ޝަރީއަތް ލައިވް ކުރެވެންދެން އާރަށު ޚިޔާނަތުގެ އަޑުއެހުންތައް ލަސްކޮށްދިނުމަށް ޔާމީންގެ ފަރާތުން އެދޭ
ދިފާއުން ވަނީ ކޯޓުގައި ވަސީލަތް ނެތްނަމަ، އަމިއްލަ ބަޔަކާ ހަވާލުކޮށްގެންވެސް ލައިވްކޮށްދޭން އެދިފައި
ރައީސް ޔާމީނުގެ މައްޗަށް އުފުލާފައިވާ ދައުވާތަކުގެ އަޑުއެހުންތައް ކްރިމިނަލް ކޯޓުގައި އަންނަނީ ކުރިޔަށްގެންދަމުން
ފެލިދެއަތޮޅު އާރަށް ތަރައްގީކުރުމަށް ހިންގި މުއާމަލާތުގެ ތެރެއިން, މަގާމުގެ ނުފޫޒު ބޭނުންކުރައްވައިގެން ރިޝްވަތު ނެންގެވިކަމަށް ތުހުމަތުކުރެވޭ މައްސަލައިގެ އަޑުއެހުންތައް ލައިވް ކުރެވެންދެން ޝަރީއަތް ލަސްކޮށްދިނުމަށް ކުރީގެ ރައީސް އަބްދުﷲ ޔާމީނުގެ ފަރާތުން ކްރިމިނަލް ކޯޓުގައި އެދިވަޑައިގަންނަވައިފިއެވެ.
މި މައްސަލައިގެ އަޑުއެހުންތައް ކްރިމިނަލް ކޯޓުގައި ކުރިއަށްދާއިރު، 13 ޖެނުއަރީ 2022ގައި ބޭއްވިއަޑުއެހުމުގައި ޔާމީނުގެ ގާނޫނީ ވަކީލުންގެ ޓީމުން ވަނީ މިމައްސަލައިގެ އަޑުއެހުންތައް ލައިވްކޮށްގެން ކުރިއަށް ގެންދިއުމަށް އެދިވަޑައިގެންފައެވެ. އެހެންނަމަވެސް، އެކަމަށް ގޮތެއް ނިންމަވައި 27 ޖެނުއަރީގައި ބޭއްވި އަޑުއެހުމުގައި ގާޒީ ޝަކީލު ވަނީ, ޝަރީއަތް ލައިވް ނުކުރެވެނީ މިވަގުތު ކޯޓުގެ އިދާރީ އިންތިޒާމުތައް ހުރި ގޮތުން އެކަމުގައި ދަތިތަކެއް ހުރުމުންކަމަށް ވިދާޅުވެފައެވެ.
މި މައްސަލައިގައި އެންމެ ފަހުން 10 ފެބްރުއަރީގައި ބޭއްވި އަޑުއެހުމުގައިވެސް ދިފާއުން ވަނީ ކޯޓުގައި ވަސީލަތް ނެތްނަމަ، އަމިއްލަ ބަޔަކާއި ހަވާލުކޮށްގެންވެސް ލައިވްކޮށްދޭން އެދިފައެވެ.
ބުދަ ދުވަހު މި މައްސަލައިގައި ކުރިއަށްދިޔަ އަޑުއެހުމުގައި ރައީސް ޔާމީނުގެ ޤާނޫނީ ވަކީލުންގެ ޓީމުގެ ފަރާތުން ވަނީ ޝަރީއަތް ލައިވް ކުރުމާ ގުޅޭގޮތުން ދިފާއުން ހުށައަޅާފައިވާ ހުށައެޅުމަށް އަލިއަޅުވާލައްވާފައެވެ. އެގޮތުން ރައީސް ޔާމީނުގެ ހައްގުތައް ދިފާއު ކުރުމަށްޓަކައިވެސް ޝަރީއަތްތައް ލައިވްކޮށްގެން ކުރިއަށް ގެންދަންޖެހޭކަން ފާހަގަކުރައްވާފައިވެއެވެ. އެ އަޑުއެހުމުގައި ވާހަކަ ދައްކަވަމުން ރައީސް ޔާމީނުވެސް ވަނީ, ޝަރީއަތާއި ގުޅޭގޮތުން އެކި ފަރާތްތަކުން އިންޒާރުތައް ދެމުންދާކަން ފާހަގަކުރައްވައި، އެމަނިކުފާނަށް އޮތް ރައްކާތެރިކަމަކީ ޝަރީއަތްތައް ލައިވްކޮށްގެން ކުރިއަށް ގެންދިއުންކަމަށް ވިދާޅުވެފައެވެ.
