ހިޔާ ފްލެޓް ސަރަހައްދުގެ މަގުތަކުގައި އަންނަ ހަފްތާ ތެރޭގައި ތާރު އެޅުމުގެ މަސައްކަތް ކުރާނެ ކަމަށް ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ)ގެ މެނޭޖިންގ ޑިރެކްޓަރ ސުހައިލް އަޙުމަދު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ސުހައިލް ވިދާޅުވީ ހިޔާ ފްލެޓް ސަރަހައްދުގައި އާއްމުން ފުރަތަމަ ދިރިއުޅެން ފެށިއިރު ވަރަށް ގިނަ ދަތިތަކާއި ކުރިމަތިލާން ޖެހުނު ކަމަށެވެ. ނަމަވެސް މިހާރު ގިނަ މައްސަލަތައް ހައްލު ކުރެވިފައިވާ ކަމަށް އޭނާ ވިދާޅުވިއެވެ. އާބާދުވަމުން އަންނަ ސަރަހައްދަކަށްވާތީ އެކިއެކި މައްސަލަތައް ފެންމަތިވާނެކަން ފާހަގަކުރައްވައި ސުހައިލް ވިދާޅުވީ ކުރު މުއްދަތެއްގެ ތެރޭގައި ޒަރޫރީ ބޭނުންތަކަށް ޚާއްސަ ފިހާރައެއް ހުޅުވުނު ކަމަށާއި، ނަމަވެސް ބޮޑު އާބާދީއަކަށް އެކަށީގެން ނުވާ ކަމަށެވެ. ކުރެވުނު މަސައްކަތްތަކާއެކު މިހާރު އިތުރު ފިހާރަތައް ހުޅުވުމުގެ މަސައްކަތް ކުރިއަށްދާ ކަމަށާއި، ކުރިއަށް އޮތް ހަފްތާތެރޭގައި ދެ ސްޕަރ މާކެޓެއް ހުޅުވާނެ ކަމުގެ މައުލޫމާތު ލިބިފައިވާ ކަމަށެވެ.
މީގެ އިތުރުން ސުހައިލް ވިދާޅުވީ ސެލޫންތަކާއި، ކްލިނިކްތަކާއި، އެހެނިހެން ވެސް ރައްޔިތުން ބޭނުންވާނެ ޚިދުމަތްތައް ފޯރުކޮށްދިނުމަށް ކުރަން ޖެހޭ މަސައްކަތްތައް ކުރަމުންދާ ކަމަށެވެ. ލިފްޓުން ކަރަންޓު ކެނޑޭ މައްސަލަ ހައްލު ކުރުމަށް ވެސް މެއިންޓަނަންސްގެ މަސައްކަތް ބަޔަކާ ހަވާލުކޮށް، އެމަސައްކަތް ކުރަމުންދާ ކަމަށް ސުހައިލް ވިދާޅުވިއެވެ. އަދި ވިދާޅުވީ މިހާރު ލިފްޓުން ކަރަންޓު ކެނޑުމާއި ހުއްޓުމުގެ މައްސަލަތައް ވަރަށް ދިމާނުވާ ކަމަށެވެ. މޫސުން ގޯސްވެ، ވާރޭ ވެހޭ ދުވަސްދުވަހު ފްލެޓްތަކަށް ފެން ވަންނަ މައްސަލައާ ގުޅޭގޮތުން ސުހައިލް ވިދާޅުވީ ކޮންޓްރެކްޓަރު މެދުވެރިކޮށް އެމައްސަލަ ބަލާފައިވާ ކަމަށާއި، ފެން ވަންނަ ކުޑަ ދޮރުތަކުގެ މައްސަލަ ހައްލު ކުރުމުގެ މަސައްކަތް ކުރަމުންދާ ކަމަށެވެ.
ހިިޔާ ފްލެޓްގެ މަގު ހެދުމުގެ މަޝްރޫއަށް އިޝާރާތް ކުރައްވައި ސުހައިލް ވިދާޅުވީ މަގު އޮންނަ ގޮތުން އެކަމުގެ ދަތިތައް ވެސް އާއްމު ރައްޔިތުންނަށް ކުރިމަތިވާ ކަމަށާއި، ކުރިއަށް އޮތް ހަފްތާ ތެރޭގައި ތާރުއެޅުމުގެ މަސައްކަތް ފަށާނެ ކަމަށެވެ. އަދި އެކަމަށް އޮތީ ތައްޔާރުވެފައި ކަމަށް އޭނާ ވިދާޅުވިއެވެ.
ސުހައިލް ވިދާޅުވީ ހިޔާ ފްލެޓްތަކުގައި ދިރިއުޅޭ އާއިލާތަކަށް ހިތް ފަސޭހަ ދިރިއުޅުމެއް ހޯދައި ދިނުމަށް އެޗްޑީސީން ގިނަ މަސައްކަތްތައް ކުރަމުންދާ ކަމަށެވެ. އަދި މައްސަލައެއް ފެންމެތިވި ނަމަވެސް ރައްޔިތުންނާއި މަޝްވަރާ ކުރުމަށްފަހު، އެ މައްސަލައަކަށް އޮތް އެންމެ ރަނގަޅު ހައްލު ހޯދައިދެމުންދާ ކަމަށް އޭނާ ވިދާޅުވިއެވެ.
ހިޔާ ފްލެޓްތަކަށް މިހާތަނަށް ގާތްގަނޑަކަށް 3000 އާއިލާއަކުން ބަދަލުވެފައިވާ ކަމަށް އަންދާޒާ ކުރެވޭ ކަމަށް އެޗްޑީސީން ބުނެއެވެ.
