އިންޑިޔާ ކަނޑުގެ ސަރަހައްދުން 265 މިލިއަން ޑޮލަރުގެ މަސްތުވާތަކެތި އަތުލައިގަނެފި
13 ފެބުރުއަރީ 2022 | އާދީއްތަ 06:50މިއީ ލިބުނު އިންޓެލިޖެންސް މައުލޫމާތަކާ ގުޅިގެން ކުރިއަށްގެންދިޔަ އޮޕަރޭޝަނެއް
އިންޑިޔާ ކަނޑުގެ ސަރަހައްދުން އަތުލައިގަތް 760 ކިލޯގެ މަސްތުވާތަކެތި
އިންޑިއާގެ ނަރކޮޓިކްސް ކޮންޓްރޯލް ބިއުރޯއާއި، އިންޑިއަން ނޭވީ ގުޅިގެން ކުރިއަށްގެންދިޔަ އޮޕަރޭޝަނެއްގައި 760 ކިލޯގެ މަސްތުވާތަކެތި އަތުލައިގަނެފިއެވެ.
މިތަކެތި އަތުލައިގަނެފައިވަނީ އަރަބި ކަނޑުން އިންޑިއާގެ ގުޖުރާތު ކޯސްޓު ކައިރީގައި ހިންގި އޮޕަރޭޝަނެކެވެ. މި އޮޕަރޭޝަނަކީ އިންޑިއާގެ ނަރކޮޓިކްސް ކޮންޓްރޯލް ބިއުރޯއާއި، އިންޑިއަން ނޭވީ ގުޅިގެން އެ ސަރަހައްދުގައި ކުރިއަށްގެންދިޔަ މިފަދަ ފުރަތަމަ އޮޕަރޭޝަންއެވެ.
މި އޮޕަރޭޝަންގައި 760 ކިލޯގެ މަސްތުވާތަކެތި އަތުލައިގަނެފައިވާއިރު، މީގެ ތެރޭގައި ހަޝިޝް އާއި، މެތަމފެޓަމިން އަދި ހެރޮއިން ހިމެނޭ ކަމަށް އިންޑިއާގެ ނޫސްތަކުގައި ވަނީ ރިޕޯޓުކޮށްފައެވެ. އަދި މިތަކެތީގެ ޖުމްލަ އަގު 2،000 ކްރޯރްއަށް އަރައެވެ. އެއީ 265,366,919.26 (ދުވިސައްތަ ފަސްދޮޅަސް ފަސް މިލިއަން ތިންލައްކަ ފަސްދޮޅަސް ހަހާސް ނުވަސްތޭކަ ނަވާރަ) ޑޮލަރެވެ.
މިތަކެތި އަތުލައިގަނެފައިވަނީ އެއްވެސް މީހަކު ނެތި އޮޔާދަނިކޯށް ފެނުނު ކާގޯ ބޯޓަކުންނެވެ. މިތަކެތީގެ ތެރޭގައި 529 ކިލޯގެ ހަޝިޝްއާއި، 234 ކިލޯގެ އެންމެ ރަނގަޅު ކޮލިޓީގެ ކްރިސްޓަލް މެތަމފެޓަމިން އަދި ހެރޮއިން ހުރި ކަމަށް އިންޑިއާގެ އެންޓި ޑްރަގް އެޖެންސީން ވަނީ ބުނެފައެވެ.
ނަރކޮޓިކްސް ކޮންޓްރޯލް ބިއުރޯގެ އޮފިޝަލަކު ވިދާޅުވެފައިވާ ގޮތުގައި އިންޑިއަން ނޭވީއާ ގުޅިގެން ކުރިއަށްގެންދިޔަ މި އޮޕަރޭޝަނަކީ އެ ސަރަހައްދުގައި މަސްތުވާތަކެތި ޓްރެފިކް ކުރާކަމަށް ލިބުނު އިންޓެލިޖެންސް މައުލޫމާތަކަށް ބިނާކޮށް ކުރިއަށްގެންގޮސްފައިވާ އޮޕަރޭޝަނެކެވެ. މިފަދައިން ލިބޭ އިންޓެލިޖެންސްތަކަށް ބިނާކޮށް އެ ބިއުރޯއިން ގެންދަނީ މިފަދަ ގިނަ އޮޕަރޭޝަންތަކެއް ހިންގަމުން ކަމަށް ބުނެފައިވެއެވެ.
