ފުޓުބޯޅައިގެ ހާލަތު ގޯސްކަމަށް ބުނެ ފައިސަލް ކުޅުން ހުއްޓާލަނީ

ރާއްޖޭގެ ފުޓުބޯޅައިގެ ހާލަތު ގޯސްކަމަށާއި، އެ ހާލަތު ކިޔައިދޭނެ ކަމަށާއި، މިހާރު ތައްޔާރުވަމުން މިދަނީ ފުޓުބޯޅަ ކެރިއަރު ހުއްޓާލަން ކަމަށް ގައުމީ ފުޓުބޯޅަ ޓީމުގެ ކީޕަރު މުޙައްމަދު ފައިސަލް ބުނެފިއެވެ.

ފައިސަލް އޭނާގެ ސޯޝަލް މީޑިއާގައި ޖެހި ޕޯސްޓެއްގައި ބުނީ ފުޓުބޯޅަ ކުޅުން ހުއްޓާލަން ބޭނުންވާ ގިނަ ސަބަބުތަކެއް އެބަހުރި ކަމަށާއި، ބޭނުމަކީ ސަޕޯޓަރުންނަށް އޭނާ ފުޓުބޯޅަ ކުޅުން ހުއްޓާލުމަށް ތައްޔާރުވަމުންދާކަން ހާމަކޮށްދިނުން ކަމަށެވެ.

މީގެ އިތުރުން ފައިސަލް ބުނީ އޭނާ ފުޓުބޯޅަ ކުޅުން ރަސްމީކޮށް ހުއްޓާލާ ދުވަހު، ކަމުގެ ހަގީގަތް ހޯދަން ގުޅާ ކޮންމެ "ނޫހަކަށް" އަމިއްލަ ތަޖުރިބާގެ އަލީގައި ރާއްޖޭގެ ފުޓުބޯޅައިގެ ހާލަތު ވަރަށް ސާފުކޮށް ކިޔާދޭނެ ކަމަށެވެ. އަދި ދިވެހި ފުޓުބޯޅަ ދެކެ ލޯބިވާ އެންމެންއަށް ނޭނގޭ އެތަށް ހަގީގަތެއް ދިވެހި ފުޓުބޯޅައިގައި ވާކަމަށާއި، އެކަންކަންވެސް ހާމަކޮށްދޭނެ ކަމަށް ބުނެފައިވެއެވެ.

މި ޕޯސްޓަށް ކޮމެންޓް ކުރި ފަރާތްތަކަށް ޖަވާބުދެމުން ފައިސަލް ބުނީ ކުޅުން ހުއްޓާލާ ދުވަހު ބުނަން ބޭނުންވާ ހުރިހާ އެއްޗެއް ބުނާނެ ކަމަށާއި، ހުރިހާ ކަމެއް އެންމެންއަށް ހާމަކޮށްދޭނެ ކަމަށެވެ. އަދި އެ ދުވަހުން ދިވެހި ފުޓުބޯޅަ ހަލާކުކުރާ މީހުން ހާމަކުރާނެ ކަމަށްވެސް ފައިސަލް ބުނެފައިވެއެވެ.

ކާމިޔާބު ކެރިއަރަކަށްފަހު ފައިސަލް ފުޓުބޯޅައިން ރިޓަޔަރކުރަން ތައްޔާރުވަމުން އަންނަކަން ހާމަކުރިއިރު އޭނާ ފުޓުބޯޅަ ކެރިއަރު ފަށާފައިވަނީ 2006 ވަނަ އަހަރު ކްލަބް އޭވައިއެލް އިންނެވެ. އަދި އެއަށްފަހު ރާއްޖޭގެ ބޮޑެތި ހުރިހާ ކުލަބަކަށް ކަހަލަ ގޮތަކަށް ފައިސަލް ކުޅެފައިވެއެވެ. އެގޮތުން ވިކްޓްރީ، ނިއު ރޭޑިއަންޓް ސްޕޯޓްސް ކުލަބް، އީގަލްސް، ވެލެންސިއާގެ އިތުރުން ޑަ ގްރާންޑޭގެ ޖާޒީގައިވެސް ފައިސަލް ފެނިގެންގޮސްފައިވެއެވެ.

ދިވެހި ގައުމީ ޓީމާއެކު 2018 ވަނަ އަހަރު ފައިސަލް ސާފް ޗެމްޕިއަންޝިޕް ގެ ތަށީ އުފުލާލިއިރު އެ މުބާރާތުގެ އެންމެ މޮޅު ކުޅުންތެރިއަކަށް ހޮވިފައިވަނީވެސް ފައިސަލް އެވެ. އަދި 2010 ވަނަ އަހަރު 23 އަހަރުން ދަށުގެ ގައުމީ ޓީމާއެކު ފައިސަލް ވަނީ ސައުތް އޭޝިއަން ގޭމްސްގައި ލޯ މެޑަލް ހޯދާފައެވެ.