ސަރުކާރުގައި އޮތް ޝަންގްރިއްލާ ރިސޯޓުގެ 30 އިންސައްތަ ހިއްސާ ދޫކޮށްލުމަށް ޓުއަރިޒަމް ޤާނޫނަށް އިސްލާހު ގެނައުމަށް ވަރަށް އަވަހަށް ހުށަހަޅުއްވާނެ ކަމަށް ޓުއަރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.

ރައްޔިތުންގެ މަޖިލީހުގައި ވަޒީރުންނާއި ސުވާލު ދެންނެވުމުގެ ބައިގައި ހޯމަ ދުވަހު އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވަނީ އައްޑޫ ސިޓީގައި އޮތް ދެ ރިޒޯޓުކަމަށްވާ ހެރެތެރެ އާއި ޝަންގްރިއްލާ، ކޮވިޑް-19 ފެށުނުއިރު ބަންދުކުރި ގޮތަށް މިއަދާ ހަމައަށްވެސް ނުހުޅުވިވާތީ، މީގެ ސަބަބުން އައްޑޫގެ އެތައް ރައްޔިތުންނެއް ތިބީ ވަޒީފާ ގެއްލި، އާމްދަނީއެއް ނުލިބި ވަރަށް ދަތި ހާލުގައި ކަމަށް ވިދާޅުވެފައެވެ. އަދި މި ދެ ރިޒޯޓު ހުޅުވޭނެ އެކި މުޙުލަތުތައްވެސް މިނިސްޓްރީން ދެމުން އައިސް މިއަދާއި ހަމައަށްވެސް އަދިވެސް މި ދެ ރިސޯޓް ނުހުޅުވޭ ކަމަށާއި، ޝަންގްރިއްލާ އާއި ހެރެތެރެ ނުހުޅުވި ލަސް މިވަނީ ކޮން ސަބަބަކާއި ހުރެކަމާއި މިކަން ޙައްލުކުރުމަށް ސަރުކާރުން ކުރަމުންދާ މަސައްކަތްތަކާއި އަދި މި ދެ ރިސޯޓު ހުޅުވޭނެ ދުވަހެއް ތަފްޞީލުކޮށް ވިދާޅުވެދެއްވުން އެދި ސުވާލު ކުރައްވާފައެވެ.

މެމްބަރު ރޮޒައިނާގެ ސުވާލުގެ ޖަވާބުގައި މިނިސްޓަރ މައުސޫމް ވިދާޅުވީ ޝަންގްރިއްލާ ރިސޯޓަކީ 284 އެނދުގެ ރިސޯޓެއް ކަމަށާއި، އެހެން ރިސޯޓްތަކާއި ޚިލާފަށް ސަރުކާރުގެ ހިއްސާ ހިމެނޭ ރިސޯޓެއް ކަމަށް ވިދާޅުވެފައެވެ. އަދި ސަރުކާރުގެ 30 އިންސައްތަ ހިއްސާ އޮވެ އެ ރިސޯޓް ނުހުޅުވިގެން ދިއުމަކީ ރައްޔިތުންގެ ސުވާލު އިތުރަށް ބޮޑުވި ކަމެއް ކަމަށާއި، އައްޑޫ އިންވެސްޓް ޕްރައިވެޓް ލިމިޓެޑާއި، އެއްކޮށްވެފައިވާ އެގްރީމެންޓްގެ ސަބަބުން ރިސޯޓަށް ގެއްލުންވާ ހާލަތުގައި ލޮސް ފައިނޭންސް ކުރުމަށް ސަރުކާރުން ބައިވެރިވާން ޖެހޭ ކަމަށެވެ.

އެގޮތުން 68 މިލިއަން ޑޮލަރު ސަރުކާރުން ލޯން ފައިނޭންސްގެ ގޮތުގައި އެ ކުންފުންޏަށް ދައްކަން ޖެހިފައި އޮތް ކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވީ 30 އިންސައްތަ ހިއްސާ އޮވެ ދައުލަތަށް އެއްވެސް އެއްޗެއް ނުލިބި ދިޔުމުން، ދައުލަތުންވެސް ބޮޑަށް ބޭނުންވަނީ އެ ބޭފުޅުންނަށް ހިއްސާ ދޫކޮށްލާފައި މިކަމާއިގެން ކުރިއަށްދެވޭނެ ގޮތެއް ހޯދަން ކަމަށެވެ.

