ޗެމްޕިއަންސް ލީގުގެ ދެވަނަ ބުރުގައި އަންގާރަ ދުވަހުގެރޭ ރެއާލް މެޑްރިޑާއި ދެކޮޅަށް ޕީއެސްޖީން ކުޅޭ މެޗުގައި އަނިޔާގެ ސަބަބުން ޑިފެންޑަރު ސާޖިއޯ ރާމޯސްއަށް ނުކުޅެވޭނެކަން ކަށަވަރުވެއްޖެއެވެ.

ރެއާލް ދޫކޮށް މި ސީޒަނުގައި ޕީއެސްޖީއާ ގުޅުނު ރާމޯސް ހުރީ ފަޔަށް ލިބުނު އަނިޔާގެ ސަބަބުން ކުޅުމާ ދުރުގައެވެ.

ރެއާލަށް 16 އަހަރު ކުޅުމަށްފަހު މި ސީޒަނުގައި ޕީއެސްޖީއަށް ރާމޯސް ގުޅުނުއިރު، އަނިޔާގެ ގިނަ މައްސަލަތަކެއް އޭނާއަށް ވަނީ ކުރިމަތިވެފައެވެ. އަދި މި ސީޒަނުގައި ރާމޯސް ޕީއެސްޖީ ގެ ޖާޒީގައި ފެނިގެންދިޔައީ އެންމެ ފަސް މެޗުގައެވެ. އެއީ ފްރެންޗް ލީގުގައި ހަތަރު މެޗާއި، ފްރެންޗް ކަޕްގެ މެޗުގައެވެ.

ޕީއެސްޖީން ބުނީ ޗެމްޕިއަންސް ލީގުގެ ދެވަނަ ބުރުގައި ރާމޯސްއަށް ކުޅެވޭނެ ކަމުގެ އުންމީދު އެބައޮތް ކަމަށެވެ. ރާމޯސް ވަނީ ޗެމްޕިއަންސް ލީގުގައި ޖުމްލަ 129 މެޗު ކުޅެ ހަތަރު ފަހަރު މި މުބާރާތް ކާމިޔާބުކޮށްފައެވެ.

ރެއާލް މެޗުގެ ކުރިން ނޫސްވެރިންނާ ވާހަކަ ދައްކަމުން ޕީއެސްޖީގެ ކޯޗު މައުރީސިއޯ ޕޮޗެޓީނޯ ބުނީ އެ ޓީމުން އެންމެ ބޭނުންވާ ތައްޓަކީ ޗެމްޕިއަންސް ލީގުކަން އެއީ އެންމެންނަށް ފެންނަން އޮތް ހަގީގަތެއް ކަމަށެވެ. އަދި އޭނާއާ ހަވާލުވެފައި އޮތް އެންމެ ބޮޑު ޒިންމާއަކީވެސް އެއީ ކަމަށެވެ.

ޕީއެސްޖީ އާއި ރެއާލް ކުޅެން ޖެހުނީ ޗެމްޕިއަންސް ލީގުގެ ގުރު އަތުލުން ދެ ވަނަ ފަހަރަށް ބާއްވައިގެންނެވެ. ގުރުއަތުލުން ދެ ވަނަ ފަހަރަށް ބޭއްވީ ދިމާވި ޓެކްނިކަލް މައްސަލަތަކަކާ ހެދިއެވެ. ފުރަތަމަ ގުރުއަތުލުމުގައި ޕީއެސްޖީ ކުޅެން ޖެހުނީ މެންޗެސްޓާ ޔުނައިޓެޑާ އެވެ. އެކަމަކު، ދެ ވަނަ ފަހަރު ގުރުއަތުލުމުން ޕީއެސްޖީން ކުޅޭނީ ރެއާލް އާއެކު ކަމަށް ނިމުނެވެ.

މިހާތަނަށް ޕީއެސްޖީއާ ދެކޮޅަށް ކުޅުނު ހަ މެޗުގެ ތެރެއިން ރެއާލް ތިން މެޗުން މޮޅުވިއިރު، ޕީއެސްޖީ އަށް ލިބުނު ހަމައެކަނި މޮޅަކީ 2019 ވަނަ އަހަރުގެ މުބާރާތުގައި ލިބުނު މޮޅެވެ. 

ޕީއެސްޖީ އާއި ރެއާލް ބައްދަލުކުރާ މެޗު ފަށާނީ އަންގާރަ ދުވަހުގެރޭ ދަންވަރު ރާއްޖެ ގަޑިން 01:00 ގައެވެ.