ބޮޑީ ވޯން ކެމެރާއާއެކު ފުލުހުންގެ މަސައްކަތް ރަނގަޅުވެ، އަވަސް ނަތީޖާއެއް ނެރެވޭނެ: ޝައުނާ

ބޮޑީވޯން ނުވަތަ ގައިގަ ހަރުކޮށްފަ ހުންނަ ކެމެރާ ބޭނުންކުރަން ފެށުމާއެކު ކުށްކުރުމާ ދެކޮޅަށް ކުރާ މަސައްކަތުގެ ފެންވަރު ރަނގަޅުކުރެވި މިހާރަށްވުރެ ރަނގަޅު، އަވަސް ނަތީޖާއެއް ނެރެވިގެންދާނެ ކަމަށް މިނިސްޓަރ އޮފް އެންވަޔަރަންމެންޓް ކްލައިމެޓް ޗޭންޖް އެންޑް ޓެކްނޮލޮޖީ އައިމިނަތު ޝައުނާ ވިދާޅުވެއްޖެއެވެ.

ފުލުހުން ޚިދުމަތުގައި އުޅޭވަގުތު ބޮޑީ ވޯން ކެމެރާ އެޅުން ރަސްމީކޮށް އިފްތިތާހުކުރުމަށް ބޭއްވި ރަސްމިއްޔާތުގައި މިކަން އިފްތިތާހުކޮށްދެއްވައި މިނިސްޓަރ ދެއްކެވި ވާހަކަފުޅުގައި ވަނީ ރައްޔިތުން ފުލުހުންނާމެދު ކުރާ އުންމީދުތައް ވަރަށް ގިނަކަން ފާހަގަކުރައްވާފައެވެ. ރައްޔިތުން އެދޭ ތަރައްގީ ހޯދައިދިނުމަށް ދިވެހި ފުލުހުންގެ ދައުރު ވަރަށް ބޮޑު ކަމަށާއި، ފުލުހުންގެ ދައުރު މިހާ ބޮޑުއިރު ފުލުހުންނަށް ބޭނުންވާ ވަސީލަތްތައް ހޯދައިދިނުމަކީ ރައީސް ސާލިހު ގެންގުޅުއްވާ އެންމެ މުހިންމު އެއް ސިޔާސަތުކަން މިނިސްޓަރ ފާހަގަކުރެއްވިއެވެ.

މިއަހަރުގެ ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ ވަނީ ފުލުހުން މަސައްކަތުގައި އުޅޭ ވަގުތު ބޮޑީ ވޯން ކެމެރާ ބޭނުންކުރުމަށް އަލިއަޅުވާލައްވާފައެވެ. އޭގެ 10 ދުވަސް ފަހުން ބޮޑީ ވޯން ކެމެރާ ބޭނުންކުރުން ރަސްމީކޮށް އިފްތިތާހުކޮށްފައިވާކަން މިނިސްޓަރ ޝައުނާ ފާހަގަކުރެއްވިއެވެ.

މިގޮތުން މި ވަސީލަތަކީ ފުލުހުންގެ މުއައްސަސާ ރިފޯމްކޮށް، ފުލުހުންނަކީ ރައްޔިތުންގެ އިތުބާރު މިހާރަށްވުރެ ބޮޑަށް ލިބިފައިވާ ބަޔަކަށް ހެދުމަށް ރައީސުލްޖުމްހޫރިއްޔާ ވެވަޑައިގެންނެވި ވައުދު ފުއްދުމަށް ބޮޑު އެހީތެރިކަމެއް ލިބިދޭނެ ވަސީލަތެއް ކަމަށް މިނިސްޓަރ ވިދާޅުވިއެވެ. މިކަމުގެ ސަބަބުން ފުލުހުންނަކީ ޒިންމާދާރު އަދި ޖަވާބުދާރީވާ ޚިދުމަތެއް ފޯރުކޮށްދޭ ބަޔަކަށް ވުމަށް ބޮޑު އެހީތެރިކަމެއް ލިބިގެންދާނެކަމަށްވެސް މިނިސްޓަރ ވިދާޅުވިއެވެ.

ޚާއްސަކޮށް މިފަދަ ޒަމާނީ ޓެކްނޮލޮޖީގެ ވަސީލަތްތައް ބޭނުންކޮށްގެން ކުށްކުރުމާ ދެކޮޅަށް ކުރާ މަސައްކަތުގެ ފެންވަރު ރަނގަޅުކުރެވި މިހާރަށްވުރެ ރަނގަޅު ނަތީޖާއެއް ނެރުމަށް ކުރާ މަސައްކަތްތައް އަވަސް ވާނެއެވެ. މިއީ ފުލުހުންގެ ސަލާމަތާއި ރައްކާތެރިކަމަށް، އަދި ފުލުހުންނާމެދު ކުރެވޭ ޝަކުވާތަކުން ފުލުހުން ބަރީއަވުމަށް ލިބިގެންދާ ބޮޑު އެހީތެރިކަމެއް ކަމަށް މިނިސްޓަރ ޝައުނާ ވިދާޅުވިއެވެ. އަދި މިއީ ފުލުހުންގެ ޚިދުމަތަށް އައި މުހިންމު ބޮޑު ބަދަލެއް ކަމަށްވެސް ވިދާޅުވިއެވެ.

މިނިސްޓަރޝައުނާ އިތުރަށް ވިދާޅުވީ ޒަމާނީ ޓެކްނޮލޮޖީގެ އެހީތެރިކަމާއެކު ކުރެވޭނެ ކަންކަން ވަރަށް ގިނަ ކަމަށެވެ. އޮޕަރޭޝަންތައް ހިންގުމުގެ އިތުރުން ތަހުގީގުކުރުމުގައިވެސް ޒަމާނީ ޓެކްނޮލޮޖީ ބޭނުންކުރެވޭނެކަމަށް މިނިސްޓަރ ވިދާޅުވިއެވެ.

މިއަދު ގިނަ ކަންކަން ހިނގަނީ ސައިބަރ ސްޕޭސްގައި ކަމަށާއި، އެއީ ރައްކާތެރި މާހައުލެއްކަން ކަށަވަރުކުރުމަކީވެސް މިއަދު ކުރަންޖެހިފައިވާ މުހިންމު މަސައްކަތެއް ކަމަށް މިނިސްޓަރ ވިދާޅުވިއެވެ. އެހެންކަމުން ސައިބަރ ކްރައިމް އަދި ސައިބަރ ސެކިއުރިޓީއާ ގުޅޭ ބިލްތަކާއި ފަރުދުންގެ ޒާތީ މައުލޫމާތު ރައްކާތެރިކުރުމާގުޅޭ ބިލްތަކުގެ މަސައްކަތް ކުރަމުން އަންނަކަން ވެސް މިނިސްޓަރ ވަނީ ފާހަގަކުރައްވާފައެވެ.