަށްރަށުގެ އިޚްތިސާސް ކަނޑައެޅިފައިވާނެ ކަމަށެވެ.
އޭގެއިތުރުންވެސް އިޚްތިސާސްގައި ނުހިމެނޭ ބައިވަރު ރަށާ، ފަޅާ، ގިރިއާ، ހުރާފަދަ ތަންތަން އެބަހުރި. އެއްވެސް ފަރާތެއްގެ ބެލުމުގެ ދަށުގަ ނެތި، ހަލާކުވެ ވީރާނާވަމުން، ގެއްލުންވަމުންދާ ރަށްރަށް އެބަހުރި. ޕްލޭނިންގ މިނިސްޓްރީން މިހާރު އެ ގެންދަވަނީ، އެހެންހުރި ރަށްތަކާ ބެހޭގޮތުން އުސޫލެއް ކަނޑައަޅަމުން. އެއަށްފަހު އެ ރަށްރަށް ބެލެހެއްޓޭނެ ގޮތެއް، އަތޮޅު ކައުންސިލް، ނޫނީވިއްޔާ ރަށު ކައުންސިލާ ހަވާލުކޮށްގެން، އޭގެ އެންމެ ރަނގަޅު ފައިދާ ރައްޔިތުންނަށް ލިބޭނެގޮތަކަށް އަޅުގަނޑުމެން އިރާދަކުރެއްވިއްޔާ ހަމަޖައްސައިދޭނަން.ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު
ރައީސް ވިދާޅުވީ ސިއްހީ ޚިދުމަތްތައް، ރަށުގައި ތިބެގެން، ނުވަތަ ކައިރީގައި ތިބެގެން ރަނގަޅަށް ލިބުމަކީ ރައްޔިތުން އެދޭކަމެއް ކަމަށެވެ. އަދި އެ ރަށުގައި ހުރީ އަތޮޅު ހޮސްޕިޓަލެއް ކަމަށާއި، އަތޮޅު ހޮސްޕިޓަލުން ލިބޭ ޚިދުމަތްތައް ރަނގަޅުކޮށްދޭން ޖެހޭ ކަމަށެވެ. އެކަން ގަބޫލުފުޅު ކުރައްވާ ކަމަށާއި، ނައިފަރުގައި ހުރި އަތޮޅު ހޮސްޕިޓަލުން ދެވޭ ޚިދުމަތްތައް ރަނގަޅުކޮށް، ސްޕެޝަލް ޚިދުމަތްތަކާއި އަދި އިތުރު ޚިދުމަތްތައް ރައްޔިތުންނަށް ފޯރުކޮށްދެވޭނެ ގޮތްތައް ހޯއްދަވައިދެއްވަމުން ގެންދަވާ ކަމަށް ވިދާޅުވިއެވެ.
އެގޮތުން މިހާތަނަށް އަޅުގަނޑުމެން ވާނެ، ކެންސަރަށް ފަރުވާދިނުމަށް، ހޮސްޕިޓަލުގަ ކީމޯ ތެރަޕީ ދެވޭގޮތް ގާއިމުކޮށްދީފަ. އަދި އޭގެއިތުރުން މިހާރު އެގެންދަނީ، މިރަށުގައި ޑައިލިސިސް ހެދޭނެގޮތް ހެދުމަށްޓަކާ ކުރަންޖެހޭ މަސައްކަތްތައް ކުރަމުން. މީގެއިތުރުން މިރަށަށް ބޭނުންވާ ޑޮކްޓަރުން ހޯދުމުގެ މަސައްކަތް މިހާރު ކުރިއަށް އެބަދޭ. ލަސްތަކެއްނުވެ އިރާދަކުރެއްވިއްޔާ ޑޮކްޓަރުން ނެތް ދާއިރާތަކަށް، މި ރަށުގެ ހޮސްޕިޓަލަށް ވަރަށް އަވަހަށް ޑޮކްޓަރުން ފޯރުކޮށްދޭނެ ކަމުގެ ޔަގީންކަން އަޅުގަނޑަށް މިހާރުވަނީ ލިބިފަ.ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު
ރައީސް ވިދާޅުވީ އަންހެނުންނަށް ފުޓްސެލް ކުޅެވޭނެގޮތަކަށް، ފުޓްސެލް ދަނޑެއް އިރާދަކުރެއްވިއްޔާ އަޅުއްވައިދެއްވާނެ ކަމަށާއި، ނައިފަރުގެ ތަރައްގީއަށްޓަކައި ކުރަންޖެހޭ ވަރަށްގިނަ ކަންތައްތައް އެބަހުރި ކަމަށެވެ.
އިރާދަކުރެއްވިއްޔާ، އެއްވެސް ރަށެއް ތަފާތުނުކޮށް، ބޮޑު އާބާދީއެއް ކުޑަ އާބާދީއެއް ތަފާތުނުކޮށް، ރައްޔިތުންނަށް ބޭނުންވާ އަސާސީ ޚިދުމަތްތައް ފޯރުކޮށްދިނުމުގައި، މި ސަރުކާރު ދެމިއޮންނާނެ ކަމަށް ރައީސް ވިދާޅުވިއެވެ. އަދި އެއާ ދޭތެރޭގައި އެއްވެސް ޝައްކެއް، އެއްވެސް ބޭފުޅަކު ނުކުރެއްވުމަށް ރައީސް އެދިވަޑައިގެންނެވިއެވެ.
