ދެކުނު އެމެރިކާގެ ޗެމްޕިއަން، ބްރެޒިލްޑްގެ ޕަލްމެއިރާސް ބަލިކޮށް ޗެލްސީން ފުރަތަމަ ފަހަރަށް ކްލަބް ވޯލްޑް ކަޕް ކާމިޔާބުކޮށްފިއެވެ.

ޔުނައިޓެޑް އަރަބް އެމިރޭޓްސް (ޔޫއޭއީ)ގެ އަބޫދާބީގައި ކުޅުނު ފައިނަލު މެޗު ޗެލްސީން ކާމިޔާބުކުރީ 2-1 ގެ ނަތީޖާއަކުންނެވެ.

މެޗުގެ ފުރަތަމަ ހާފުގައި ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔައިރު، މި ހާފުގައި ލަނޑުޖަހަން އެންމެ ރަނގަޅު ފުރުސަތެއް ލިބުނީ ޕަލްމެއިރާސްގެ ޑޫޑޫ އަށެވެ. އެކަމަކު އޭނާއަށް މި ފުރުސަތުގެ ބޭނުން ހިފޭގޮތް ވަނީ ނުވެފައެވެ.

މެޗުގެ ފުރަތަމަ ހާފުގައި ޗެލްސީގެ ފޯވަޑަށް ކުޅޭ ކުޅުންތެރިންނަށް ޕަލްމެއިރާސްގެ ގޯލަށް ނުރައްކާތެރި ހަމަލާއެއް ފޮނުވާލެވިފައިނުވި ނަމަވެސް ދެވަނަ ހާފުގެ ކުރީކޮޅު ޗެލްސީގެ ކުރިއަށް ކުޅޭ ބެލްޖިއަމްގެ ފޯވާޑް ރޮމޭލޫ ލުކާކޫ ވަނީ ލަނޑު ޖަހާ ޗެލްސީއަށް ލީޑު ނަގައިދީފައެވެ. މިއީ މިޑްފިލްޑަރ ކަލުމް ހަޑްސަން އޮޑޯއިގެ އެހީތެރިކަމާއެކު ލުކާކޫ ކާމިޔާބުކުރި ލަނޑެކެވެ.

އެކަމަކު މެޗުގެ 64 ވަނަ މިނެޓުގައި ލިބުނު ޕެނަލްޓީއަކުން ޕަލްމެއިރާސްގެ ރަފައެލް ވެއިގާ ވަނީ ލަނޑު ޖަހާ ނަތީޖާ ހަމަހަމަ ކޮށްފައެވެ. މިއީ ޗެލްސީގެ ޑިފެންޑަރު ތިއާގޯ ސިލްވާ އޭރިއާ ތެރެއިން ބޯޅައިގައި އަތްލުމުން ވީޑިއޯ އެސިސްޓެންޓް ރެފްރީ (ވީއޭއާރް) ބެލުމަށްފަހު ދިން ޕެނަލްޓީއެކެވެ.

މެޗުގެ ފުރިހަމަ ވަގުތު ހަމަވިއިރު 1-1 ގެ ނަތީޖާއަކުން ދެ ޓީމު އެއްވަރުވެފައި އޮތުމުން ނަތީޖާ ނެރުމަށް އިތުރު ވަގުތުގެ ދެ ހާފު ވަނީ ކުޅެފައެވެ.

ޗެލްސީން މެޗުގެ ލީޑު ނެގީ އިތުރު ވަގުތުގެ ދެވަނަ ހާފުގެ ފަހު ވަގުތު ލިބުނު ޕެނަލްޓީއަކުން ކައި ހަވާޓްޒްއެވެ. މިއީ ޕަލްމެއިރާސްގެ ޑިފެންޑަރު ލުއާން އަތުގައި ބޯޅަ ޖެހުމުން ވީއޭއާރް ބެލުމަށްފަހު ދިން ޕެނަލްޓީއެކެވެ.

ޕަލްމެއިރާސްއިން މެޗު ނިންމާލީ ކުޅުންތެރިއެއް މަދުކޮށެވެ. އެއީ ޕެނަލްޓީ ދިން ލުއާން ފަހުން ހަވާޓްޒްއަށް ކުރި ފައުލަކާ ގުޅިގެން ރަތް ކާޑު ދެއްކުމުންނެވެ. މިއީ ވެސް ވީއޭއާރް ބެލުމަށްފަހު ދެއްކި ކާޑެކެވެ.

ޗެލްސީގެ ކޯޗުކަމާއި މިދިޔަ އަހަރުގެ ޖެނުއަރީ މަހު ހަވާލުވި ޖަރުމަނުގެ ތޯމަސް ޓުޗެލްގެ ކޯޗުކަމުގައި ޗެލްސީން ވަނީ ޗެމްޕިއަންސް ލީގާއި ޔުއެފާ ސުޕަ ކަޕް އަދި ފީފާ ކްލަބް ވޯލްޑް ކަޕް ހޯދައިފައެވެ. އެފްއޭ ކަޕް ފައިނަލުން މިދިޔަ އަހަރު ލެސްޓާ ސިޓީ އަތުން ވަނީ ބަލިވެފައެވެ.

ޗެލްސީ އަކީ ކްލަބް ވޯލްޑް ކަޕް ކާމިޔާބުކުރި އިނގިރޭސި ތިން ވަނަ ކްލަބް އެވެ. މީގެ ކުރިން 2008 ވަނަ އަހަރު މެންޗެސްޓާ ޔުނައިޓެޑާއި 2019 ވަނަ އަހަރު ލިވަޕޫލުން މި މުބާރާތް ކާމިޔާބުކުރިއެވެ.

ޗެލްސީގެ ތާރީޚުގައި އެޓީމަށް ނުލިބި އޮތް ހަމައެކަނި ބޮޑު މުބާރާތަކީ ކްލަބް ވޯލްޑް ކަޕެވެ. ޗެލްސީން މީގެ ކުރިން 2012 ވަނަ އަހަރު ކްލަބް ވޯލްޑް ކަޕުގައި ކުޅުނު ނަމަވެސް ފައިނަލުގައި ވަނީ ކޮރިންތިއަންސް އަތުން ބަލިވެފައެވެ.