އިންޑިއާ އައުޓް ކެމްޕޭނަކީ ރައީސް ޔާމީން ވެރިކަމުގައި ހިންގާފައިވާ މަރުތަކާއި، ހިޔާނަތްތަކުގެ އަޑު ކަނޑުވާލުމަށް ހިންގާ ކެމްޕޭނެއް: މިނިސްޓަރު މާރިޔާ
18 ފެބުރުއަރީ 2022 | ހުކުރު 07:26ރާއްޖޭގެ މިނިވަން ކަމަށް ބުރޫއަރާފަދަ އެއްވެސް ކަމެއް މިސަރުކާރުން ނުކުރާނެ
ޑިފެންސް މިނިސްޓަރު މާރިޔާ އަހުމަދު ދީދީ 241 ކޮމެޓީގައި ވާހަކަދައްކަވަނީ
އިންޑިއާ އައުޓް ކެމްޕޭނަކީ ކުރީގެ ރައީސް އަބްދުﷲ ޔާމީން ގެންގުޅުއްވާ ހުރިހާ ނޭއްގާނީ ސިފަތައް އެކުލެވޭ، އެމަނިކުފާނުގެ ވެރިކަމުގައި ހިންގާފައިވާ މަރުތަކާއި، ޚިޔާނަތްތަކުގެ އަޑު ކަނޑުވާލުމަށް ހިންގާ ހީލަތްތެރި ކެމްޕޭނެއް ކަމަށް ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެއެވެ.
ބުރާސްފަތި ދުވަހުގެ ރޭ ކުރިއަށްދިޔަ 241 ކޮމެޓީގައި މިނިސްޓަރު މާރިޔާ ވިދާޅުވީ ދިވެހިރާއްޖޭގެ މިނިވަން ކަމަށް ބުރޫއަރާފަދަ އެއްވެސް ކަމެއް މިސަރުކާރުން ނުކުރާނެ ކަމަށާއި، ރައީސް އިބްރާހިމް މުހައްމަދު ސޯލިހުގެ ސަރުކާރުން އަބަދުވެސް އެންމެ ބޮޑު އިސްކަމެއް ދެނީ ޤައުމީ ސަލާމަތާއި ގުޅިފައިވާ އެންމެމަތީ މަސްލަހަތުތައް ހިމާޔަތްކޮށް ރައްޔިތުންނަށް އުފަލާއި ހިތްހަމަޖެހުމާއެކު ފާގަތިކަމުގައި އުޅެވޭނެ މަގުތަނަވަސްކޮށް ދިނުމަށް ކަމަށެވެ.
ކުރީގެ ރައީސް އަބްދުﷲ ޔާމީން އިސްވެ ހުންނަވައިގެން ކުރިއަށް ގެންދާ އިންޑިއާ އައުޓް ކެމްޕޭނަށް އިޝާރަތް ކުރައްވައި މިނިސްޓަރު ވިދާޅުވީ މިކެމްޕޭންގައި ރައީސް ޔާމީން ގެންގުޅުއްވާ ނޭއްގަނީ ހުރިހާ ސިފަތަކެއް އެކުލެވޭ ކަމަށާއި، މިއީ އެމަނިކުފާނުގެ ވެރިކަމުގައި ހިންގާފައިވާ ކަމަށާއި، މަރުތަކާއި، އަނިޔާތަކާއި، ހިޔާނާތުގެ އަޑު ކަނޑުވާލުމަށް ރާވައިގެން ހިންގާ ހީލަތްތެރި ކެމްޕޭނެއް ކަމަށެވެ. އަދި ވިދާޅުވީ އިންޑިއާ އައުޓް ކެމްޕޭނަކީ ރާއްޖޭގެ މިނިވަން ކަމަށް ބުރޫއަރާފަދަ އެއްވެސް ކަމެއް އޮވެގެން ހިންގާ ކެމްޕޭނެއް ނޫން ކަމަށެވެ.
މިކޮމެޓީގައި މިނިސްޓަރު މާރިޔާ ވަނީ ރައީސް ޔާމީން ޖަލުން މިނިވަންވެވަޑައިގެން ބޭއްވެވި ފުރަތަމަ އިންޑިއާ އައުޓް ކެމްޕޭންގައި ދެއްކެވި ވާހަކަފުޅުތަކާއި ގުޅޭގޮތުން ވެސް ވާހަކަދައްކަވާފައެވެ. މިނިސްޓަރު މާރިޔާ ވިދާޅުވީ އެދުވަހުގެ އެ ހަރަކާތުގައި ރައީސް ޔާމީން އިންޑީއާ މެދު ހިތްޕުޅު ހަމަޖެހިވަޑައިނުވަތީ ސްޕްރިމްކޯޓުގެ ފަނޑިޔާރުން ހައްޔަރުކުރުމުން އެމަނިކުފާނާއި އިންޑިއާއިން ސުވާލު ކުރުމުން ކަމަށް ވިދާޅުވެފައިވާ ކަމަށެވެ.
މީގެ އިތުރުން މިނިސްޓަރު ވިދާޅުވީ 1960 އަހަރުތަކާ ހަމައިން މި ސަރަހައްދުގެ ސަލާމަތާއި ހަމަޖެހުމަށް މި ސަރަހައްދުގެ ހުރިހާ ގައުމުތަކުން އިސްކަންދީގެން މަސައްކަތް ކުރާ ކަމަށެވެ. ނަމަވެސް ދޭދޭ ގައުމުތަކުގެ މެދުގައި ގުޅުން ގޯސްވެ ހަތުރުވެރިކަން އުފެދުމުން ސަރަހައްދީ ކޯޅުންތަކާއި ހަމަނުޖެހުމާއި ޓެރަރިޒަމްއަށް މަގުފަހިވެގެންދާތަން މިހާރު ވެސް ފެންނަމުންދާ ކަމަށް މިނިސްޓަރު ވިދާޅުވިއެވެ. އަދި ވިދާޅުވީ ސަރަހައްދަކީ ހަމަޖެހުން ގެއްލިއްޖެނަމަ އެސަރަހައްދެއްގެ ޤައުމުތަކަށް ކުރިއެރުމާއި، ތަރައްގީއާ އަމާންކަމެއް ނޯންނާނެ ކަމަށެވެ.