ދައުލަތުންވެސް ވަނީ ދިފާއުން އެދޭގޮތަށް ޝަރީއަތް ލައިވް ކުރުމަކީ ދައުލަތުންވެސް އެދޭ ގޮތްކަން ފާހަގަ ކުރައްވާފައެވެ. އެގޮތުން ދައުލަތުގެ ސްޓޭންޑަކީ ކޮރަޕްޝަންގެ ހުރިހާ މައްސަަލައެއްވެސް އާންމުކޮށް ހުޅުވާލައިގެން ކުރިއަށް ގެންދިއުންކަމަށް ދައުލަތުން ބުނާ ބުނުން އެ އަޑުއެހުމުގައިވެސް ވަނީ ތަކުރާރުކޮށްފައެވެ.
މީގެއިތުރުން، ކޯޓުގައި ވަސީލަތް ނެތްނަމަ ރައީސް ޔާމީނުގެ މައްޗަށް މީގެ ކުރިން ކުރިއަށްދިޔަ ޝަރީއަތުގައި އަމަލުކުރި ގޮތަށް، އަމިއްލަ ބަޔަކާއި ނުވަތަ މީޑިއާއަކާއި ހަވާލުކޮށްގެން ޝަރީއަތް ލައިވްކޮށް ބްރޮޑްކާސްޓް ކުރެވޭ ގޮތް ހަމަޖައްސައިދިނުމަށް ދިފާއީ ވަކީލުންގެ އިތުރުން ދައުލަތުގެ ވަކީލުންވެސް އެދިލެއްވިއެވެ.
އެ މައުޟޫއަށް ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ ވިދާޅުވީ، ކޯޓުގެ ވަސީލަތްތައް މިވަގުތު ހުރި ގޮތުން ޝަރީއަތްތައް ލައިވް ކޮށްގެން ކުރިއަށް ގެންދެވެން ނެތް ނަމަވެސް، އެއީ އަޑުއެހުންތައް މަޑުޖައްސާލަން ޖެހޭ ސަބަބެއް ނޫން ކަމަށެވެ. އެހެންނަމަވެސް، އަމިއްލަ ބަޔަކާ ހަވާލުކޮށްގެން އެ ކަން ކުރިއަށް ގެންދިއުމާމެދު ކޯޓުގެ ގާޒީންގެ މަޖިލީހުގައި މަޝްވަރާ ކުރެއްވިދާނެކަމަށް ގާޒީ ޝަކީލު ވިދާޅުވިއެވެ.
މި މައްސަލައިގައި ބުދަ ދުވަހު ކުރިއަށް ދިޔަ އަޑުއެހުމުގައިވެސް ޔާމީނުގެ ޤާނޫނީ ވަކީލުންގެ ޓީމުން ވަނީ އެ ވާހަކަތައް ތަކުރާރު ކުރައްވާފައެވެ. އަދި ރައީސް ޔާމީނުވެސް މި އަޑުއެހުމުގައި ވަނީ ޝަރީއަތް ލައިވް ކުރެވޭގޮތް ހަމަޖެހެންދެން އަޑުއެހުންތައް ފަސްކޮށްދިނުމަށް އެދިލައްވާފައެވެ.
ގާޒީ ވަނީ ދެން އޮންނަ އަޑުއެހުމަކަށް އެކަމަށް ޙައްލެއް ހޯދުމަށް ކުރެވެން އޮތް މަސައްކަތެއް ކޮށްދެއްވާނެކަމަށް ވިދާޅުވެފައެވެ. މިހާރުވެސް ކޯޓުން އައިޓީ އޮފިސަރެއް ހޯދުމަށްޓަކައި ކުރަންޖެހޭ ކަންކަން ކުރަމުންދާކަން ގާޒީ ފާހަގަ ކުރެއްވިއެވެ.
ޢަޑުއެހުން ނިންމަވާލެއްވުމަށްފަހު ނޫސްވެރިންނާ ވާހަކަދައްކަވަމުން ރައީސް ޔާމީނުގެ ޤާނޫނީ ވަކީލުންގެ ޓީމުގައި ހިމެނިވަޑައިގަންނަވާ ޑރ މުޙައްމަދު ޖަމީލް ވިދާޅުވީ، 6 މާރޗުގައި އޮންނަ އަޑުއެހުމަށްވާއިރު މި ޝަރީއަތް ލައިވް ކުރެވޭނެ ގޮތް ހަމަޖެހިގެންދާނެ ކަމާއިމެދު އުއްމީދު ބޮޑުވެފައިވާ ކަމަށެވެ. އެގޮތުން ރާއްޖޭގެ ފަނޑިޔާރު ގޭގައި ތިއްބެވި ފަނޑިޔާރުން ކުޑަކަކޫ ނުޖައްސަވާނެކަމަށް އިތުބާރު އޮންނަކަމަށް ޖަމީލް ވިދާޅުވިއެވެ.
