އިކޮނޮމިކް މިނިސްޓްރީއާ ޔޫއެންޑީޕީއާ ދެމެދު އެމްއޯޔޫއެއްގައި ސޮއިކޮށްފި

ސަރުކާރުގެ ޕޮލިސީތައް ކަނޑައެޅުމުގައި އެވިޑެންސް ބޭސްޑް ޕޮލިސީ މޭކިންގއަށް ރިއާޔަތްކުރުމަށާއި, އދ.ގެ ސަސްޓެއިނަބަލް ޑިވެލޮޕްމަންޓް ލަނޑުދަނޑިތައް ހާސިލުކުރެވޭނެ ގޮތަށް ދިވެހިރާއްޖޭގައި އިންވެސްޓްމަންޓްތައް ކުރިއެރުވުމަށްޓަކައި ފަންނީ އެހީތެރިކަން ފޯރުކޮށްދިނުމުގެ މަގުސަދުގައި, ޔުނައިޓެޑް ނޭޝަންސް ޑިވެލޮޕްމަންޓް ޕްރޮގްރާމް (ޔޫއެންޑީޕީ)އާއި އިކޮނޮމިކް މިނިސްޓްރީއާ ދެމެދު މައިގަނޑު 4 ދާއިރާއަކުން އެއްބާރުލުން ދިނުމަށް އެމްއޯޔޫއެއްގައި ސޮއިކޮށްފިއެވެ.

މި އެމްއޯޔޫގެ ސަބަބުން، ޔޫއެންޑީޕީއާ މިނިސްޓްރީއާ ދެމެދު ފާއިތުވި އަހަރުތަކުގައި ދެމެހެއްޓިފައިވާ ޒަމާންވީ ގުޅުން އިތުރަށް ބަދަހިވެ، ޔޫއެންޑީޕީން 2022ން 2026އާ ހަމައަށް ހިންގުމަށް އެކުލަވާލާފައިވާ ރާއްޖޭގެ އައު ކަންޓްރީ ޕްރޮގްރާމް ޑޮކިޔުމަންޓް ތަރައްގީކޮށް, މިޕްރޮގްރާމްތައް އިތުރު ހަލުވި މިނެއްގައި ކުރިޔަށް ގެންދިޔުމަށް މަގުފަހިވެގެންދާނެއެވެ.

Advertisement

މި އެމްއޯޔޫގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރ އޮފް އިކޮނޮމިކް ޑިވެލޮޕްމަންޓް ފައްޔާޒު އިސްމާއީލްއެވެ. ޔޫއެންޑީޕީގެ ފަރާތުން ސޮއިކުރެއްވީ ރާއްޖެއަށް ކަނޑައަޅުއްވާފައި ހުންނަވާ ޔޫއެންޑީޕީގެ ރެސިޑެންޓް ރިޕްރެސެންޓެޓިވް އެންރީކޯ ގަވޭލިއާއެވެ.

މި އެމްއޯޔޫގައި އެއްބާރުލުންދިނުމަށް އެއްބަސްވި ދާއިރާތަކަކީ:

މިއެމްއޯޔޫގައި ސޮއިކުރުމަށް ބޭއްވި ހަފުލާގައި ވާހަކަދައްކަވަމުން މިނިސްޓަރ ފައްޔާޒު ވިދާޅުވީ, މިއެމްއޯޔޫގެ ދަށުން ޕޮލިސީތަކާއި ސްޓްރެޓަޖީތައް އެކުލަވާލުމަށްޓަކައި މިހާރަށްވުރެ ބޮޑަށް ޑޭޓާގެ ބޭނުން ފުރިހަމައަށް ހިފުމަށް މަގުފަހިކޮށްދޭނެކަމަށެވެ. މީގެއިތުރުން ރާއްޖޭގެ އިގުތިސާދު ސިންދަފާތުކުރުމަށް އެހީތެރިވުމާއި ވިޔަފާރިއަށް ފަހި މާހައުލެއް ގާއިމުކުރުމަށް ސަރުކާރުން ކުރަމުން ގެންދާ މަސައްކަތަށް އެހީތެރިކަން ލިބޭނެކަމަށެވެ.

ޔޫއެންޑީޕީގެ ރެސިޑެންޓް ރެޕްރެޒެންޓެޓިވްގެ ވާހަކަފުޅުގައި, ޔޫއެންޑީޕީއާއި މިނިސްޓްރީ ގުޅިގެން މަސައްކަތް ކުރުމަށް ތައްޔާރަށް އޮތް މިންވަރު ދޭހަކޮށްދޭކަމާއި, ޑޭޓާގެ އަލީގައި ސިޔާސަތުތައް ކަނޑައަޅައި މިނިސްޓްރީގެ ފަންނީ ގާބިލުކަން އިތުރުކުރުމަށް މަގުފަހި ކުރުވުމާއި ސަރުކާރުގެ ސްޓްރެޓެޖިކް އެކްޝަން ޕްލޭން ތަންފިީޒު ކުރުމަށްޓަކައި އެކުގައި މަސައްކަތްކުރުމަށް ތައްޔާރަށް އޮތް މިންވަރު އެމްއޯޔޫގެ ސަބަބުން ހާމަވެގެންދިޔަކަން ފާހަގަކުރެއްވިއެވެ.

މި އެމްއޯޔޫގެ ސަބަބުން ޔޫއެންޑީޕީން މިހާތަނަށް ހޯދާފައިވާ ތަޖުރިބާއާއި އެންމެ ފަހުގެ ހޯދުންތަކާއި ތަފާސްހިސާބުތަކުގެ އަލީގައި, މިނިސްޓްރީގައި ދިރާސާތައް ކުރުމަށް އެހީތެރިކަން ލިބި އަދި ދިރާސާތައް އިތުރު ދާއިރާތަކަށް ފުޅާކޮށް މައުލޫމާތު ބަދަހިކުރުމަށް މަގުފަހިވެގެންދާނެއެވެ.

މީގެއިތުރުން ޔޫއެންޑީޕީއާއި މިނިސްޓްރީ ގުޅިގެން މިނިސްޓްރީން ހިންގާ އެކިއެކި ހަރަކާތްތައް އިތުރަށް ފުޅާކުރުމާއި ހަރުދަނާކުރުމަށްޓަކައި އެހީ ފޯރުކޮށްދޭ ތަފާތު އެކިއެކި ޖަމާއަތްތަކާއި މުއައްސަސާތަކުގެ އެހީއާއެކު, ގުޅިގެން މަސައްކަތްތައް ކުރުމަށް މަގުފަހިވެގެންދާނެއެވެ.

ސަރުކާރުގެ އިގުތިސާދީ ތަރައްގީގެ އެޖެންޑާ ހާސިލުކުރުމަށްޓަކައި ޔޫއެންޑީޕީއާއި މިނިސްޓްރީ ގުޅިގެން ކުރުމަށް ރާވާފައިވާ މަސައްކަތުގެ ސަބަބުން، އދ.ން ކަނޑައަޅާފައިވާ ދެމެހެއްޓެނިވި ތަރައްގީގެ ލަނޑުދަނޑިތައް ރާއްޖޭގައި ހާސިލުކުރުމަށް މަގުފަހިވުމުގެ އިތުރުން ރާއްޖޭގެ އިގުތިސާދު ސިންދަފާތު ކުރުމަށް މިއެމްއޯޔޫގެ ސަބަބުން އެހީތެރިކަން ލިބިގެންދާނެއެވެ.