އޮޕަރޭޝަންގައި އަތުލައިގެނެފައިވާ މަސްތުވާތަކެތި މިހާރު ވަނީ އިންޑިއާގެ ޕޯބަންޑާ ސިޓީއަށް ގެންގޮސްފައެވެ. މި ޚާއްސަ އޮޕަރޭޝަނާ ގުޅޭ އިތުރު މައުލޫމާތު ހިއްސާކުރަމުން އޮފިޝަލުން ބުނީ އޮޕަރޭޝަން ކުރިއަށްގެންދާކަމުގެ މައުލޫމާތު ލިބުމުން އެމީހުން ބޯޓު ދޫކޮށްލާފައި ފިލީ ކަމަށެވެ. އެމީހުން ފިލީ އެހެން ބޯޓަކަށް އަރައިގެން ކަމަށް އޮފިޝަލުން ބުނެފައިވެއެވެ.
މިދިޔަ އަހަރުގެ ޖުލައި މަހުގެ ތެރޭގައިވެސް އިންޑިއަން ނޭވީން ވަނީ އަރަބި ކަނޑުގެ ސަރަހައްދުން ގިނަ އަދަދެއްގެ މަސްތުވާތަކެތި އަތުލައިގަނެފައެވެ. އެފަހަރު 300 ކިލޯގެ މަސްތުވާތަކެތި އަތުލައިގަނެފައިވެއެވެ. މިތަކެތީގެ ޖުމްލަ އަގު 398 މިލިއަން ޑޮލަރަށް އަރައެވެ.
އަރަބި ކަނޑު ސަރަހައްދަކީ އަބަދުވެސް ގިނަ އަދަދެއްގެ މަސްތުވާތަކެތި އަތުލައިގަންނަމުން އަންނަ ސަރަހައްދެކެވެ. މިގޮތަށް ޓްރެފިކް ކުރާ ގިނަ އަދަދެއްގެ މަސްތުވާތަކެތި ރާއްޖެ ކައިރިންވެސް ވަނީ އަތުލައިގަނެފައެވެ. އެއީ ސީދާ ރާއްޖެއަށް އެތެރެކުރަން ގެންނަ މަސްތުވާތަކެތި ކަމަށްވެސް ގިނަ ބަޔަކު ބުނެއެވެ. އަދި މިފަދަ ގިނަ އޮޕަރޭޝަންތަކަކީ އިންޑިއާ ސިފައިންގެ އެހީތެރިކަމާއެކު ކުރިއަށްގެންދާ އޮޕަރޭޝަންތަކެކެވެ.
އިދިކޮޅުން މިހާރު ކުރިއަށްގެންދާ "އިންޑިއާ އައުޓް" ހަރަކާތަށް މިލިއަނުން ފަންޑު ކުރަމުންގެންދާކަމަށާއި، ފަންޑު ކުރާ މީހުން ދެނެގަނެވިފައިވާކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވަނީ ވިދާޅުވެފައެވެ. އަދި ސިޔާސީ އެކި އެކި ފަރާތްތައް މަސްތުވާތަކެތީގެ ބޮޑުންގެ ގޮތުގައި ހަރަކާތްތެރިވަމުންދާކަން ހޯމް މިނިސްޓަރ އިމްރާން އަބްދުﷲ ހާމަކުރައްވާފައިވާއިރު، އިންޑިއާ އައުޓް ހަރަކާތަށް ފަންޑު ކުރަނީވެސް ހަމަ އެ ފަރާތްތައްކަމަށް ގިނަ ބަޔަކު ގެންދަނީ ތުހުމަތުކުރަމުންނެވެ. އަދި އިންޑިއާ އައުޓް ކެމްޕޭނަކީ އިންޑިއާއިން މި ސަރަހައްދުން ގިނަ އަދަދަކަށް މަސްތުވާތަކެތި އަތުލައިގަންނަމުންދާތީ އެކަމާއި ދެކޮޅަށް ހިނގާ ކެމްޕޭނެއްގެ ގޮތުގައިވެސް ގިނަ ބަޔަކު ގަބޫލުކުރެއެވެ.
