ބަންގްލަދޭޝްގެ ޗީފް އޮފް އާމީ ސްޓާފް، ޖެނެރަލް އެސް.އެމް ޝަފީއުއްދީން ރާއްޖެއަށް ކުރައްވަމުންގެންދަވާ ފަސް ދުވަހުގެ ރަސްމީ ދަތުރުފުޅުގައި، އެމްއެންޑީއެފްގެ ހެޑްކޯޓަރޒްއަށް ޒިޔާރަތްކުރައްވައިފިއެވެ.

ބަންގްލަދޭޝްގެ ޗީފް އޮފް އާމީ ސްޓާފް، އެމްއެންޑީއެފްގެ ހެޑްކޯޓާރޒްއަށް ބުދަ ދުވަހު ޒިޔާރަތްކުރެއްވުމުން އެ މަނިކުފާނުގެ ޝަރަފުގައި ދިވެހި ސިފައިން ވަނީ އޮނަރ ގާޑެއް އަރުވާފައެވެ. އަދި މިނިސްޓަރ އޮފް ޑިފެންސް މާރިޔާ އަހުމަދު ދީދީ އާއި ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުالله ޝަމާލްގެ އަރިހަށް އެމަނިކުފާނު، އިޙްތިރާމްގެ ޒިޔާރަތެއް ކުރެއްވިއެވެ.

މިނިސްޓަރު މާރިޔާއާއި ބަންގްލަދޭޝްގެ ޗީފް އޮފް އާމީ ސްޓާފް، ބޭއްވެވި ބައްދަލުކުރެއްވުމުގައި، މިނިސްޓަރ މާރިޔާ، ބަންގްލަދޭޝް އަސްކަރިއްޔާއިން ރާއްޖެއަށް ވެދެއްވާފައިވާ އެހީތެރިކަމަށް ޝުކުރު އަދާކުރައްވާފައިވެއެވެ. އެގޮތުން 2014 ގެ ސުނާމީއާއި 2014 ވަނަ އަހަރު މާލެއަށް ކުރިމަތިވި ފެނުގެ ކާރިސާގައި އަދި ކޮވިޑް-19 ގެ ބަލިމަޑުކަމުގެ ތެރޭގައި ބަންގްލަދޭޝްއިން ރާއްޖެއަށް ފޯރުކޮށްދެއްވި އެހީތެރިކަން ފާހަގަކުރައްވައި ޝުކުރު އަދާކުރެއްވިއެވެ. އަދި ދާދި ފަހުން ބަންގްލަދޭޝްގެ ބޮޑުވަޒީރު ޝެއިޚް ހަސީނާ ރާއްޖެއަށް ކުރެއްވި ޒިޔާރަތުގެ ތެރެއިން ދިވެހި އަސްކަރިއްޔާއަށް ހަދިޔާކުރެއްވި ޔޫޓިލިޓީ ވެހިކަލްތަކުގެ ބޭނުންތެރިކަން ފާހަގަކުރައްވައި، އެ ކަމަނާ ވަނީ، ބަންގްލަދޭޝް ސަރުކާރާއި އެ ގައުމުގެ އަސްކަރިއްޔާއަށް ޝުކުރު އަދާކުރައްވާފައެވެ.

މީގެ އިތުރުން ޗީފް އޮފް ޑިފެންސް ފޯސް މޭޖަރ ޖެނެރަލް ޝަމާލާއި ބަންގްލަދޭޝްގެ ޗީފް އޮފް އާމީ ސްޓާފް، ބޭއްވި ބައްދަލުވުމުގައި، ދެ ގައުމު ދެމެދު ދިފާއީ އަދި އަސްކަރީ ދާއިރާއިން ގުޅުންތައް އިތުރަށް ފުޅާކޮށް، ހަރުދަނާކުރުމާ ބެހޭ ގޮތުން މަޝްވަރާކުރެއްވިއެވެ. އަދި ދިވެހި އަސްކަރިއްޔާއާއި ބަންގްލަދޭޝް އަސްކަރިއްޔާއާ ދެމެދު ވަރަށް ގާތް ގުޅުމެއް އުފެދިފައިވާކަން ޗީފް އޮފް ޑިފެންސް ފޯސް ފާހަގަކުރައްވައި، މި ގުޅުމުގެ ތެރެއިން ދެ ގައުމަށް ކުރިމަތިވެފައިވާ ސަލާމަތީ ގޮންޖެހުންތަކާއި ނުރައްކާތަކާ ދެކޮޅަށް މަސައްކަތްކުރުމަށް ފަސޭހަވެގެން ގޮސްފައިވާކަމަށް ދެންނެވިއެވެ. އަދި، ރާއްޖެއަށް ކުރިމަތިވެފައިވާ ކާރިސާތަކާއި، ބޮޑެތި ހާދިސާތަކުގައި ބަންގްލަދޭޝްގެ އަސްކަރިއްޔާއިން އަބަދުވެސް އެހީތެރިވެދެއްވާކަން ފާހަގަކުރައްވައި މިކަމަށް ބަންގްލަދޭޝް ސަރުކާރާއި އެ ގައުމުގެ އަސްކަރިއްޔާއަށް ޗީފް އޮފް ޑިފެންސް ފޯސް ޝުކުރު އަދާކުރައްވާފައިވެއެވެ. ވަކިން ޚާއްސަކޮށް، ކޮވިޑް-19ގެ ބަލިމަޑުކަމުގެ ތެރޭގައި ބަންގްލަދޭޝް އަސްކަރިއްޔާއިން ވެދެއްވާފައިވާ އެހީތެރިކަން ޗީފް އޮފް ޑިފެންސް ފާހަގަކުރެއްވިއެވެ.

