މޯލްޑިވްސް އިންޓެގްރޭޓަޑް ޓުއަރިޒަމް ޑިވެލޮޕްމަންޓް ކޯޕަރޭޝަން (އެމްއައިޓީޑީސީ)ގެ ފަރާތުން މުޅި ދުނިޔެއަށް ހުޅުވާލައިގެން ކުރިއަށްގެންދާ ޔޮޓް ރެލީގެ ޔޮޓްތައް ބުދަ ދުވަހު ބ. އަތޮޅަށް ކުރަން އޮތް ނަމަވެސް މިހާރު އެ ދަތުރުގެ މަންޒިލް ބަދަލުވެއްޖެއެވެ.

ރާއްޖެއެމްވީއަށް މައުލޫމާތު ދެއްވަމުން, ސަވާދީއްތަ ދަތުރު އިންތިޒާމްކުރާ އެމްއައިޓީޑީސީގެ މެނޭޖިންގ ޑިރެކްޓަރ މުހައްމަދު ރާއިދު ވިދާޅުވީ, ބުދަ ދުވަހު ބ. އަތޮޅަށް ފުރުމަށް ތައްޔާރުވިނަމަވެސް ބ. ތުޅާދޫ އޮތީ ކޮވިޑް-19އާ ގުޅިގެން މޮނިޓަރިންގގެ ހާލަތުގައި ކަމަށެވެ. އެހެންކަމުން ރައްޔިތުންނާއި ފަތުރުވެރިކަމުގެ ރައްކާތެރިކަމަށް ބަލައި، ބ. އަތޮޅަށް ނުދިނުމަށް ނިންމީކަމަށް ރާއިދު ވިދާޅުވިއެވެ. އަދި ތުޅާދޫ ކައުންސިލްގެ ފަރާތުން ވަރަށް ބޮޑު އެއްބާރުލުމެއް ލިބުނު ކަމަށާއި، މޮނިޓަރިންގގެ ހާލަތުން އެރަށް ނެގުމަށްޓަކައި ކޮވިޑްގެ ހާލަތު ވަރަށް ގާތުން މޮނިޓަރކުރި ކަމަށެވެ. ނަމަވެސް ހާލަތު ރަނގަޅުނުވާތީ އެ ނިންމުން ނިންމީ ކަމަށް އޭނާ ވިދާޅުވިއެވެ.

ރާއިދު ވިދާޅުވީ ބުދަ ދުވަހު ހެނދުނު ދަތުރުފަށާނީ ޅ. އަތޮޅަށް ކަމަށާއި، އެ އަތޮޅުގައި ސްނޯކްލިންގއާއި، އެހެނިހެން ހަރަކާތްތަކެއް ކުރިއަށް ގެންދާނެ ކަމަށެވެ. އަދި ދެ ސަރަހައްދެއްގައި މަޑު ކުރުމަށްފަހު ހޮނިހިރު ދުވަހު ގާލާ ނައިޓަށް ފަރި މޯލްޑިވްސްއަށް ފަތުރުވެރިން ދާނެކަމަށް ރާއިދު ވިދާޅުވިއެވެ.

އަންގާރަ ދުވަހުގެ ރޭ ފަތުރުވެރިން ތިބޭނީ ލަންދޫގައެވެ.

ރަށްރަށުގެ ރައްޔިތުންގެ ފަރާތުން މި ދަތުރަށް ވަރަށް ބޮޑު ތަރުހީބެއް ލިބެމުން އަންނަކަން ފާހަގަކުރައްވައި ރާއިދު ވިދާޅުވީ, މި ރަށްތަކުގައި ދިރިއުޅޭ ރައްޔިތުން ފަތުރުވެރިކަމަށް ބޭނުންވެފައިވާ މިންވަރު މިދަތުރުން ހާމަވާ ކަމަށެވެ. މި ދަތުރުގެ ތެރެއިން ރާއްޖޭގެ ރަށްތައް އިޝްތިހާރުކޮށް އެރަށްތަކުގެ ޚާއްސަ ކަންކަން ފަތުރުވެރިން ދަނީ ބޭރުގެ އެކި ސޯޝަލް މީޑިއާ ޕްލެޓްފޯމްތަކުގައި ހިއްސާކުރަމުންނެވެ.

ރާއްޖޭގެ ފަތުރުވެރިކަން އިޝްތިހާރުކޮށް ކުރިއެރުވުމަށް ބާއްވާ މި ރެލީގައި ޖުމްލަ 9 ޔޮޓެއް ބައިވެރިވިއެވެ. ނަމަވެސް މަގުބޫލު އުޒުރަކާއެކު ދެޔޮޓެއް ވަނީ ދަތުރާ ވަކިވެފައެވެ. ކާމިޔާބުކަމާއެކު ކުރިއަށް ގެންދާ މި ދަތުރާ ގުޅޭގޮތުން ރާއިދު ވިދާޅުވީ, މިއަށްވުރެ މާ ފުރިހަމަކޮށް މިއަންނަ އަހަރު ވެސް މިރެލީ ކުރިއަށް ގެންދިއުމަށް ނިންމާފައިވާކަމަށެވެ. އަދި އުންމީދަކީ މެދުނުކެނޑި ކޮންމެ އަހަރަކުވެސް ސިލްސިލާކޮށް މިދަތުރުތައް ކުރިއަށް ގެންދެވުން ކަމަށެވެ.