ހިޔާވަހި ހައުސިން މަޝްރޫއު: ރީތި ގަސް އެޕާޓްމެންޓަށް ނަން ބަދަލުކޮށް، ދެއަހަރުގެ ތެރޭގައި މަސައްކަތް ނިންމަނީ
19 ފެބުރުއަރީ 2022 | ހޮނިހިރު 09:58މި މަޝްރޫއު އަމީން ކޮންސްޓްރަކްޝަނާއި ހަވާލުކޮށްފައިވަނީ 647 ރުފިޔާއަށް
ހިޔާވަހި ހައުސިންގެ ޓަވަރުތައް
ހިޔާވަހި ހައުސިންގ ގެ ނަމުގައި ފެށި ހައުސިންގ މަޝްރޫއު، ރީތި ގަސް އެޕާޓްމަންޓަށް ބަދަލުކޮށް މަސައްކަތް ފަށާފައިވާ ކަމަށާއި، ކުރިއަށް އޮތް ދެއަހަރުގެ ތެރޭގައި ނިންމާލެވޭނެ ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިންގ ޑިރެކްޓަރ ސުހައިލް އަހުމަދު ވިދާޅުވެއްޖެއެވެ.
ހިޔާވަހި ހައުސިންގ މަޝްރޫއު ގެ މަސައްކަތް އަމީން ކޮންސްޓްރަކްޝަން އާ ހަވާލުކޮށްފައިވަނީ ކުރީގެ ރައީސް އަބްދުﷲ ޔާމީންގެ ވެރިކަމުގައި 19 ޖެނުއަރީ 2017 ގައެވެ. މި މަޝްރޫއުގެ ދަށުން 14 ފަންގިފިލާގެ ތިން ޓަވަރު އަޅާނެ އެވެ. 647 މިލިއަން ރުފިޔާއަށް އަމީން ކޮންސްޓްރަކްޝަން އާ ހަވާލުކޮށްފައިވާއިރު އެޑްވާންސްއަށް 233 މިލިއަން ރުފިޔާ ދެއްކީ އެޗްޑީސީގެ ފައިސާއިންނެވެ. ނަމަވެސް 2018 ވަނަ އަހަރު ވެރިކަން ބަދަލުވުމުން އަމީން ކޮންސްޓްރަކްޝަން އަށް ދޭން ޖެހޭ ފައިސާ ނުލިބުމާއި ގުޅިގެން އަމަލީ މަސައްކަތް ވަނީ މެދުކަނޑާލާފައެވެ. މަޝްރޫއުގެ މަސައްކަތް މެދުކަނޑާލިއިރު އެޑްވާންސަށް ދިން 233 މިލިއަން ރުފިޔާއަށް ވުރެ އިތުރަށް މަސައްކަތްކޮށްފައިވެއެވެ. އަދި އެމަސައްކަތަށް ފޮނުވި ބިލްތަކަށް އެޗްޑީސީއަށް ކުރިމަތިވި މާލީ ދަތިކަމުގެ ސަބަބުން ފައިސާ ދެއްކިފައެއްނުވެއެވެ. މަސައްކަތް ހުއްޓިފައި އޮންނަތާ ހަތަރު އަހަރު ފަހުން މިއަހަރުގެ ތެރޭގައި އަމަލީ މަސައްކަތް ފަށާފައިވާއިރު، މަސައްކަތް ފަށާފައިވަނީ އެޗްޑީސީއާ، އަމީން ކޮންސްޓްރަކްޝަނާއި ދެމެދު ވެވުނު އެއްބަސްވުމެއްގެ ތެރެއިންނެވެ. އެއީ މަޝްރޫއުގެ މަސައްކަތް ގިނަ ދުވަސްތަކަށް ކުރިއަށް ނުގެންދެވި ހުއްޓިފައި އޮތުމުގެ ސަބަބުން އެޗްޑީސީ އަދި އަމީންއަށް ވެސް ވަނީ މާލީ ގޮތުން ގެއްލުން ލިބޭތީއެވެ.