މި ޒިޔާރަތުގައި، ބަންގްލަދޭޝް އާމީ ޗީފްގެ އަރިހުގައި، ބަންގްލަދޭޝް އާރމީގެ 7 ވަނަ އިންފެންޓްރީ ޑިވިޝަންގެ ޖެނެރަލް އޮފިސަރ ކޮމާންޑިންގ މޭޖަރ ޖެނެރަލް ޚާން ފިރޯޒް އަހުމަދާއި، ބަންގްލަދޭޝްއިން ސްރީލަންކާއާއި ރާއްޖެއަށް ކަނޑައަޅުއްވާފައި ހުންނަވާ ޑިފެންސް އެޑްވައިޒަރ ކޮމޮޑޯރ ޝަފީއުލް ބާރީ ބައިވެރިވެވަޑައިގެންނެވިއެވެ. އަދި، ޗީފް އޮފް ޑިފެންސް ފޯސްގެ އިތުރުން، މި ބައްދަލުވުމުގައި ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް އަބްދުލްރަހީމް އަބްދުއްލަތީފް ބައިވެރިވެ ވަޑައިގެންނެވިއެވެ.

މި ބައްދަލުވުމަށްފަހު، ބަންގްލަދޭޝް އަސްކަރިއްޔާއާއި، އެމްއެންޑީއެފްއާ ދެމެދު އޮތް ގުޅުން އިތުރަށް ހަރުދަނާކޮށް، ޑިފެންސް ކޯރޕަރޭޝަންގެ ދާއިރާ ފުޅާކުރުމާ ބެހޭގޮތުން އެމްއެންޑީއެފްގެ ސަރވިސްތަކުގެ އިސް އޮފިސަރުންނާއި، ސްޓާފް އޮފިސަރުންނާއެކު މަޝްވަރާތައް ބާއްވާފައިވެއެވެ. މި މަޝްވަރާތަކުގައި، އެމްއެންޑީއެފްއަށް ބޭނުންވާ ލޮޖިސްޓިކްސް އައިޓަމްސް (ޔުނިފޯމް، ބޫޓު، ފީލްޑް ގިއަރފަދަ ތަކެތި) ހޯދުމާ ބެހޭގޮތުންނާއި، ސިފައިންގެ ކޯރޕަރޭޓް ޔުނިޓްތައް ކަމުގައިވާ ސިފްކޯ އަދި ސިވެކްއާއެކު ގުޅުން ގާއިމްކުރުމާ ބެހޭގޮތުން މަޝްވަރާ ކުރެވިފައިވެއެވެ. ބަންގްލަދޭޝްގެ ޗީފް އޮފް އާމީ ސްޓާފް އެމްއެންޑީއެފް ހެޑްކޯޓަރޒްއަށް ކުރެއްވި ޒިޔާރަތުގައި، އެމްއެންޑީއެފްގެ ސީނިއަރ އޮފިސަރުންނާއި، ވޮރަންޓް އޮފިސަރުންނާއި، ސީނިއަރ އެންލިސްޓެޑް ލީޑަރުންނާ ވެސް ވަނީ ބައްދަލުކުރައްވާފައެވެ. މި ބައްދަލުވުމުގައި، މި ސަރަހައްދުގެ ސަލާމަތީ މަޝްރަހާ ބެހޭގޮތުން، އަދި ވަކިން ޚާއްސަކޮށް، ބަންގްލަދޭޝްއާއި ރާއްޖޭގެ ސަލާމަތަށް ކުރިމަތިވަމުން އަންނަ ގޮންޖެހުންތަކާ ބެހޭގޮތުން އެމަނިކުފާނު ވާހަކަފުޅު ދެއްކެވިއެވެ. އަދި، ބަންގްލަދޭޝްއާއި ރާއްޖެއާ ދެމެދު އޮތް ޒަމާންވީ ގާތް ގުޅުމާއި ރަހުމަތްތެރިކަން ފާހަގަކުރައްވާފައިވެއެވެ. އަދި، ދެ ގައުމު ގުޅިގެން މިފަދަ ނުރައްކާތަކާއި ގޮންޖެހުންތަކާ ދެކޮޅަށް މަސައްކަތްކުރުމުގެ މުހިއްމުކަމާއި، މިކަމުގެ ސަބަބުން ސަރަހައްދީ ސަލާމަތާއި ރައްކާތެރިކަމަށް ކުރާނެ ފައިދާތަކާ ބެހޭގޮތުން މައުލޫމާތު ދެއްވާފައިވެއެވެ.