ރިސޯޓް ތަރައްޤީކުރަން ހުޅުވާލި ރަށްތަކަށް 20 އަށްވުރެ ގިނަ ބީލަން ހުށައަޅައިފި
12 ފެބުރުއަރީ 2022 | ހޮނިހިރު 09:03ބީލަން ކާމިޔާބުކުރާ ފަރާތްތަކުން 60 ދުވަހުގެ ތެރޭ އެކުއިޒިޝަން ކޮސްޓް ހުށަހަޅަން ޖެހޭނެ
ރާއްޖޭގެ ފަތުރުވެރިކަން ދަނީ މުޅި ދުނިޔޭގައި ކުރިއަރަމުން
ޓޫރިޒަމް ތަރައްޤީކުރުމަށް ހުޅުވާލި ރަށްތަކަށް 20 އަށްވުރެ ގިނަ ފަރާތުން ބިޑް ޑޮކިއުމަންޓް ގަތުމަށް ހުށައަޅާފައިވާ ކަމަށް ޓޫރިޒަމް މިނިސްޓްރީން ބުނެފިއެވެ.
ޓޫރިޒަމް މިނިސްޓްރީން މިހެން ބުނީ، އެމިނިސްޓްރީން ބޭއްވި އިންވެސްޓްމަންޓް ފޯރަމަށްފަހު ނޫސްވެރިންނަށް މައުލޫމާތުދެމުންނެވެ.
ރިސޯޓު ތަރައްޤީކުރަން މިދިޔަ އަހަރުގެ އޮކްޓޫބަރު މަހު 18 ރަށެއް ތަރައްގީ ކުރަން ހުޅުވާލިއެވެ. އަދި މިދިޔަ ޖެނުއަރީގައި އެ ލިސްޓަށް ތިން ރަށްވަނީ އިތުރުކޮށްފައެވެ.
ޓޫރިޒަމް މިނިސްޓްރީން ބުނީ ރާއްޖޭގެ އެކި ސަރަހައްދުތަކުގައި ފަތުރުވެރިކަން ތަރައްޤީކުރުމަށް މިއަހަރު ހުޅުވާލާފައިވަނީ މާލެއާއި ދުރު ސަރަހައްދުތަކުގެ ރަށްތައްކަމުން ޑިމާންޑް ދަށްކަމަށް ހީވެދާނެކަމަށެވެ. އެހެންނަމަވެސް ކުރީ 2 ފަހަރާއި އަޅާބަލާއިރު މިއަހަރު ބީލަން ހުށައަޅާ ފަރާތްތަކުގެ އަދަދު އިތުރުކަމަށެވެ.
ބީލަން ކާމިޔާބުކުރާ ފަރާތްތަކުން 60 ދުވަހުގެ ތެރޭ އެކުއިޒިޝަން ކޮސްޓް ހުށަހަޅަން ޖެހޭނެ އެވެ. ޓޫރިޒަމް މިނިސްޓްރީން ބުނީ ބީލަން ކާމިޔާބު ކުރާ ފަރާތްތަކުން ރިސޯޓް ހެދުމުގެ މަސައްކަތް ގާތްގަނޑަކަށް ތިން މަސް ދުވަހުގެ ތެރޭގައި ފެށުމުގެ ފުރުސަތު އޮންނާނެ ކަމަށެވެ.
ޓޫރިޒަމް މިނިސްޓްރީން އިއުލާނުކުރި ރަށްތައް ވިއްކުމުގައި 60 ޕަސެންޓް ޕޮއިންޓް ކަނޑައަޅާފައި ވަނީ އެންމެ ބޮޑު އަގު ހުށަހަޅާ ފަރާތަކަށެވެ. އަދި ތިމާވެށީގެ ކަންކަމާއި މުވައްޒަފުން ތަމްރީނު ކުރުމާއި އިޔާދަކުރަނިވި ހަކަތަ އަށް އިސްކަންދޭ މިންވަރަށް ޕޮއިންޓްދޭނެއެވެ.