ޓުއަރިޒަމް މިނިސްޓަރ ވިދާޅުވީ މިވަގުތު ފިނޭންސް މިނިސްޓްރީ އާއި އައްޑޫ އިންވެސްޓްމަންޓާއި ވާހަކަދެކެވެމުން ދަނީ ވީހާވެސް އަވަހަށް ޝަންގްރިއްލާ ހުޅުވުމަށް ކަމަށެވެ. އަދި ޝަންގްރިއްލާއިން މައުލޫމާތުދޭ ގޮތުގައި ވީހާވެސް އަވަހަކަށް ހުޅުވުމަށް ބޭނުންވާ ބައެއް މަރާމާތުތައް ހަދަންޖެހޭ ކަމަށާއި، ސީދާ ތާރީހަށް ދެންނެވެން ނެތް ކަމުގައިވީ ނަމަވެސް މިއީ ފަތުރުވެރިކަމުގެ ރަން އަހަރުކަމުގައިވާތީ އައްޑޫ ސިޓީއަށް ވެސް ފަތުރުވެރިކަމުގެ ރަން އަހަރު ރަނގަޅު ގޮތުގައި އަންނަންޖެހޭ ކަމުގައި މިނިސްޓަރ ވިދާޅުވިއެވެ. އެގޮތުން އުއްމީދަކީ އައްޑޫ އިންވެސްޓްމަންޓުން މިއަހަރު ނިމުމުގެ ކުރިން ޝަންގްރިއްލާ އަލުން ހުޅުވުން ކަމަށް މިނިސްޓަރ ވިދާޅުވިއެވެ.

މީގެ އިތުރުން މިވަގުތު ކޮންމެވެސް ވަރެއްގެ ހިތްހަމަޖެހުމެއް އޮތީ ކެނެރީފް ރިސޯޓް ހުޅުވިފައިވާތީ ކަމަށް މިނިސްޓަރ ވިދާޅުވިއެވެ. 13 ޖެނުއަރީގައި އެ ރިސޯޓް ހުޅުވަން ހުއްދަ ދެވިއްޖެ ކަމަށާއި، ސަރުކާރުގެ އިތުރުން އައްޑޫ ސިޓީ ކައުންސިލާއި، އައްޑޫ ސިޓީއަށް ނިސްބަތްވާ މެމްބަރުން ވަރަށް ބުރަ މަސައްކަތެއް ކެނެރީފް ރިސޯޓް ހުޅުވުމުގައި ކޮށްދެއްވި ކަމަށެވެ. މީގެ އިތުރުން ޕްރައިވެޓް ސެކްޓަރގެ ބޭފުޅުންވެސް ރިސޯޓް ހުޅުވުން މަސައްކަތްކޮށްދެއްވި އިރު، ސްރީލަންކަން އެއަރލައިނާއި މޯލްޑިވިއަން ކުރެއްވި މަސައްކަތުގެ އިތުރުން ގަން އިންޓަރނޭޝަނަލް އެއަރޕޯޓް އެކަމަށް ފަހިކުރުމަށް ކުރި މަސައްކަތް މިނިސްޓަރ ފާހަގަކުރެއްވިއެވެ.

މިނިސްޓަރ ވިދާޅުވީ 540 އެނދުގެ ކެނެރީފް ރިސޯޓް ހުޅުވިފައިވީ ނަމަވެސް، މުޅި ރިސޯޓް ފުރިހަމައަށް އޮޕަރޭޝަނަކަށް ނާންނަ ކަމަށެވެ. ރިސޯޓެއް ހުޅުވުމަކުން އެ ރިސޯޓަކަށް ލިބޭ ފައިދާ މުޅި ސިޓީއަކަށް ނުލިބޭ ކަމަށާއި، އުއްމީދުކުރަނީ ކެނެރީފް ރިސޯޓް ރަނގަޅަށް ހިނގައިގަނެ އައްޑޫ ސިޓީގެ ރައްޔިތުންނަށާއި، އެހެން ދިވެހިންނަށް އެކަމުން ލިބޭ ފައިދާއާއި ދައުލަތަށް މަންފާ ލިބިގެން ދިއުން ކަމަށް ޓުއަރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވިއެވެ.