ރާއްޖޭގެ 6 ރަށެއްގައި އެއަރޕޯޓް ތަރައްގީކުރާނެ ބަޔަކު ހޯދުމަށް ޕްލޭނިންގ މިނިސްޓްރީން ކުރިން ކުރި އިއުލާންގައިވާ, މަދުވެގެން ހުށަހެޅޭ ކަމަށް ބަޔާންކޮށްފައިވާ 5 މިލިއަން ޑޮލަރު، 3 މިލިއަނަށް ކުޑަކުރުމަށްފަހު އެ އެއަރޕޯޓްތައް ތަރައްގީކުރުމަށް އަލުން ހުޅުވާލައިފިއެވެ.

ކްރޮސް-ސަބްސިޑީގެ ގޮތުގައި ރާއްޖޭގެ 6 ރަށެއްގައި އެއަރޕޯޓް ތަރައްގީކުރާނެ، ނުވަތަ ތަރައްގީ ކުރުމަށް ފައިނޭންސް ކުރާނެ ބަޔަކު ހޯދުމަށް ޕްލޭނިންގ މިނިސްޓްރީން އިއުލާންކޮށްފައިވަނީ މިދިޔަ އަހަރުގެ ޑިސެމްބަރ މަހުއެވެ. ފައިނޭންސްކުރާނެ ބަޔަކު ހޯދުމަށް އަލުން 6 ސަރަހައްދުގައި ޑޮމެސްޓިކް އެއަރޕޯޓް ތަރައްގީކުރުމަށް ނުވަތަ ތަރައްގީ ފައިނޭންސް ކުރުމަށް އާންމުކޮށް ހުޅުވާލެވުނު ދައުވަތު ވަނީ ބަދަލުވެފައިކަމަށް, އަލުން ނެރުނު އިއުލާނުގައި ވަނީ ބުނެފައެވެ.

އިއުލާންކުރި އެއަރޕޯޓްތަކުގެ ޖުމްލަ އަދަދު 133،900،000 (ސަތޭކަ ތިރީސްތިން މިލިއަން ނުވަދިހަ ހާސް) ޑޮލަރަށް އަރައެވެ. އެއީ ދިވެހި ރުފިޔާއިންނަމަ 2 ބިލިއަން ރުފިޔާއެވެ. 2021 ވަނަ އަހަރުހެ ކުރީކޮޅުވެސް ސަރުކާރުން ވަނީ ރާއްޖޭގެ 4 ރަށެއްގައި އެއަރޕޯޓް ތަރައްގީކުރުމަށް ހުޅުވާލާފައެވެ. އެފަހަރު އިއުލާންކޮށްފައިވާ ރަށްތަކަކީ ބ. ތުޅާދޫ، ށ. ބިލެއްފަހި، ތ. ވިލުފުށި އަދި ހދ. މަކުނުދޫއެވެ. އޭގެފަހުން އަހަރު ނިމެންދަނިކޮށް އިއުލާންކޮށްފައިވަނީ މިހަތަރު ރަށުގެ އިތުރުން ރ އަތޮޅުގެ ދެކުނު ބިތުގަޔާއި ފ. މަގޫދޫގައި އެއަރޕޯޓެއް ތަރައްގީކުރުމަށެވެ. ރ. އަތޮޅު ދެކުނުބިތުގައި އެއަރޕޯޓް އެޅުމަށް ހަމަޖެހިފައިވާ ރަށް އަދި ކަނޑައެޅިފައެއްނުވެއެވެ.

ރ. އަލިފުށީ ބިން ހިއްކުމުގެ މަސައްކަތާއި އެރަށުގައި އެއާޕޯޓެއް ތަރައްގީކުރުމުގެ މަސައްކަތް ކުރުމަށް އެމްޓީސީސީއާ ވަނީ ހަވާލުކޮށްފައެވެ. އަލިފުށީގައި އެއަރޕޯޓް އެޅުމަށް މިއަހަރުގެ ސެޕްޓެމްބަރ މަހު ނިންމައި، އެކަން އެމްޓީސީސީއާ ހަވާލުކުރުމާގުޅިގެން އެއަތޮޅުގެ ގިނަ ބަޔެއްގެ ފާޑުކިޔުން އެކަމަށް އަމާޒުވިއެވެ. އޭގެފަހުން ރައީސުލްޖުމްހޫރިއްޔާ އިބްރާހީމް މުޙައްމަދު ސޯލިހު ރ އަތޮޅަށް ކުރެއްވި ދަތުރުފުޅުގައި، އެއަތޮޅުގެ ދެކުނު ބިތުގެ ރަށްރަށުގެ ކައުންސިލްތަކުގެ ރައީސުންނާ ބައްދަލުކުރައްވައި، ދެކުނު ބިތަށް އެއަރޕޯޓެއް މުހިންމުކަމުގެ ވާހަކަ ވަނީ ހިއްސާކުރައްވާފައެވެ. އެދަތުރުފުޅުގައި ރައީސް ވަނީ ރ އަތޮޅުގެ ދެކުނު ބިތުގައިވެސް އެއަރޕޯޓެއް އަޅުއްވައިދެއްވާނެކަމަށް ވައުދުވެވަޑައިގެންފައެވެ. އަލިފުށީގައި ޑޮމެސްޓިކް އެއާޕޯޓެއް ތަރައްގީކުރުމަށް އެމްޓީސީސީއާ ހަވާލުކޮށް، ދެކުނު ބިތުގައި އިތުރު އެއަރޕޯޓެއް އަޅަން ނިންމާފައިވާއިރު، އެ އަތޮޅު އިފުރުގައި މިހާރު ވެސް އަންނަނީ ޑޮމެސްޓިކް އެއާޕޯޓެއް ހިންގަމުންނެވެ.