މައުލޫމާތު ލިބިފައިވާ ގޮތުގައި އެޗްޑީސީން މިމަޝްރޫއުގެ އަމަލީ މަސައްކަތް ކުރުމަށް އެއްބަސްވުމަކަށް އައިސްފައިވަނީ ސަރުކާރުގެ ސަޕޯޓާއެކު ބޭންކް އޮފް މޯލްޑިވްސް (ބީއެމްއެލް)އިން ދޫކުރާ ކޮންސްޓްރަކްޝަން ލޯނު ހަމަޖެހި، ލޯނުގެ ޓާމް ޝީޓް އެޗްޑީސީއަށް ހުށަހެޅުމުން، ލޯނު ލިބޭނެކަމުގެ ޔަގީންކަމާއެކު އެވެ. އަދި މިހާރު ނިންމާފައިވަނީ އިމާރާތްކުރާ ޓަވަރުތަކުގެ ތެރެއިން އެޓަަވަރުގެ ހުރިހާ މަސައްކަތް ނިންމާ އެޕާޓްމެންޓްތައް ވިއްކާލުމަށެވެ. އެޕާޓްމެންޓްތައް ވިއްކާލުމަށްފަހު ލިބޭ ފައިސާއިން އަމީންގެ ބިލްތައް ދައްކައި، އަދި މަޝްރޫއު ކުރިއަށް ގެންދާ ގޮތަށެވެ. އަދި އެޕާޓްމެންޓްތައް ވިއްކައިގެން ލިބުނު ގެއްލުމުގެ ބަދަލު ވެސް އަމީން ކޮންސްޓްރަކްޝަނަށް ދެވޭނެ ކަމަށް އެޗްޑީސީން މައުލޫމާތުދެއެވެ. ނަމަވެސް ބަދަލުގެ ގޮތުގައި ދޭނެ ފައިސާގެ އަދަދު ހާމައެއް ނުކުރެއެވެ.
ރާއްޖެއެމްވީއާ ހިޔާވަހި ހައުސިންގ އާބެހޭ އެންމެފަހުގެ މައުލޫމާތު ހިއްސާކުރައްވަމުން އެޗްޑީސީގެ މެނޭޖިންގ ޑިރެކްޓަރ ސުހައިލް އަހުމަދު ވިދާޅުވީ މިމަޝްރޫއުގެ ނަން މިހާރު ރީތި ގަސް އެޕާޓްމެންޓަށް ބަދަލުކޮށް، މިއަހަރުގެ ތެރޭގައި އަމަލީ މަސައްކަތް ފަށާފައިވާ ކަމަށެވެ. މަސައްކަތްތައް ކުރިއަށް ދަނީ އެޗްޑީސީއަށް ވެސް އަދި އަމީން ކޮންސްޓްރަކްޝަނަށް ވެސް ގެއްލުން ނުވާ ގޮތަށް ކަމަށެވެ. އެގޮތުން މިހާރު އެއް ޓަވަރުގެ ކޮންކްރީޓް ނިންމުމުގެ މަސައްކަތްތައް ކުރިއަށްދާއިރު، ކުރިއަށް އޮތް ދެއަހަރުގެ ތެރޭގައި މަސައްކަތް ނިންމާލެވޭނެ ކަމަށް ސުހައިލް ވިދާޅުވިއެވެ. މީގެ އިތުރުން ސުހައިލް ވިދާޅުވީ ކޮވިޑް-19އާއެކު ވެސް މަސަައްކަތްތައް ކުރިއަށް ގެންދިއުމުގައި ބައެއް ދަތިތައް ކުރިމަތިވި ކަމަށެވެ. ނަމަވެސް އަމަލީ މަސައްކަތްތައް ނުހުއްޓި ކުރިއަށް ގެންދެވޭނެ ކަމަށް އަމީން ކޮންސްޓްރަކްޝަންގެ ފަރާތުން މައުލޫމާތު ދީފައިވާ ކަމަށެވެ.
ރީތި ގަސް އެޕާޓްމެންޓްތަކަކީ ސަރުކާރާއި ސަރުކާރު ހިއްސާވާ ކުންފުނިތަކުގެ މުވައްޒަފުންނަށް ޚާއްސަކޮށްގެން ހުޅުމާލެ ފޭސް އެކެއްގައި އިމާރާތް ކުރަމުންދާ ފްލެޓްތަކެކެވެ. މިމަޝްރޫއުގެ މަސައްކަތް ކުރަމުންދާ އަމީން ކޮންސްޓްރަކްޝަން އަކީ ހުޅުމާލޭގެ ފުރަތަމަ ފިޔަވަހީގެ އިތުރުން ދެވަނަ ފިޔަވަހީގައި ވެސް ހައުސިންގ ގެ ގިނަ މަޝްރޫއުތައް ކުރިއަށް ގެންދާ ކުންފުޏެކެވެ.