ޕްލޭނިންގ މިނިސްޓްރީން ކޮށްފައިވާ އިއުލާނުގައި ކޮންމެ އެއަރޕޯޓަކަށް ހޭދަވާނެކަމަށް އަންދާޒާކޮށްފައިވާ އަދަދުތަކަކީ:

ހދ. މަކުނުދޫ : 23,300,000 ޑޮލަރު

ށ. ބިލެތްފަހި: 23,600,000 ޑޮލަރު

ބ. ތުޅާދޫ: 21,900,000 ޑޮލަރު

ތ. ވިލުފުށި: 33,300,000 ޑޮލަރު

ފ. މަގޫދޫ: 8,200,000 ޑޮލަރު

ރ. އަތޮޅު ދެކުނުބިތުގައި: 23,600,000 ޑޮލަރު

ޕްލޭނިންގ މިނިސްޓްރީން ބުނީ މިއިން ކޮންމެ އެއަރޕޯޓަކީ ވަކި މަޝްރޫއެއް ކަމަށެވެ. ޝައުގުވެރިކަން ފާޅުކުރުމުގައި، ތަރައްގީކުރަނީ ނުވަތަ ފައިނޭންސް ކުރަނީ ކޮން އެއަރޕޯޓު މަޝްރޫއަކަށްކަން ބަޔާންކުރަންވާނެކަމަށެވެ. ޝައުގުވެރިކަން ފާޅުކުރުމުގައި، މުޅި އެއަރޕޯޓް ތަރައްގީކުރުމަށް ބޭނުންވާ ފައިނޭންސް، ނުވަތަ އެއިން ބައެއް, ފައިނޭންސް ކުރުމަށް ހުށަހެޅިދާނެއެވެ. އެއަރޕޯޓް ތަރައްގީ ފައިނޭންސްކުރުމަށް ހުށަހަޅާ އިންވެސްޓްމަންޓް އަދަދު، އެ މަޝްރޫއެއްގެ މުގާބިލުގައި، ފަތުރުވެރިކަމަށް ކުއްޔަށް ދޫކުރާނެ ރަށް ނުވަތަ ބިން ނުވަތަ ފަޅުގެ އެކުއިޒިޝަން ކޮސްޓް އަދި އެތަނެއްގެ ބިމު ކުލީގެ ގޮތުގައި ކަނޑައެޅޭ ފައިސާގެ އަދަދާ އަޅައި, ކަނޑައިދެވޭނެއެވެ.

މި މޮޑެލްގެ ދަށުން، ދައުވަތަކާނުލައި ބިޑްކުރުމުގެ އުސޫލުގެ (އަންސޮލިސިޓަޑް ޕްރޮޕޯސަލްސް ޕޮލިސީގެ) ދަށުން، ޝަޢުގުވެރިކަން ފާޅުކޮށް ހުށަހަޅާނީ، މިނިސްޓްރީ އޮފް އިކޮނޮމިކް ޑިވެލޮޕްމަންޓަށެވެ. އީމެއިލުން ނަމަ ފޮނުވާނީ [email protected] އަށެވެ. ޝައުގުވެރިކަން ހުށަހެޅުމުގައި، އަންސޮލިސިޓަޑް ޕްރޮޕޯސަލްސް ޕޮލިސީ އެޕްލިކޭޝަން ފޯމް ފުރިހަމަކޮށް ހުށަހަޅަންވާނެއެވެ.

ސަރުކާރުން މި އަހަރުގެ ބަޖެޓުގައި އެއާޕޯޓުތައް ތަރައްގީކުރުމަށް 263 މިލިއަން ރުފިޔާ ކަނޑައަޅާފައިވެއެވެ.